64
1 ኣቤት ጎዳዉ፥ ኔኒ ሳሎታ ዳካዳ ዱጌ ዎꬋርኪ!
ዙማቲ ኔ ሲንꬃን ኮኮሬቶ።
2 ቃይጻሬ ታማይ
ሃꬅ ፔንቲሲዛ ማላ፥
ኔ ሞርኬታ ማታን ኔ ሱንꬂ
ኤሬታና ማላ ዎꬋ፤
ካዎቴꬃታካ
ኔ ሲንꬃን ኮኮርሳ።
3 ካሴካ ኔኒ ኑ ቆፖንታ
ያሺሲዛ ሚሽ
ኔ ኦꬂዳ ዎዴ
ኔ ዎꬊን ዙማቲ ኮኮሪዳ።
4 ቤኒሶፌ ዶሚዲ ሂዶታ ኦꬂ
ናጊዛይታስ ጋኪዛ
ማላታ ኦꬂዳይ ኔፔ ኣቲን
ሃራ ጾስ ቤኢዳ ኣይፌይኔ
ሲዪዳ ሃይꬂ ሙሌካ ዴና። 1ቆሮ 2፡9
5 ሱሬ ሚሽ ኡፋይሳን
ኦꬂዛይታኔ
ኔ ኦጌ ቆፒዛይታ
ኔኒ ማዳሳ፤
ጊዶ ኣቲን ኑኒ ኢስታ ቦላ
ፓጬይ ባይንዳ
ናጋራ ኦꬂዳ ጊሻስ
ሄኮ ኔኒ ኑ ቦላ
ሃንቄታዳሳ፤
ሂስቲን ኑኒ ዋኒ
ኣታና ዳንዳይዞኒ?
6 ኑኒ ኡባይካ
ቱና ኣሳ ማላ ጊዲዶስ፤
ኑ ጺሎቴꬃ ኦሶ ኡባይ
ቱኒዳ ጫርቃ ማላ።
ኑኒ ኡባይካ
ቦንጮ ማላ ቆኪዶስ፤
ኑ ናጋራይ ኑና ጫርኮ ማላ
ፒቲ ኤፊዴስ።
7 ኦኒካ ዎሳን
ኔ ሱንꬅ ጼይጌና፤
ኔና ኦይካና
ፓጪዛይካ ዴና፤
ኔኒ ኔ ኣይፌሶ
ኑፔ ጌንꬃዳሳ፤
ኑ ናጋራይ ኑና
ꬋይሳና ማላ ኣጋዳሳ።
8 ጊዲኮካ ኣቤት ጎዳዉ፥
ኔኒ ኑስ ኣዋ፤ ኑኒ ኡርቃታ፤
ኔኒ ኑና ሜꬊዳይሳ፤
ኑኒ ኡባይካ
ኔ ኩሼን ሜꬌቲዳይታ።
9 ኣቤት ጎዳዉ፥ ኬሃ ሃንቄቶፋ፤
ኑ ናጋራካ ሜርናስ ቆፖፋ፤
ኑስ ዎሴታ፤
ኑ ኡባይ ኔ ዴሬ ጊዲዳ ጊሻስ
ኔ ኣይፌሶ ኑኮ ሃ ዛራ።
10 ኔ ጌሻ ካታማቲ ኣይኮይ ባይንዳ
ባዞ ጊዲዳ፤
ጺዮናካ ኣይኮይ ባይንዳ
ባዞ ቢታ ጊዳዱስ፤
ዬሩሳላሜይካ ዬጌታ ኣታዱስ።
11 ኑ ኣዋቲ ካሴ ኔና
ኢዛን ጋላቲዛ ጾሳ ኬꬃይ
ታማን ጹጌቲዴስ፤
ካሴ ሎኦሶቲ ኡባቲካ ꬋይዳ።
12 ኣቤት ጎዳዉ፥
ሃይሲ ኡባይ ሃኒንካ
ኔ ሲሚኪ?
ኔኒ ጮኡ ጋዳ ኑና
ዛዋይ ባይንዳ ቂጻቴ ቃጻያይ?