63
ጾሳ ጾኖኔ ኢዚ ኣሺዛ ዎልቃ
1 ኤዶሜ ቢታን ዲዛ
ቦጺራ ካታማፔ
ዞኦ ሴሎ ማይኦ ማይኢዲ
ዪዛይ ሄሲ ኢዚ ኦኔ?
ሃይሲ ቦንቾ ማይኢዲ
ባ ዎልቃ ጊታቴꬃን ሄሜቲሼ
ዪዛይ ኢዚ ኦኔ?
«ጺሎ ሃሳይዛይኔ
ኣሻናስ ዎልቃይ ዲዛይ
ታና ጊዲኪና!» ጌስ ጎዳይ።
2 ኔ ሴሎ ማይኦይ ዎይኔ ጉምኢዛ
ኣሳታ ማይኦ ማላ
ኣይስ ዞኢዴ?
3 «ጉምኢዛሶሆዛን ዎይኔ
ታኒ ታርካ ዬꬋዲስ፤
ካዎቴꬃታፔ ኦኒካ
ታናራ ዴና፤
ታኒ ኢስታ ታ ሃንቆን ዬꬋዲስ፤
ታ ባሻንካ
ኢስታ ዲርጼሬꬃዲስ፤
ኢስታ ሱꬂ ታ ሴሎ
ማይኦ ቦላ ꬋጬቲዴስ፤
ታ ማይኦይ ኡባይ ሞሬቲዴስ።
4 ታኒ ሃሎ ኬሳና
ጋላሳይ ታ ዎዚናን ዴስ፤
ታ ዎዛና ጋላሳይካ ጋኪዴስ።
5 ታኒ ጼላዲስ ሺን
ማዲዛይ ቤቲቤና፤
ማዲዛዴይ ባይንዳ ጊሻስ
ታኒ ማላሌታዲስ
ታስ ኣቶቴꬅ ኤሂዴስ፤
ታ ሃንቆይካ ታና ሚንꬂዴስ።
6 ታ ሃንቆን ካዎቴꬃታ
ዬꬋዲስ፤
ታ ባሻን ኢስታ ማꬆሳዲስ፤
ኢስታ ሱꬃካ
ቢታን ጉሳዲስ» ጋና።
ጾሳይ ኢስራኤሌስ ኦꬂዳ ኪያቴꬅ
7 ጎዳ ኪያቴꬂ፥
ጎዳይ ኑስ ኦꬂዳ
ኦሶ ኡባ ጊሻስ፥
ኢዚ ጋላቴቲዛ
ኦሶዛ ጊሻስ፥
ኢዛ ሲቆዛኔ
ኢዛ ኪያቴꬃ ኬና፥
ኢስራኤሌ ኬꬃስ
ኢዚ ኦꬂዳይሳ፥
ኤ ኢዚ ኦꬂዳ
ሎኦ ኦሶታ ጊሻስ
ታ ዮታና።
8 ጎዳይካ፥ «ቱሙካ፤
ኢስቲ ታ ዴሬታ፤
ኢስቲ ታስ ዎርዶቶንታ
ኣቱማ ናይታ» ጊዴስ።
ሄሳ ጊሻስ ኢዚ ኢስታ
ኣሺዛዴ ጊዲዴስ።
9 ኢስታ ሜቶ ኡባን ጬጪዴስ፤
ኢዛ ዱሳ ኤሪሲዛ ኪታንቻይ
ኢስታ ኣሺዴስ፤
ኢዚ ባ ሲቆኒኔ
ባ ማሮቴꬃን
ኢስታ ዎዚዴስ።
ካሴ ኣꬊዳ ዎዴ ኡባን
ኢስታ ዴንꬂዴሲኔ ቶኪዴስ።
10 ኢስቲ ጊዲኮ ማካሊዳ፤
ኢዛ ጌሻ
ኣያናካ ሚሺሲዳ
ሄሳ ጊሻስ ኢዚ ሲሚዲ
ኢስታስ ሞርኬ ጊዲዴስ፤
ኢስታ ኦሊዴስ።
11 ሄሳፌ ጉዬ ኣሳይ ቤኒ ዎዴዛኔ
ሙሴ ዎዴ ዩሺ ቆፒዴስ፤
ባ ዶርሳታ ሄንꬃንቻታራ
ኡባፌ ኬሲዳይሲ
ኢዚ ኣዋን ዲዜ?
ባ ጌሻ ኣያና
ኢስታ ጊዶን ዎꬂዳይሲ
ሃኢ ኣዋን ዲዜ?
12 ቦንቼቲዳ ዎልቃማ ቄሴ፥
ሙሴስ ኡሻቻ ኩሼ
ቦላ ዎꬂዴስ፤
ባስ ሜርናስ ሱንꬅ ኬሳናስ፥
ሃꬃታ ኢስታ
ሲንꬃን ሻኪዴስ።
13 ፓራይ ኣይኮይ ባይንዳ ባዞ ቢታራ
ካንꬂ ቢዛ ማላ፥
ኢስታካ ጪማ ጊዶራ
ካሌꬂ ፒንꬂዴስ፤
ሄሳ ጊሻስ
ኢስቲ ꬉጴቲቤቴና።
14 ዱጌ ዙሌ ዎꬊዛ
ሜሄ ዉዴ ማላ፥
ጎዳ ኣያናይ ኢስታስ
ሼምፖ ኢሚዴስ፤
ኢዚ ዴራ ሄሳꬆ
ካሌꬂዳይ፥ ኔ ሱንꬃ
ቦንቺሳናሳ።
ማዶ ዴማናስ ዎሲዛ ዎሳ
15 ኣቤት ጎዳዉ፥
ዱማቲዳ፥ ቦንቼቲዳኔ
ꬎቁ ጊዳ ኔ ኣራታፔ
ሳሎፔ ዱጌ ጼላ፤
ኔ ዎልቃይኔ
ኔ ሚሼቲዛ ሚሾይ ኣዋኔ?
ኔ ኣሽኬቴꬃይኔ
ኔ ቃꬌቴꬂ
ኑፔ ሃኪዴስ።
16 ኣብራሃሜይ ኑና ኤሮንታ ኣጊኮ፥
ኢስራኤሌይካ
ኑና ኣኬኮንታ ኣጊኮካ
ኔኒ ኑስ ኣዋ።
ኣቤት ጎዳዉ፥ ኔኒ ኑስ ኣዋ፤
ቤኒሶፌካ ዶሚዲ
ኔ ሱንꬃይ ኑና ዎዚዛይሳ።
17 ኣቤት ጎዳዉ፥
ኑኒ ኔ ኦጌፔ ኬዛና ማላ፥
ኑ ዎዚና ቱሊሳዳ
ኔስ ያዮንታ ማላ
ኣይስ ኦꬃይ?
ኔ ኣይሌታ ጊሻስ ጋዳ፥
ኔስ ጺንጾ ጊዲዳ
ቆሞታ ጊሻስ
ጋዳ ኑኮ ሲማ።
18 ጉꬃ ዎዴስ ኔ ዴሬይ
ጌሻሶሆዛ ላቲዴስ፤
ሃኢ ጊዲኮ ኑ ሞርኬቲ
ኔ ኬꬃ ዬꬊዳ።
19 ሄኮ ቤኒሶፌ ኑኒ ኔይታ፤
ጊዶ ኣቲን
ኢስታ ኔኒ ሃራቤካ፤
ኢስቲ ኔ ሱንꬃንካ
ጼይጌቲቤቴና።