ያቆቤይ
ጻፊዳ ኪታ
ጊዶ ቆፋ
ሃይሲ ያቆቤ ኪታዚ ኣሲ ሃች ሃች ዳና ዱሳ ጊሻስ ዮቲዛዝ ጊዲሺን ኢዚ ጻፌቲዳይ ዱማ ዱማ ዴሬን ላሌቲ ዲዛ ታማኔ ናምኡ ኢስራኤሌ ዛርኬታሳ፤ ሄሳ ጻፊዳዴይ ኑኒ ኑ ኤራቴꬅ ኦሶን ፔይሻና ኦጌ ጊሻስ ኣማኒዛ ኣሳ ሞኮ ጊሻሲኔ ኣማሌ ሎኤꬃና ኦጌ ቤሲዛ ዮኦታ ቆንጪሲዛ ሃሳያታ ሌሚሶራ ቤሴስ። ማንቆቴꬃ ጊሻስ፥ ፓጬ ጊሻስ፥ ሎኦ ኣማሌ ጊሻስ፥ ቃንጌቴꬃ ጊሻስ፥ ኣማኖ ጊሻሲኔ ሎኦ ኦሶ ጊሻስ ኢንጻርሳ ኢታቴꬃ ጊሻሲኔ ሎኤቴꬃ ጊሻስ፥ ኣꬎ ኤራቴꬃ ጊሻስ ኢሶይ ኢሳራ ኦሻ ጊሻስ፥ ኦቶሬቴꬃ ጊሻሲኔ ኣሽኬቴꬃ ጊሻስ፥ ሃራ ኣሳ ቦላ ፒርዳ ጊሻስ፥ ጬቄቴꬃ ጊሻስ፥ ዳንዳያ ጊሻሲኔ ዎሳ ጊሻስ፥ ኣማኒዛይቲ ኦꬃናስ ቤሲዛ ሚሻታ ሁኤን ሁኤን ጻፊዴስ።
ሃ ኪታዚ ኣማኖይ ኣማኖ ዱሳን ኦሴታና ቤሲዛ ኦጌታ ሎኤꬂ ቆንጪሴስ።
ሃ ማጻፋይ ኦይኪዳ ኩሜꬃ ቆፋ
ጌሎሶ 1፡1
ኣማኖኔ ኣꬎ ኤራቴꬅ 1፡2-8
ማንቆቴꬂኔ ዱሬቴꬅ 1፡9-11
ፓጬ 1፡12-18
ጾሳ ቃላ ሲዪዲ ኦሶን ፔይሾ 1፡19-27
ኦጌይ ባይንዳ ማዶ ማዶንታ ማላ ኢሜቲዳ ቆፊሶ 2፡1-13
ኣማኖኔ ኦሶ 2፡14-26
ኣማኒዛዴኔ ኢዛ ሃሳያ 3፡1-18
ኣማኒዛዴኔ ሃይሳ ሃ ኣላሜዛ 4፡1—5፡6
ዱማ ዱማ ሃኖታ ጊሻስ ኢሜቲዳ ዞሬ 5፡7-20
1
1 ጾሳ ኦሳንቻኔ ዬሱስ ኪርስቶሳ ኦሳንቻ ጊዲዳ ያቆቤፔ ቢታ ቦላ ላሌቲዳ ታማኔ ናምኡ ኮቻታስ ሳሮቴꬂ ኢንቴስ ጊዶ። ማቶ 13፡55፤ ማር 6፡3፤ ሃዋ 15፡13፤ ጋላ 1፡19
ሜቶኔ ፓጬ
2 ታ ኢሻቶ! ኢንቴ ቦላ ዱማ ዱማ ዋዬይ ጋኪኮ ሄሳ ዉርሲ ኡፋይሳን ቆዲቴ። 3 ጋሶይካ ኢንቴ ኣማኖ ፓጬቴꬂ ኢንቴስ ዳንዳያ ኢሚዛይሳ ኢንቴ ኤሬታ። 4 ኢንቴ ዳንዳያን ሚኒ ኤቃናይሲ ኢንቴስ ኢሲ ሚሺካ ፓጮንታ ኩሜꬃ ኣሲኔ ዎሶይ ባይንዳይታ ጊዳና ማላ ኦꬆ። 5 ኢንቴ ጊዶፌ ኦናስካ ኤራቴꬂ ፓጪኮ ኦናካ ሌቆንታ ባ ኪያቴꬃራ ኡባስ ኢሚዛ ጾሳ ዎሶ፤ ኢዛዴስካ ኢሜታና። 6 ጊዶ ኣቲን ሲꬌይ ባይንዳ ኣማኖን ዎሶ፤ ጋሶይካ ሲꬊዛዴይ ኣባ ቃꬂዛ ዳምባላ ጫርኮ ማላ። 7 ሄሳዴይ ጎዳፔ ኣይኮካ ዴማና ጊዲ ቆፖፎ። 8 ሄሳዴይ ናምኡ ቆፋን ኦይኬቲዲ ባ ቢዛ ኦጌ ቦላ ያኔ ሃ ጊዛ ኣሳ ማላ።
9 ካሴ ዚቃ ዱሳን ዲዛዴ ጾሲ ꬎቁ ሂስታና ጊሻስ ኡፋዬቶ። 10 ኣሳ ዱሬቴꬂ ማታ ጪሻ ማላ ቆካና ጊሻስ ዱሳን ꬎቁ ጊዳዴይ ጾሲ ኢዛ ዚቂ ሂስቲኮ ኡፋዬቶ። 11 ኣርሼይ ጹጊዲ ማታ ሹሊሴስ፤ ማታ ጪሻይካ ሹሌስ፤ ኢዛ ሎኤቴꬂካ ꬋዬስ፤ ሄሳꬆካ ዱሬይ ሃች ሃች ዳቡርሳን ዲሺን ኢዛ ዱሬቴꬂ ꬋዬስ።
12 ፓጬን ሚኒ ኤቂዳዴይ ኢዚ ኣንጄቲዳዴ፤ ጋሶይካ ኢዚ ፓጬራ ኤቄቲሺን ጾሲ ባና ዶሲዛይታስ ኢሚዳ ሂዶታ ዴኦ ኣኪሊሌ ኢዚ ኤካና። 13 ኦኒካ ፓጬቲዛ ጊዲኮ ታና ጾሲ ፓጬስ ጎፖ፤ ጋሶይካ ጾሲ ኣሴ ኢታን ፓጬና፤ ኢዚ ኦናካ ፓጪ ኤሬና። 14 ጊዶ ኣቲን ኢሲ ኢሲ ኣሲ ፓጬቲዛይ ባርካ ባ ኢታ ኣሞ ካሊሼኔ ባሌቲሼ ፓጬቴስ። 15 ኣሞይ ቃንꬃቲዲ ናጋራ ዬሌስ፤ ናጋራይካ ዲጪዳፔ ጉዬ ሃይቆ ዬሌስ።
16 ታ ሲቆ ኢሻቶ! ኢንቴ ባሌቶፍቴ። 17 ሎኦ ኢሞቴꬂኔ ኩሜꬃ ኣንጆይ ዉሪ ቦላ ሳሎ ፖኦታ ኣዋፔ ዎꬌቴስ፤ ኢዛ ኣቻን ያኔ ሃ ዩዪዛ ኤሾይካ ዴና። 18 ኑ ኢዛ ሜꬌቴꬃስ ኮይሮ ባይራታ ጊዳና ማላ ባ ሼኔኒኔ ባ ቱማ ቃላን ኑና ዬሊዴስ።
ሲዪዳይሳ ኦሶ
19 ዶሴቲዳ ታ ኢሻቶ! ሃይሳ ዩሺ ቆፒቴ፤ ኣሲ ዉሪካ ሲያናስ ኤሶቶ፤ ሃሳያሲኔ ሃንቆስ ኤሶቶፖ። 20 ኣሳ ሃንቆይ ጾሳ ጺሎቴꬅ ኦꬄና። 21 ሄሳ ጊሻስ ቱናቴꬂኔ ዳልጊዳ ኢታቴꬂ ኢንቴፌ ኬሲ ዬጊዲ ኢንቴ ሼምፖ ኣሻናስ ዳንዳይዛ ኢንቴ ጊዶን ቶኬቲዳ ቃላ ኣሽኬቴꬃራ ኤኪቴ።
22 ቃላይ ጊዛይሳ ኦꬂቴ ኣቲን ሜላ ሲስ ጻላ ሲዪዛዴንታ ጊዲዲ ኢንቴርካ ኢንቴና ባሌꬆፍቴ። 23 ቃላ ሲዪሼ ሲዪዳ ቃላይ ጊዛይሳ ኦꬆንታዴይ ባ ኣይፌሶ ማስቶቴራ ጼሊዛ ኣሳ ማላ። 24 ባና ጼሊ ቤኢዲ ቤስ፤ ኢዚ ኣይ ሚሳቲዛኮ ሄራካ ባሌቲቼስ። 25 ጊዶ ኣቲን ባና ጌሺዛ ሎኦ ዎጋ ጼሊ ቤኢዲ ኢዛን ሚኒዛዴይ ባ ሲዪዳይሳ ኦꬂዛዴይኔ ባሎንታዴይ ኢዚ ባ ኦሶን ኣንጄቲዳዴ ጊዳና።
26 ባ ዶና ናጎንታ ባርካ ባ ዎዚና ባሌꬂሼ ታ ኣማናይስ ጊዛዴይ ባርካ ባና ባሌꬄስ፤ ኢዛ ኣማኖይካ ሃዳ ኣማኖ። 27 ጾሳ ኣዋ ሲንꬃን ኢታቴꬂ ባይንዳ ሎኦ ኣማኖይ ኣያኔ ኣዋይ ሃይቂዳ ናይታ፥ ኢስታ ኣዚናቲ ሃይቂዳ ማጫሳታ ሜቶቴቲሺን ማዶኔ ሃይሳ ኣላሜዛ ቱናቴꬃፌ ባና ናጎ።