5
ዬሩሳላሜ ኣሳ ናጋራ
1 ጎዳይ፥ «ኣኔ ዬሩሳላሜ ኦጌታ ቦላ ኬዚዲ
ፑዴኔ ዱጌ ዩሺ
ጼሊቴኔ ኣኬኪቴ፤
ዴሬይ ዱላቲዛሶታን
ጺሎቴꬅ ኮይዛይኔ
ሱሬ ፒርዲዛ ኬዚዲ
ኢንቴ ኢሳዴካ ዴሚኮ
ታኒ ዬሩሳላሜ ማራና።
2 ጊዶ ኣቲን ኢስታስ፥
‹ጎዳይ ቤዪን› ጊ ጫቂኮካ
ኢስቲ ቱማፔ
ዎርዶ ጫቄቴስ» ጌስ።
3 ኣቤት ጎዳዉ!
ኔ ኣይፌቲ ቱማ ጼሌቴኔ?
ኔኒ ኢስታ ሾጫዳሳ ሺን
ኢስታ ሳኪቤና።
ኔኒ ኢስታ ኪንቼሬꬃዳሳ፤
ጊዶ ኣቲን
ኢስቲ ሲሚቤቴና፤
ኢስቲ ባንታ ዎዚና
ሹቻፌ ኣꬂ ሚንꬂዳ፤
ባንታ ናጋራፔካ
ሲሞንታ ኢጺዳ።
4 ሄሳፌ ጉዬ ታኒ ታ ዎዚናን፥
«ሃይቲ ማንቆታኔ ኤያታ፤
ሄይቲ ጎዳ ኦጌኔ
ባንታ ጾሳ ዎጋ ኤሮንታይታ።
5 ሄሳ ጊሻስ ታኒ
ጊታ ኣሳታኮ ባና፤
ኢስታስካ ዮታና፤
ጋሶይካ ጎዳ ኦጌኔ
ባንታ ጾሳ ዎጋ ኤሬቴስ»
ጋዳ ቆፓዲስ።
ጊዶ ኣቲን ኢስቲ ኡባይካ
ኢሲፌ ኢዛ ቃምባራ ሜንꬂዳ፤
ቃሾዛካ ዱꬂዳ።
6 ሄሳ ጊሻስ ጋሞይ
ዎራፔ ኬዚዲ
ኢስታ ሜንꬄሬꬃና፤
ኢስታ ፑዜሬꬃና፤
ማሄይ ኢስታ ካታማታ ዩሾ
ዛማዲ ናጋና።
ሄ ካታማታፔ ኬዚዛ ኡባ
ኢዚ ፑዛና።
ጋሶይካ ኢስታ
ማካላቴꬂኔ
ካዶይ ዳሪዴስ።
7 ጎዳይ፥ «ታኒ ኢንቴ ናጋራ
ኣይስ ኣቶ ጎ?
ኢንቴ ናይቲ ታና ኣጊዳ፤
ኤቃ ጾሳታንካ ጫቂዳ፤
ታኒ ኢስታ ካልሳ ሚዛዲስ፤
ኢስቲ ጊዲኮ ላይማቲዳኔ
ላይማ ኬꬅ ቢዳ።
8 ኢስቲ ꬊኬቲዳ
ኮርማ ፓራ ማላ ጊዲዳ፤
ኢስቲ ኢሶይ ኢሶይ
ኣሳ ማቾ
ላጌꬃናስ ካሊዳ።
9 ቱሙፔ ታኒ ሃ ዮኦታ ጊሻስ
ኢስታ ቃጻያናስ ቤሴኔ?
ታኒ ታ ሁኤራ
ሄሳ ማላ ካዎቴꬃ ቦላ
ሃሎ ኬሳና ቤሴኔ?» ጌስ።
10-11 ቃሴካ ጎዳይ፥
«ዎይኔ ቱራ ጊዶ ቢዲ
ኢዛ ሞሪቴ፤
ጊዶ ኣቲን ሙሌራ ꬋይሶፍቴ።
ኢስቲ ጎዳስ ጊዶንታ ጊሻስ
ኢዚ ሃጋታ ታርሺ ታርሺ ዬጊቴ፤
ኢስራኤሌ ኣሳይኔ
ዩሁዳ ኣሳይ ሙሌራ
ታና ካዲዳ» ጌስ።
12 ኢስቲ ጎዳ ቦላ ዎርዶ ሃሳይዳ፤
«ኢዚ ኑና ኣይኮካ ኦꬄና፤
ኢታ ሚሺካ
ኑ ቦላ ጋኬና፤
ኦላኔ ኮሻ
ኑኒ ሙሌካ ቤኦኮ።
13 ናቤቲ ጫርኮ ማላ ኣቲን
ኢስታ ጊዶን ቃላይ ዴና፤
ኢስቲ ጊዛዚ ኡባይ
ኢስታ ቦላ ጋኮ» ጌቴስ።
14 ሄሳ ጊሻስ ጎዳይ
ኡባፌ ዎልቃማ ጾሳይ፥
«ኢስቲ ሃ ቃላ ሃሳይዳ ጊሻስ
ታኒ ታ ቃላ
ኔ ዶናን ታማ ኬሳና።
ሃ ኣሳካ ሚꬅ ኬሳና፤
ታማይካ ኢስታ
ሚ ꬋይሳና» ጌስ።
15 ጎዳይ ኢንቴና፥
«ኢንቴኖ ኢስራኤሌ ኣሳቶ!
ታኒ ኢንቴ ቦላ ሃሆ ቢታፌ
ኢሲ ካዎቴꬅ ኤሃና።
ኢዚ ዎልቃማኔ
ቤኒሶፌ ዲዛ ካዎቴꬃ።
ኢዛ ቃላይ ኢንቴስ ኤሬቴና፤
ኢዛ ሃሳያይ ኢንቴስ ጌሌና።
16 ኢስታ ማሻ ኮሆይ ዶያ ዲዛ
ዱፎ ማላ፤
ኢስቲ ኡባይካ ዎልቃማ
ኦላንቻታ።
17 ኢስቲ ኢንቴ ካꬃኔ
ቁማ ፒቲ ማና።
ኢንቴ ኣቱማ ናይታኔ
ማጫ ናይታ ዎꬋና።
ኢንቴ ዶርሳኔ ሚዛ
ቦንቂዲ ማና።
ኢንቴ ዎይኔ ቴራኔ
ባላሴ ቴራ
ቦንቂዲ ማና።
ኢንቴ ኣማኔቲዛ ጊምቤቲዳ
ካታማታካ ኢስቲ ባንታ
ማሻን ꬋይሳና» ጌስ።
18 ጎዳይ ኤርማሳ፥ «ጊዶ ኣቲን
ሄ ጋላሳታን
ታኒ ኢንቴና ሙሌራ ꬋይሲኬ።
19 ኣሳይ ኔና፥ ‹ኑ ጎዳ ኑ ጾሳይ
ኑ ቦላ ሃይሳ ኡባ
ኣይስ ኦꬂዴ?›
ጊዲ ኦይቺዛ ዎዴ
ኔኒ ኢስታስ፥ ‹ኢንቴ ታና ጎዳ
ኣጊዲ ኢንቴ ቢታን
ኣላጋ ጾሳታስ ኦꬂዳ ማላ፥
ኢንቴካ ኣሳ ቢታን ኣላጋታስ
ሄሳꬆ ኦꬃና› ጋ» ጊዴስ።
20 ቃሴካ ጎዳይ፥
«ሃይሳ ያቆቤሶ ኣሳታስ ዮታ፤
ዩሁዳ ቢታንካ ሂዝጋ ኣዋጃ፤
21 ኢንቴኖ ኣይፌይ ዲሺን
ዴሞንታይቶ!
ሃይꬂ ዲሺን ሲዮንታይቶ!
ኤያኔ ዩሺ ቆፖንታይቶ!
ሃይሳ ሲዪቴ!ኢሳ 6፡9-10፤ ሂዚ 12፡2፤ ማር 8፡18
22 ኢንቴ ታስ ያያናስ ቤሴኔ?
ኢንቴ ታ ሲንꬃን
ኮኮራናስ ቤሴኔ?
ኣይስ ጊኮ ኢዚ ሜርናስ
ካንꬂ ቦንታ ማላ፥
ታኒ ኣንጮ ኣባስ ዛዋ ኦꬃዲስ።
ዳምባላይ ቡላኬቲኮካ
ዛዋፔ ኣꬌና፤
ኢዚ ጉሚኮካ
ፒናናስ ዳንዳዬና። ኢዮ 38፡8-11
23 ጊዶ ኣቲን ሃ ዴራስ ሙሜኔ
ማካላ ዎዚናይ ዴስ፤
ኢስቲ ኦጌ ኣጊ ዎራ ቢዳ።
24 ኢስቲ ባንታ ዎዚናን፥
‹ኑስ ሲላ ኢራኔ ጋባ ኢራ
ዎዴን ዎዴን ቡኪሲዛ፥
ካꬃ ሺሾ ዎዴ
ኑስ ዎዴራ ኤሂዛ ጎዳ
ኑ ጾሳስ
ኣኔ ያዮስ› ጊቤቴና።
25 ‹ኢንቴ ኢታ ኦሶይ
ሃይታ ኢንቴና ዲጊዴስ።
ኢንቴ ናጋራይ ኢንቴና
ሎኦ ሚሻፌ
ኣሺዴስ› ጋ» ጌስ።
26 ጎዳይ፥ «ታ ኣሳ ጊዶን
ኢታ ኣሳቲ ዴቴስ።
ካፎታ ኦይካናስ
ናጊዛ ኣሳ ማላ
ኢስቲ ዎጺማዴ ዎꬂዲ
ኣሳ ኦይካናስ ናጌቴስ።
27 ካፎ ኬꬃን ካፎይ ኩሚዳ ማላ
ኢስታ ኬꬃን
ባሌꬆይ ኩሚዴስ።
ሄሳ ጊሻስ ኢስቲ
ዱሬኔ ዎልቃማ ጊዲዳ።
28 ኢስቲ ኦርዲዳኔ ሞꬊዳ፤
ኢስታ ኢታቴꬃስ ዛዋይ ዴና።
ዪኦቲ ሱሬ ፒርዳ ዴማና ማላ
ኢስታስ ኤቂቤቴና፤
ማንቆታ ማታ ጊሻሲካ
ሞቴቴቴና።
29 ሂስቲን ታኒ ሃይታ
ሃ ዮታ ጊሻስ፥
ኢስታ ቃጻያናስ ቤሴኔ?
ሄሳ ማላ ካዎቴꬃ ቦላ
ታ ሃሎ ኬሳናስ
ቤሴኔ?» ጌስ።
30 ቃሴካ ጎዳይ፥
«ዳሮ ባቢሲዛ ሚሺኔ
ዳጋንꬂዛ ሚሺ
ቢታ ቦላን ሃኒዴስ።
31 ናቤቲ ዎርዶ ቲንቢቴ ዮቴቴስ፤
ቄሴቲካ ኢስታ ዞሬን ኣይሴቴስ።
ታ ኣሳይካ ሄሳ ማላ
ሚሽ ዶሴስ!
ሂስቲን ዉርሴꬃን
ኢንቴ ኣይ ኦꬃኔ?» ጌስ።