65
ፒርዳኔ ኣቶቴꬅ
1 ጎዳይ፥ «ታና ዎሶንታይታስ
ታ ቆንጫዲስ፤
ታና ኮዮንታይታስ ቤታዲስ።
ታ ሱንꬃ ጼይጎንታ
ካዎቴꬃስ፥
‹ዬ! ዬ!› ጋ ኮያዲስ። ኦሮ 10፡20
2 ማካላንቻ ዴሬታስ፥
ኢታ ኦጌራ ቢዛይታስ፥
ባንታ ዎዚና ኣሞ ካሊዛይታስ፥
ታ ኩሼ ጋላስ ኩሜꬅ ሚጫዲስ። ኦሮ 10፡21
3 ኣታኪልቴሶሆን ያርሾ ያርሺዛይቲ፥
ኡርቃፌ ሜꬌቲዳ
ያርሾሶሆታ ቦላ
ኤጻኔ ጩዋሲዛይቲ፥
ኡባ ዎዴ ታና
ሃንቄꬂዛ ዴሬታ።
4 ዱፎ ጊዶን ኡቲዛይቲ፥
ጌማሶሆን ኣቂዛይቲ፥
ጉዱንꬃ ኣሾ ሚዛይቲ፥
ኢስቲ ባንታ ኦቶታ ቱኒዳ ኣሾ
ጫምባ ኩንꬂዛይታ።
5 ኢስቲ፥ ‹ታ ጌሽ ጊዲዳ ጊሻስ
ኪቻ፤ ታ ማታ ዮፓ፤
ታኮ ሺቆፓ› ጊዛይታ።
ሃይሳ ማላ ዴሬይ
ታ ሲꬌን ጩዋ ማላኔ
ጋላስ ኩሜꬅ ኤጺዛ
ታማ ማላ።
6 «ቤኢቴ፥ ታ ሲንꬃን
ጻፌቲ ኡቲዴስ፤
ታ ጮኡ ጊኬ፤
ጊዶ ኣቲን ኢዛ ኦሶ ኦሶ ማላ
ታ ኢዛስ ኢማና፤
ኢስታ ሃኖ ማላ
ታ ኢስታስ ጪጋና።
7 ኢንቴ ናጋራ ሃሎኔ
ኢንቴ ኣዋታ ናጋራ
ሃሎ ታ ኬሳና።
ኢስቲ ዙማታ ቦላ ጹጌቲዛ
ያርሾ ሺሺዳ ጊሻስ፥
ዙምቡላታ ቦላ
ታና ጫዪዳ ጊሻስ፥
ኢስቲ ማኪዳ ሚሻን
ኢስታስ ዛሪ ማኬታና፤
ኢስቲ ካሴ ኦꬂዳ ኦሶ ኩሼ
ዛሪ ኤካና» ጌስ።
8 ጎዳይ፥ «ዎይኔ ዉርጮ ጊዶን
ኢሊሎይ ዲዛ ማላ
ኣሳይካ፥ ‹ኢዛ ጊዶን
ሎኦ ሚሺ ዲዛ ጊሻስ
ኢዛ ቃንጾፍቴ› ጊዛ ማላ፥
ታኒካ ታ ኣይሌታ ጊሻስ
ጋዳ ሄሳꬆ ኦꬃና፤
ሙሌራ ታኒ ኢስታ ꬋይሲኬ።
9 ታኒ ያቆቤ ዜሬꬃታፔኔ
ዩሁዳ ዜሬꬃፌ ታ ዙማታ
ላታናይታ ታ ኤሃና፤
ዶሬቲዳ ታ ዴሬይ
ኢስታ ላታና፤
ታ ኣሽካራቲካ ሄን ዳና።
10 ታና ሚንꬂ ኮይዛ ታ ዴሬዛስ፥
ላሻሮኔይ ዶርሳ ዉዴይ
ሄሜቲዛሶ፥
ኣኮሬ ዙሌይ ዉዴ ሜሄይ
ፔኢዛሶ ጊዳና። ኢያ 7፡24-25
11 ጊዶ ኣቲን ጎዳ ኣጊዳ ኢንቴስ፥
ታ ጌሻ ዙማ ዶጊዳ ኢንቴስ፥
‹ታ ባሶ› ጌቴቲዛ
ኤቃ ጾሳስ ሶሆ
ጊጊሲዳ ኢንቴስ፥
‹ጋዴ› ጌቴቲዛ ኤቃ ጾሳስ
ዋላኬቲዳ ዎይኔ ኡሹ
ዋንጫን ኩንꬂዳ ኢንቴስ፥
12 ታ ጼይጊን ዛሮንታ
ኢጺዳ ጊሻስ፥
ታ ዮቲን ሲዮንታ
ኢጺዳ ጊሻስ፥
ታ ሲንꬃንካ
ኢታ ኦꬂዳ ጊሻስ፥
ታና ሃንቄꬂዛ ሚሽ
ኢንቴ ዶሪዳ ጊሻስ፥
ታ ኢንቴና ማሻስ
ኣꬃ ኢማና፤
ኢንቴ ኡባይካ ሹኬታናስ
ቆꬌ ኢማና» ጌስ።
13 ሄሳ ጊሻስ፥
ኡባ ሃሪዛ ጎዳይ፥
«ቤኢቴ፥ ታ ኣሽካራቲ ማና፤
ኢንቴ ጊዲኮ ጋፋና፤
ታ ኣሽካራቲ ኡያና፤
ኢንቴ ጊዲኮ ሳሜታና፤
ታ ኣሽካራቲ ኡፋዬታና፤
ኢንቴ ጊዲኮ ዬላታና።
14 ታ ኣሽካራቲ
ዎዚናፔ ኡፋይሳን ዬጻና፤
ኢንቴ ጊዲኮ ዎዚናይ ሜቂን
ኢንቴ ዋሳና፤
ኢንቴ ኣያናይ ሜቂዳ ጊሻስ
ኢንቴ ዎ ዎ ጊዲ ዋሳና።
15 ኢንቴ ኢንቴ ሱንꬃ
ዶሬቲዳ ታ ዴሬይ
ቃንጋና ማላ ኣꬂ ኢማና፤
ኡባ ሃሪዛ ጎዳይ
ኢንቴና ዎꬋና፤
ባስ ሃጋዚዛይታስ ጊዲኮ
ኢዚ ሃራ ሱንꬅ ኢማና።
16 ሄሳ ጊሻስ ቢታይ ቦላ
ኣንጆ ኮይዛዴይ
ቱማ ጾሳ
ሱንꬃን ኣንጄታና፤
ቢታይን ጫቂዛ ኣሲ
ቱማ ጾሳ
ሱንꬃን ጫቃና፤
ካሴ ኣꬊዳ ሜቶቲ ዶጌቲዳ፤
ታ ኣይፌፔካ ጌሚዳ» ጌስ።
ኦራꬃ ሜꬌታታ
17 ጎዳይ፥ «ሄኮ፥
ታኒ ኦራꬃ ሳሎታኔ
ኦራꬃ ሳኣ ሜꬋና፤
ካሴ ኣꬊዳ ሚሻቲ
ቆፌቴቴናኔ
ሃሳኤቴቴና።
18 ጊዶ ኣቲን
ታኒ ሜꬊዛይሳን ኡፋዬቲቴ፤
ሜርናስ ሆምቦጪቴ፤
ታኒ ዬሩሳላሜ ኡፋይሳስ፥
ኢዚ ዴራካ ሆምቦጬꬃስ
ሜꬋና።
19 ታኒ ዬሩሳላሜን ኡፋዬታና፤
ታኒ ታ ዴሬዛን ሆምቦጫና፤
ሃይሳፌ ጉዬን ዬሆይኔ
ዋሶይ ሄን ሴቴቴና። ኣጁ 21፡4
20 ሃይሳፌ ጉዬን
ሄን ጉꬃ ዎዴስ
ሼምፖራ ፓጻ
ዳና ዪꬋይ ዎይኮ
ዎዴ ካሎንታ
ጪማይ ዴና፤
ጼቱ ላይꬅ ኩሚዳ ኣሲ ሃይቂኮ
ዎዴይ ጋኮንታ
ሙልቄቲ ሃይቂዳ
ኣሳ ማላ ቆዴታና፤
ኣሲ ጼቱ ላይꬅ
ኩሞንታ ሃይቂኮ
ቦሻን ሃይቂዳ ማላ
ቆዴቴስ።
21 ሄ ዎዴ ኣሳይ ኬꬅ ኬጻና፤
ኢዛንካ ዳና፤
ዎይኔ ሚꬅ ቶኪዲ
ኢዛ ኣይፌ ማና።
22 ሃይሳፌ ጉዬ ሃራ ኣሲ
ኢዛን ዳና ኬꬅ ኬጼቴና፤
ዎይኮ ሃራይ ማና
ሚሺ ቶኬቴና፤
ታ ዴራ ላይꬂ
ሚꬃ ላይꬃ ማላ ኣዱቃና፤
ታኒ ዶሪዳይቲ ባንታ
ኩሼ ኦሶን
ኣዱሳ ላይꬅ ኡፋዬታና።
23 ኢስታ ዳቡራይ ሃዳ ኣቴና፤
ቃዳ ኢታ ናካ ዬሌቴና፤
ኢስቲኔ ኢስታ ዜሬꬂ
ጎዳይ ኣንጂዳ ዴሬ ጊዳና።
24 ኢስቲ ቡሮ ታና ጼይጋናፔ
ካሴታ ታኒ ኮያና፤
ኢስቲ ታስ ዮቲ ዉርሶንታ
ታ ሲያና።
25 ካና ሱይቴይኔ ዶርሳ ላቃይ
ኢሲፌ ማና፤
ጋሞይ ቦራ ማላ
ማታ ማና፤
ሾሺ ጉዱላ ላጫና፤
ታ ጌሻ ዙማ ቦላ
ኢስቲ ቆሄቴቴና፤
ባሺካ ኢስታ ቦላ
ዬና» ጌስ። ኢሳ 11፡6-9