62
ጺዮኒስ ኦራꬃ ሱንꬅ
1 ኢዚ ጺሎቴꬂ ማላዶ ፖኦ ማላ ጶላናሼ ጋካናስ፥
ኢዚ ኣቶቴꬂ ጾምፔ ማላ
ፖኣናሼ ጋካናስ
ታ ጺዮኒ ጊሻስ ጮኡ ጊኬ፤
ዬሩሳላሜ ጊሻሲካ
ሲርጲ ጊኬ።
2 ካዎቴꬃቲ ኔ ጺሎቴꬅ፥
ካዎቲካ ኔ ቦንቾ ቤኣና፤
ጎዳይ ባ ዶናን ሱንꬂዳ
ኦራꬃ ሱንꬃን
ኔ ጼይጌታና።
3 ኔኒ ጎዳ ኩሼ
ቦንቾ ኣኪሊሌ፥
ኔ ጾሳ ኩሼን ካዎታ
ካላቻ ጊዳና።
4 ሃይሳፌ ጉዬ ኔኒ፥
«ኣዚናይ ዬጊ ኣጊዳሮ» ጌቴታካ።
ቃሴ ኔ ቢታያካ፥
«ዬጌታ ኣቲዳሮ» ጌቴቱኩ።
ጊዶ ኣቲን፥
«ታ ኡፋይሲ ኢዚና» ጌቴታና፤
ኔ ቢታያካ፥
«ኣዚናይ ዲዛሮ» ጌቴታና፤
ጎዳይ ኔናን ኡፋዬታና፤
ኔ ቢታያካ
ኣዚናራ ዲዛሮ ጊዳና።
5 ፓንꬂ ጌላኦ ኤኪዛ ማላ፥
ኔ ናይቲ ኔና ኤካና፤
ሚሺራዚ ሚሺራይን
ኡፋዬቲዛ ማላ፥
ኔ ጾሲ ኔናን ኡፋዬታና።
6 ሃኔ ዬሩሳላሜ!
ናጊዛይታ
ኔ ዲርሳታ ቦላ ኤሳዲስ፤
ኢስቲ ጋላሲካ
ኦማርስ ጉዬ ጌቴና፤
ኢንቴኖ ጎዳኮ ዋሲዛይቶ፥
ሙሌካ ሼምፖፍቴ፤
7 ኢዚ ዬሩሳላሜ ሚንꬃና
ጋካናሲኔ
ቢታ ኡባ ቦላ ኤሬቲዳ
ካታማ ኦꬃና ጋካናስ
ኢዛስ ሼምፖ ኢሞፍቴ።
8 ጎዳይ ባ ኡሻቻ ኩሼኒኔ
ባ ዎልቃማ ቄሴን፥
«ሃይሳፌ ጉዬ ታ ኢንቴ ካꬅ
ኢንቴ ሞርኬታስ
ቁማ ጊዳና ማላ ኢሚኬ፤
ቃሴ ኢንቴ ዳቡሪ ኬሲዳ
ኦራꬃ ኡሻ
ኣላጋቲ ኡዬቴና።
9 ጊዶ ኣቲን ካꬃ ሺሺዳይቲ ማና፤
ጎዳካ ጋላታና፤
ዎይኔ ቴራ ማጺ ሺሺዳይቲ
ታ ኬꬃ ፔንጌን ኡያና»
ጊ ጫቂዴስ።
10 ኣꬊቴ! ኢዛ ፔንጌታ ባጋራ
ካንꬂ ቢቴ፤
ዴራስ ኦጌ ባሲቴ፤
ጊግሲቴ፤ ሹቻታ ዲጊቴ፤
ካዎቴꬃታስ ማላታ ኤሲቴ።
11 ቤኢቴ፥ ጎዳይ
ሳኣ ጋጻ ጋካናስ፥
«ጺዮኔ ማጫ ናይስ፥
‹ሄኮ ኔና ኣሺዛዴይ ዬስ፤
ኔ ዋጋይ ኢዛ ኩሼን ዴስ፤
ኔ ቃዳይ ኢዛኮን ዴስ› ጊቴ»
ጊዲ ኣዋጂዴስ።
12 ኢስቲ፥ «ጎዳይ ዎዚዳ
ጌሻ ዴሬታ፤
ኔካ ዬጌታ ኣቶንታሮ
ኮዬቲዛ ካታማዮ» ጌቴታና።