61
ኣቶቴꬃ ሚሺራቾ
1 ኡባ ሃሪዛ ጎዳ ኣያናይ ታ ቦላ ዴስ፤
ሂዬሳታስ ሚሺራቾ
ዮታና ማላ፥
ጎዳይ ታና ቲይዴስ።
ኢዚ ታና ዎዚናይ ሜቂዳይታ
ኮላና ማላ፥
ዲኤቲዳይታ ላኣ ኬሳና ማላ፥
ቃሼቲዳይታስ ቢርሼꬅ
ኣዋጃና ማላ ኪቲዴስ። ማቶ 11፡5፤ ሉቃ 7፡22
2 ዶሴቲዳ ጎዳ ላይꬅ፥
ኑ ጾሳይ ሃሎ ኬሲዛ ጋላሳ
ኣዋጃና ማላኔ
ዬኪዛይታ ኡባ
ሚንꬄꬃና ማላ
ታና ኪቲዴስ። ሉቃ 4፡18-19
3 ቃሴካ ጺዮኔን ካዮቲዛይታ
ዶሺሳና ማላ፥
ቢዲንꬃ ጊሻስ
ፑላቴꬃ ካላቻ፤
ዬሆ ጊሻስ ኡፋይሳ ዛይቴ
ኢስታ ሁኤን ታ ጉሳና ማላ፥
ጬጬ ኣያና ጊሻስ ጋላታ ሴሎ
ታ ኢስታ ቦላ ጎጳና ማላ
ታና ኪቲዴስ፤
ኢስቲካ ኢዛ ቦንቾ
ቆንጪሳና ማላ
ጎዳይ ቶኪዳ ጺሎ ሚꬅ
ጌቴቲ ጼይጌታና።
4 ኢስቲ ቤኒ ላሌቲዳይታ
ዛሪ ኬጻና፤
ካሴ ዎዴ ኩንዲዳይታካ
ዛሪ ኤሳና፤
ዳሮ ዬሌታታፔ
ካሴ ኩንዲዳይታኔ
ላሌቲዳ ካታማታ
ዛሪ ኬጻና።
5 ኢማꬃቲ ኢንቴ ዶርሳ
ዉዴታ ሄማና፤
ኣላጋ ቢታ ኣሳቲ
ኢንቴ ጋዴኒኔ
ኢንቴ ዎይኔ
ኣታኪልቴ ጊዶን ኦꬃና።
6 ኢንቴ ቃሴ፥ «ጎዳ ቄሴታ»
ጌቴቲ ጼይጌታና፤
ኣሳይካ ኢንቴና፥
«ኑ ጾሳ ኦሳንቻታ»
ጊዲ ጼይጋና፤
ኢንቴ ካዎቴꬃታ ኣቆታ ማና፤
ኢስታ ዱሬቴꬃንካ
ኢንቴ ጬቄታና።
7 ታ ዴሬይ ዬላቲዳይሳ ቆꬌ
ናምኡ ኩሼ ኤካና፤
ካዉዪዳይሳ ቆꬌ
ባንታ ጺንጾን ኡፋዬታና፤
ባንታ ቢታስ
ናምኡ ኩሼ ላታና፤
ሜርና ኡፋይሲ ኢስታስ ጊዳና።
8 ታኒ ጎዳይ ሱሬ ፒርዳ ዶሳይስ፤
ቦንቃኔ ቆሆ ኢጻይስ።
ታ ኣማኔቴꬃን
ኢስታስ ቤሲዛይሳ ኢማና፤
ኢስታራ ሜርና ጫቆ
ቃላ ጌላና።
9 ኢስታ ዛሬቲ ካዎቴꬃታ ጊዶን፥
ኢስታ ናይቲ ዴሬ ጊዶን
ኤሬቲዳይታ ጊዳና፤
ኢስቲ ቤኢዛ ኡባይ ጎዳይ ኣንጂዳ
ዴሬ ጊዲዳይሳ ኤራና፤
10 ታኒ ጎዳን ኬሂፔ ኡፋዬታይስ፤
ታ ሼምፖያካ
ታ ጾሳን ሆምቦጫዉስ፤
ሚሺራይ ባ ሁኤን
ካላቻ ጎጺዛ ማላ፥
ሚሺራያካ ባና ኢንቁን
ሴሌꬂዛ ማላ
ኣቶቴꬃ ማይኦ ታና ማይዚዴስ፤
ጺሎቴꬃ ሴሎካ
ታ ቦላ ጎጲዴስ። ኣጁ 21፡2
11 ቢታይ ጫሬች ጫሪሲዛ ማላ፥
ኣታኪልቴሶሆይ
ፑቴ ፑቲሲዛ ማላ፥
ኡባ ሃሪዛ ጎዳይ
ካዎቴꬃታ ኡባ ሲንꬃን
ጺሎቴꬂኔ ጋላታ ጫሪሳና።