1 ታ ኢሻቶ! ኢንቴ ቦንቼቲዳ ጎዳ ዬሱስ ኪርስቶሳ ኣማኒዛይታ ጊዲዳ ማላ ኣሴ ቤሶንታ ኦጌራ ማዶፍቴ። 2-3 ዎርቃ ዪች ቢራꬌን ኣꬂዲ ሎኦ ማይኦ ማይኢዳ ኣሲ ኢንቴ ሺቂዛሶ ዪኮ ሄሳꬆካ ቂታ ማይኦ ማይኢዳዴይ ሄ ሺቂዛሶዛ ዪኮ ቃሴካ ሃራ ቂታ ማይኦ ማይኢዳ ማንቆ ኣሲ ጌሊኮ ሎኦ ማይኢዳይሳ ዱማ ቦንቾ ቦንቺዲ፥ «ኔስ ቤሲዛ ሎኦ ኡቲዛሶ ሄሳ ቤያ» ጊዲ ሃንኮ ማንቆዛ ቃሴ፥ «ኔ ሄን ሄሳን ኤቃ፤ ዎይኮ ሃ ያ፤ ታ ጋርሳን ዉጌን ኡታ» ኢንቴ ጊኮ፥ 4 ኢንቴ ኢንቴ ጊዶን ቤሶንታ ማዶ ኦꬄታ ጊዴኬቲ? ቃሴካ ኢንቴ ኢታ ቆፋን ኦይኬቲዳ ኢታ ፒርዳ ፒርዲዛይታ ጊዴኬቲ?

5 ታ ሲቆ ኢሻቶ! ኣኔ ሲዪቴ፤ ኢስቲ ኣማኖን ዱሬታ ጊዳና ማላ ጾሲ ባና ዶሲዛይታስ ሂዶታ ኢስታስ ኢሚዳ ካዎቴꬃ ኢስቲ ላታና ማላ ሃይሳ ሃ ኣላሜዛን ዲዛ ማንቆታ ዶሪቤኔ? 6 ኢንቴ ቃሴ ማንቆታ ካዉሼታ፤ ኢንቴና ዋዪሲዛይ ዱሬታ ጊዴቴኔ? ኢንቴና ፒርዳሶ ጎቺዛይ ኢስታ ጊዴቴኔ? 7 ኢንቴናን ጼይጌቲዳ ቦንቾ ጾሳ ሱንꬅ ዚጊርዛይቲ ኢስታ ጊዴቴኔ?

8 ጌሻ ማጻፋን፥ «ኔ ላጌ ኔ ሁኤ ማላ ሲቃ» ጌቴቲ ጻፌቲዳ ካዎ ዎጋ ኢንቴ ፖሊኮ ሎኦ ኦꬄታ። 9 ኢንቴ ቤሶንታ ማዶ ማዲኮ ናጋራ ኦꬄታ፤ ዎጋ ሲንꬃንካ ኢንቴ ዎጋ ዬꬊዳዴ ጊዲ ቆዴታና። 10 ጋሶይካ ዎጋ ኡባ ፖሊዛዴይ ቃሴካ ዎጋፔ ኢሲኔይን ꬉጴቲዛ ኣሲ ኡባካ ሞሪዳዴ ማላ ቆዴቴስ። 11 «ላይማቶፓ» ጊዳዴይ ኢዚካ ዛሪዲ፥ «ዎꬎፓ» ጊዴስ። ኔ ላይማቶንታ ኣጊኮካ ኔኒ ኣስ ዎꬊኮ ዎጋፔ ኣꬊዳዴ ጊዳሳ። ኬሳ 20፡13-14፤ ዛሬ 5፡17-18 12 ኢንቴ ሃሳያ ሃሳይሼ ዎይኮ ኢሲ ሚሽ ኦꬂሼ ኢንቴና ጺሊሲዛ ኣሳ ማላ ጊዲቴ። 13 ጋሶይካ ማሮንታይ ዉሪካ ማሮይ ባይንዳ ፒርዴታና፤ ማሮይ ፒርዳ ጾኔስ።

14 ታ ኢሻቶ! ኢሲ ኣሲ ታስ ኣማኖይ ዴስ ጊኮ ቃሴ ኦሶን ቤሶንታዴ ጊዲኮ ኢዛ ኣይ ማዳኔ? ሄሳ ማላ ኣማኖይ ኢዛ ኣሻኔ? 15-16 ኣኔ ቆፒቴ፤ ኢሲ ኢሻይ ዎይኮ ኢሲ ሚቺያ ማይኦይ ዎይኮ ሚዛይሲ ባይንዳ ኣጊኮ ኢንቴፌ ኢሳዴይ፥ «ኢንቴ ሳሮን ቢቴ! ኢንቴና ሜጎፎ! ካሊቴ!» ጊኮ ኢስታ ኣሾስ ኮሺዛይሳ ኢሞንታ ኣጊኮ ኣይ ማዳኔ? 17 ሄሳꬆካ ኦሶይ ባይንዳ ኣማኖይካ ባስ ሃይቂዳይሳ።

18 ጊዶ ኣቲን ኢሳዴይ፥ «ታስ ኦሶይ ዴስ፤ ኔስ ኣማኖይ ዴስ፤ ኔኒ ኔ ኣማኖ ኦሶፔ ሻካዳ ታና ቤሳ፤ ታ ቃሴ ታ ኣማኖ ኦሶን ኔና ቤሳና» ጊኮ 19 ኔ፥ «ኢሲ ጾሲ ዲዛይሳ ኣማናሳ» ሄሲካ ሎኦ፤ ዳይዳንꬃቲካ ሄሳ ማላ ኣማኔቴሲኔ ኬሂ ኮኮሬቴስ። 20 ኔኖ ኤያዞ! ኦሶይ ባይንዳ ኣማኖስ ጎኣይ ባይንዳይሳ ኤራናስ ማርካ ኮያይ? 21 ኑ ኣዋ ኣብራሃሜይ ባ ና ዪሳቃ ያርሺዛሶዛ ቦላ ሺሺዳ ዎዴ ኦሶን ጺሊቤኔ?ሜꬌ 22፡1-14 22 ሄሳን ባ ኣማኖዛ ኦሶራ ጋꬂ ኦꬂዛይሳ ኔ ቤያሳ፤ ኣማኖይካ ኦሶን ፖሌቲዴስ። 23 «ኣብራሃሜይ ጾስ ኣማኒዴስ፤ ሄ ኣማኖይ ኢዛስ ጺሎቴꬃን ቆዴቲዴስ» ጊዛ ማጻፋ ቃላይ ፖሌቲዴስ፤ ኢዚካ ጾሲ ዶሲዳዴ ጌቴቲዴስ። ሜꬌ 15፡6፤ 2ታሪ 20፡7፤ ኢሳ 41፡8 24 ሄሳ ጊሻስ ኣሲ ኣማኖን ጻላ ጊዶንታ ኦሶንካ ጺሊዛይሳ ኢንቴ ቤዬታ።

25 ሄሳꬆካ ላይማን ዲዛ ኤራኣባ ኪቴቲ ቢዳ ኣሳታ ሞካ ኤካዳ ሃራ ኦጌራ ሞይዛ ዬዲዳ ጊሻስ ባ ኦሶን ጺላቤኬ?ኢያ 2፡1 26 ሼምፖፌ ሻኬቲዳ ኣሾይ ሃይቄꬅ ጊዲዳ ማላ ኦሶፔካ ሻኬቲዳ ኣማኖይ ሃይቄꬃ።