4
ማሬታናስ ጼይስ
1 ጎዳይ፥ «ኢስራኤሌ ኣሳዉ!
ሲሚኮ ሃ ታኮ ሲሚቴ።
ኢንቴ ሃራሲዛ ሚሻታ
ታ ሲንꬃፌ ዲጊኮ፥
ያዮንታ ሚኒ ኤቂኮ፥
2 ኢንቴ ቱማን፥
ሱሬቴꬃኒኔ ጺሎቴꬃን፥
‹ዴኦ ጎዳይ ቤዪን!›
ጊዲ ጫቂኮ፥
ሄ ዎዴ ካዎቴꬃቲ
ኢዛን ኣንጄታናኔ
ቦንቼታና» ጌስ።
3 ጎዳይ ዩሁዳ ኣሳሲኔ
ዬሩሳላሜን ዲዛይታስ፥
«ኦꬃ ጋዴ ጎዪቴ፤
ኣጉንꬃ ጊዶን ዜሮፒቴ። ሆሴ 10፡12
4 ኢንቴኖ ዩሁዳ ኣሳቶ፥
ዬሩሳላሜን ዲዛይቶ!
ጎዳስ ኢንቴ ቃጻሬቲቴ፤
ኢንቴ ዎዚና
ኢታቴꬃ ዲጊቴ፤
ሂስቶንታ ኣጊኮ
ኢንቴ ኦꬂዳ
ኢታቴꬃ ጊሻስ
ታ ሃንቆይ ታማ ማላ
ኤጺ ኬዛና፤
ኦኒካ ኢዛ ቶይሳናስ
ዳንዳዬና» ጌስ።
ፑዴሃ ባጋፌ ያና ባሽ
5 ጎዳይ፥ « ‹ቢታ ኡባን
ዛዬ ፑኒቴ!›
ጊዲ ዩሁዳን ዮቲቴ።
ዬሩሳላሜንካ ኣዋጂቴ፤
‹ኢሲፌ ሺቂቴ!
ኣኔ ጊምቤቲዳ ካታማታኮ
ባቃቶስ!› ጊ ዋሲቴ።
6 ጺዮኔ ጌላናስ ባንዲራ ኦይኪቴ!
ኤሶን ባቃቲ ኣቲቴ፤
ኣይስ ጊኮ ታኒ ፑዴሃ ባጋፌ
ሃንቆኔ ባሽ ኤሃና።
7 ጋሞይ ባ ዲዛሶፔ ኬዚዴስ፤
ካዎቴꬃታ
ꬋይሲዛይ ኪቴቲዴስ፤
ኔ ቢታዮካ ቡላሳናስ
ባ ዲዛሶፔ ኬዚዴስ፤
ኔ ካታማቲ ላሌታና፤
ኩንዲዲካ ካይዚ ኣታና።
8 ሄሳ ጊሻስ ማቃ ማይኢቴ፤
ካዮቲሼ፥ ‹ዉ! ዉይ›
ጊ ዬኪቴ።
ኣይስ ጊኮ ጎዳ ሃንቆ ሴላይ
ኑ ቦላፌ ሲሚቤና» ጌስ።
9 ቃሴካ ጎዳይ፥
«ሄ ጋላስ ካዎ ዎዚናይኔ
ሹሜታ ዎዚናይ ታሃና፤
ቄሴቲ ዳጋማና፤
ናቤቲካ ኮኮራና» ጌስ።
10 ሂስቲን ታኒ፥ «ኣቤት ኡባ ሃሪዛ ጎዳዉ! ማሻይ ኢስታ ቆꬌን ዎꬊን፥ ‹ኢንቴስ ሳኣይ ሳሮ ጊዳና› ጋዳ ሃ ኣሳኔ ዬሩሳላሜ ኣይስ ኬሃ ባሌꬃዲ?» ጋዲስ።
11 ሄ ዎዴን ሃ ኣሳሲኔ ዬሩሳላሜስ፥ «ባዞን ዲዛ ኣይኮይ ባይንዳ ዙምቡላታፔ ጹጊዛ ጫርኮይ ታ ዴራ ቦላ ጫርካና፤ ጊዶ ኣቲን ሄሲ ካꬅ ሱራጋናሲኔ ጌሻናስ ጊዴና።
12 ሄሳፌካ ኬሂ ዎልቃሚዛ ጫርኮይ ታ ኣዛዞን ጫርካና፤ ሃኢ ታኒ ኢስታ ቦላ ፒርዳና» ጌቴቲ ዮቴታና።
ሞርኬን ዩሁዳ ዶዴቴꬅ
13 ቤኢቴ! ሞርኬይ ሻራ ማላ
ቢታ ኩሚዴስ፤
ኢዛ ፓራ-ጋሬቲካ
ጎቴ ጫርኮ ማላ ዬቴስ፤
ኢዛ ፓራቲካ
ጎሌ ካፎታ ማላ ኤሶቴቴስ፤
ኣዬ ኣና ኑ ꬋያና ጎስ!
14 ኔኖ ዬሩሳላሜ!
ኔ ኣታና ኮይኮ ኔ ዎዚና
ኢታቴꬃ ሜጬታ፤
ኢታ ቆፋይ ኔ ዎዚናን
ኣይዴ ጋካናስ ጋምኣኔ?
15 ጬንጉርሲ ዳኔፔ ሴቴቴስ፤
ኤፍሬሜ ዙማታ ቦላ
ባሺ ኣዋጄቴስ።
16 «ካዎቴꬃታስ ዮቲቴ፤
ዬሩሳላሜስካ፥
‹ዶዲ ኡንኤꬂዛይቲ
ሃሆ ቢታፌ ያና፤
ዩሁዳ ካታማታ
ቦላካ ጬቄታና፤
17 ኢዛ ታ ቦላ ማካሊዳ ጊሻስ
ካꬅ ናጊዛ ኣሳ ማላ
ኢስቲ ዩሁዳ ጊዶꬃና› ጊቴ።
18 ኔ ሃኖይኔ ኔ ኦሶይ
ሄሳ ኔ ቦላ ኤሂዴስ፤
ሄሲ ኔስ ቂጻቴ፤
ሄሲካ ኣይ ማላ ጫሚዛዜ!
ኣይ ማላ ዎዚና ሜንꬂዛዜ!»
ጌስ ጎዳይ።
19 ዋኖ ታኒ!
ታኒ ሃይሳ ዎስታ ዳንዳያኔ!
ታና ሜቲዴስ!
ታ ዎዚናይ ሂርጌስ፤
ታኒ ጮኡ ጋናስ ዳንዳይኬ።
ኣይስ ጊኮ ታኒ ዛዬ
ጬንጉርሲኔ
ኦላ ጬንጉርስ ሲያዲስ።
20 ኢታ ሚሺ ኢታ ሚሽ ካሌስ፤
ሙሌ ቢታይ ሞሬቲዴስ፤
ታ ዱንካኔቲኔ ማጋላሻቲ
ኤሶን ꬋይዳ።
21 ታኒ ኣይዴ ጋካናስ
ኦላ ማላታ ጼላኔ?
ታ ኣይዴ ጋካናስ
ዛዬ ጊሪስ ሲያኔ?
22 ጎዳይ፥ «ታ ኣሳይ ኤያ፤
ኢስቲ ታና ኤሬቴና።
ኢስቲ ዩሺ ቆፖንታይታ፤
ኢስቲ ኣኬካይ ባይንዳይታ፤
ኢስቲ ኢታ ሚሽ
ኦꬃናስ ኤራንቻታ፤
ሎኦ ኦꬃናስ
ኤራይ ፓጪዳይታ» ጌስ።
23 ታኒ ሳኣ ጼላዳ ሳኣይ
ሎኢ ጊጎንታይሳኔ
ጮ ሜላ ዲዛይሳ ቤኣዲስ።
ቃሴ ሳሎታ ጼላዳ ኢስታን
ፖኦይ ባይንዳይሳ ቤኣዲስ።
24 ታኒ ዙማታ ጼላዳ
ኢስቲ ኮኮሪሺኒኔ
ዙምቡላቲ ኡባይ
ዮንኢዮንኢሺን ቤኣዲስ።
25 ታኒ ጼላዲስ ሺን
ኣይ ኣሲካ ቤኣቤኬ፤
ሳሎ ካፎቲካ ኡባይ
ፒራꬊዲ ꬋይዳ።
26 ኣራዳ ቢታይ
ባዞ ጊዲዳይሳ ቤኣዲስ፤
ጎዳ ሲንꬃን፥
ኢዛ ሱሌ ሃንቆ ሲንꬃን
ሄ ካታማቲካ ላሌቲዳ።
27 ጎዳይ፥ «ሙሌ ቢታይ ቡላታና፤
ጊዶ ኣቲን ታኒ ኢዞ
ሙሌራ ꬋይሲኬ።
28 ሄሳ ጊሻስ ሳኣይ ዬካና፤
ሳሎይካ ꬉማና።
ኣይስ ጊኮ ታኒ ጋዲስ፤
ሄ ቆፋ ታ ላሞንታ ማላ
ቃቻዲስ» ጌስ።
29 ፓራ ኣሳታኔ ዎንዳፌ
ኣሳታ ካቻ ጋሶን
ኣሳይ ካታማ ኡባፌ ባቃታና።
ባጋይ ዎጺዲ ዎራ ጋርስ ጌላና፤
ባጋይ ቃሴ
ዛላ ቦላ ኬዛና፤
ካታማይ ኡባይ ኣሲ ባይንዳ
ካይዚ ኣታና።
30 ሃኔ ባሻስ ኡቲዳሬ!
ኔኒ ኣይ ኦꬃይ?
ኔ ዞኦ ማይኦ ኣይስ ማይኣይ?
ዎርቃ ኣሌቆካ ኣይስ ኣꬃይ?
ኔ ኣይፌ ጪሮ ኣይስ ቲያይ?
ኔኒ ጮ ሜላ
ኔና ሎኤꬃሳ፤
ኔ ላጌꬆቲ ኔና ካꬊዳ፤
ኢስቲ ኔና ዎꬋናስ ኮዬቴስ።
31 ታኒ ኮይሮ ባይራ ና ዬላናስ
ሚጻቲዛ ማጫሳ ማላ
ኔ ዋሲሺን ታ ሲያዲስ፤
ዬሩሳላሜ ማጫ ናያ
ፔኖይ ቱጬታናሼ
ጋካናስ ዋሲሺኒኔ
ባ ኩሼ ሚጫዳ፥
«ታ ዋኖ! ሄኮ ታና
ዎꬋና ጌቴስ!»
ጊሺን ሲያዲስ።