6
ዬሩሳላሜይ ሞርኬታን ዶዴቴꬅ
1 ጎዳይ፥ «ኢንቴኖ ቢኒያሜ ዛሬቶ!
ፑዴሃ ባጋፌ ኢታ ሚሺኔ
ባሺ ያና ጊዛ ጊሻስ
ኢንቴ ሼምፖ
ኣሻናስ ባቃቲቴ!
ዬሩሳላሜፔ ኬዚቴ!
ቴቁሄ ካታማን ዛዬ ፑኒቴ!
ቤቲ-ሃካሪሜን ማላታ ቤሲቴ!
2 ታኒ ማላ ሎኦኔ
ኡፋይሲዛ ጺዮኔ
ናዮ ꬋይሳና።
3 ሄንꬃንቻቲ
ባንታ ዉዴ ኤኪዲ
ኢዚ ቦላ ያና፤
ሂስቲዲ ኢዚ ዩሾን
ባንታ ዱንካኔ ቶካና፤
ባንታ ዉዴ ባንታ
ሶሆን ሶሆን ሄማና።
4 ኢስቲ ኢሶይ ኢሳ፥ ‹ዬሩሳላሜራ
ኦሌታናስ ጊጌቲቴ! ዴንዲቴ!
ኣኔ ኑኒ ኢዞ ሴታ ጋላስ ኦሎስ።
ጊዶ ኣቲን ኣዬ ኣና!
ሳኣይ ቃሜስ፤
ኦማርሳ ኩዋይ
ኣዱቂ ኣዱቂ ቤስ።
5 ሄሳ ጊሻስ ዴንዲቴ!
ኣኔ ኦማርስ ኦሎስ፤
ሂስቲዲ ኢዚ ሚጻካ
ኣኔ ላሎስ›
ጊዲ ማቄቲዳ» ጌስ።
6 ኡባፌ ዎልቃማ ጎዳይ፥
«ሚꬃታ ቃንጺቴ።
ዬሩሳላሜ ጊምቤ ላንቄን
ቢታ ዶሪቴ፤
ሃ ካታማይን ቆሆይ
ኩሚዳ ጊሻስ
ኢዚስ ቂጻቴይ ቤሴስ።
7 ኦላፌ ሃꬂ ፑልቲዛ ማላ ኢዛካ
ባ ኢታቴꬃ ፑልቲሳዉስ፤
ማካላ ሚሺኔ
ባሻ ሚሺ
ኢዚ ጊዶን ሴቴቴስ፤
ኡባ ዎዴ ኢዚ ሳኮይኔ
ማዱንꬂ ታስ ቤቴስ።
8 ሃኔ ዬሩሳላሜ ናጌታ፤
ኔ ኣካይ ጊኮ
ታ ኔፔ ሻኬታና፤
ቃሴ ኔ ቢታካ
ቡላሳና» ጌስ።
ኢስራኤሌ ኣሳ ማካላቴꬅ
9 ኡባፌ ዎልቃማ ጎዳይ፥
«ዎይኔ ቴራ ኢሲኖካ
ኣሾንታ ማጺዛ ማላ
ኢስራኤሌ ኣሳፔ
ኣቲዳይታ ሄሳꬆካ
ማጺ ሺሺቴ።
ዎይኔ ቴራ ማጺዛ ኣሳ ማላ
ኢንቴ ኩሼ ሃጋታ ጊዶ
ናምኣንꬆካ ዬዲቴ» ጌስ።
10 ታኒ ኦናስ ዮቶ?
ኦና ሴሮ?
ኦኒ ታ ጊዛዝ ሲያኔ?
ሄኮ ኢስታ ሃይꬂ
ቱሌ ጊዲዳ ጊሻስ
ኢስቲ ሲዬቴና፤
ጎዳ ቃላይ
ኢስታስ ቂꬌስ ኬዚዴስ፤
ኢስቲ ኢዛን ኡፋዬቴቴና።
11 ሄሳ ጊሻስ ጎዳ ሃንቆይ
ታናን ኩሚ ኡቲዴስ፤
ታኒ ሃ ሃንቆዛ
ታ ኡሎን ኦይካና ዳንዳይኬ።
ሂስቲን ጎዳይ ታና፥
«ታ ሃንቆዛ ኦጌን ዲዛ
ጉꬃ ናይታ ቦላኔ
ሺቂዳ ዬላጋ ናይታ ቦላ ጉሳ፤
ማቻኔ ኣዚናይ፥
ጪሚዳ ኣሳቲካ
ኬሲ ኤኪ ኣቴቴና።
12 ታኒ ሄ ቢታን ዲዛይታ ቦላ
ታ ኩሼ ዬዲዛ ዎዴ
ኢስታ ኬꬃቲ፥ ኢስታ ጋዴቲኔ
ኢስታ ማቼቲካ ኣቶንታ
ኡባይ ሃራታስ ጊዳና» ጌስ።
13 ቃሴካ ጎዳይ፥
«ጉꬃይካ ጊታይካ
ኡባይ ባ ጎኣስ ዪቄቴስ።
ናቤቲኔ ቄሴቲ ኡባይ
ኣስ ባሌꬄቴስ።
14 ኢስቲ ታ ዴራ ማዱንꬃ
ቄሪ ሚሻ ማላ ጼሊዳ፤
ፓጻና ማላ ኮሺዛ
ኦሶ ኦꬂቤቴና፤
ሳሮይ ባይንዳ፥
‹ሳሮ፤ ሳሮ› ጌቴስ። ሂዚ 13፡10
15 ሃ ሃራሲዛ ኦሶዛ ጊሻስ
ኢስቲ ዬላቲዶ?
ኣካይ ሙሌካ ዬላቲቤቴና፤
ኢስቲ ዬላይ ኣዛኮ ኤሬቴና።
ሄሳ ጊሻስ ኢስቲ ኩንዲዛይታራ
ኢሲፌ ኩንዳና፤
ታኒ ኢስታ ቃጻዪዛ ዎዴ
ኢስቲ ካዉያና» ጌስ። ኤር 8፡10-12
16 ጎዳይ፥ «ዳጋላ ኦጌ ቦላ
ኤቂ ጼሊቴ፤
ቤኒ ኦጌዮ ኦይቺቴ፤
ሎኦ ኦጌይ ኣዋሪ? ኢዚራ ቢቴ፤
ኢንቴ ኢንቴ ሼምፖስ
ሼምፖ ዴማና፤
ኢንቴ ጊዲኮ፥
‹ኑ ኢዚራ ቦኮ!› ጊዴታ። ማቶ 11፡29
17 ታ ኢንቴና ናጊዛይታ ዎꬃዲስ፤
‹ዛዬይ ፑኔቲሺን ሲዪቴ› ጋዲስ፤
ኢንቴ ጊዲኮ፥
‹ኑኒ ሲዮኮ› ጊዴታ።
18 ሄሳ ጊሻስ ካዎቴꬃቶ፥ ሲዪቴ!
ኢንቴኖ ማርካቶ!
ኢስታ ቦላ ኣዚ
ጋካናኮ ኣኬኪቴ።
19 ቢታዬ ሲያ!
ኢስቲ ታ ቃላ
ሲዮንታ ኢጺዳ ጊሻሲኔ
ታ ዎጋካ ካꬊዳ ጊሻስ
ታኒ ዴራ ቦላ
ኢስታ ኢታ ቆፋ ማላ ባሽ ኤሃና።
20 ኤጻኔይ ሳባ ቢታፌ
ሳዊዛ ቂማሜይ
ሃኮ ቢታፌ ዪኮ
ታና ኣይ ጋኔ?
ጹጌቲዛ ኢንቴ ያርሾዛካ
ታ ኤኪኬ፤
ኢንቴ ሺሺዛ ሃራ ያርሾይካ
ታና ኡፋይሴና» ጌስ።
21 ሄሳ ጊሻስ ጎዳይ፥
«ታኒ ሃ ዴራ ሲንꬃን
ꬉጲዛ ሚሽ ዎꬃና፤
ኣዋቲኔ ኣቱማ ናይቲ
ኢዛን ꬉጴታና፤
ሾሮቲኔ ላጌቲ
ꬋያና» ጌስ።
ፑዴሃ ባጋፌ ዎራጂዛ ኦላንቻታ
22 ቃሴካ ጎዳይ፥
«ሄኮ ፑዴሃ ባጋፌ
ኦላንቻቲ ዬቴስ፤
ጊታ ካዎቴꬂ ሳኣ ጋጻፔ
ዴንꬃ ቦላ ዴስ።
23 ኢስቲ ዎንዳፌኔ ቶራ ኦይኪዳ።
ኢስቲ ሜንጼ ኢታታኔ
ቃꬌታይ ባይንዳይታ፤
ኢስቲ ባንታ ፓራታ ቶጊዛ ዎዴ
ኣባይ ጉሚዛ ማላ
ጉሜቴስ።
ኢንቴኖ ጺዮኔ ማጫ ናይቶ!
ኢስቲ ጊጌቲዲ ኢንቴና
ኦላናስ ዬቴስ» ጌስ።
24 ኑኒ ሄ ዮኦ ሲዪን
ኑ ቄሴይ
ኪምኢሊሽ ጊዴስ።
ማጫስ ሚጻይ ኦይኪዳ ማላ
ኑና ጬጬይ ኦይኪዴስ።
25 ሞርኬይ ማሻ ጊጺዴስ፤
ኡባሶን ሺሮይ ኩሚዴስ፤
ሄሳ ጊሻስ ካሬ ኬዞፒቴ፤
ኦጌንካ ሄሜቶፍቴ።
26 ታ ዴሬቶ ማቃ ማይኢቴ፤
ቢዲንꬃ ቦላ ቡሉሌቲቴ፤
ሜጺ ኢሲ ናይ ሃይቂዳ ኣሳ ማላ
ጫሞ ዬሆ ዬኪቴ፤
ጋሶይካ ኑ ቆፖንታ ዲሺን
ꬋይሲዛይ ኑ ቦላ ያና።
27 ጎዳይ ኤርማሳ፥ «ኤርማሳ!
ቢራታ ፓጪዛዴ ማላ
ኔኒ ታ ዴሬዛ ኦጌኔ
ኢስታ ሄሜታ ፓጫና ማላ
ታ ኔና ዎꬃዲስ፤
28 ኢስቲ ኡባይ ዚጊርሼ ዩዪዛይታኔ
ዮቲን ኤኮንታ
ማካላንቻታ፤
ኢስቲ ጻርቂማላ ማላኔ
ቢራታ ማላ፤
ኢስቲ ኡባይካ ሞሮ ኦꬂዛይታ።
29 ቢራታ ሴሪሳናስ ዎምፒና
ሎኤꬃ ፑና፤
ጊዶ ኣቲን ኢታቲ ሙሌራ
ፒቴቲ ኬዞንታ ጊሻስ
ሄሲ ጮ ሃዳ ዳቡራ።
30 ጎዳይ ኢስታ ካꬊዳ ጊሻስ
ኢስቲ ካꬌቲዳ ቢራ
ጌቴቲ ጼይጌታና» ጌስ።