1 ጎዳይ ኤርማሳስ፥ «ባዳ ማናፔ ጎምቦ ሻማ፤ ሂስታዳ ኔናራ ዴሬ ጪማታፔኔ ቄሴታፔ ጉꬃታ ኤካዳ፥ 2 ኮንኣ ሜቆ ፔንጌ ኣቻራ ኣꬋዳ ሄኖሜ ና ሾባ ባ፤ ሄን ታኒ ኔስ ዮቲዛ ቃላ ኣዋጃ። 2ካዎ 23፡10፤ ኤር 7፡30-32፤ 32፡34-35 3 ‹ኢንቴኖ ዩሁዳ ካዎቶ! ዬሩሳላሜን ዲዛ ዴሬዞ! ጎዳ ቃላ ሲዪቴ! ኡባፌ ዎልቃማ ጎዳ ኢስራኤሌ ጾሳይ፡ ሲያናስ ሃይꬃስ ኢቲዛ ሚሽ ሃ ቢታ ቦላ ታኒ ኤሃና። 4 ጋሶይካ ኣሳይ ታና ኣጊዲ ሃይሳ ሃ ሶሆዛ ኤቃ ጎይኒዛሶሆ ኬሲዴስ፤ ኢስቲ ጊዲን ዎይኮ ካሴ ኢስታ ኣዋቲ፥ ዎይኮ ዩሁዳ ካዎቲ ኤሮንታ ኤቃ ጾሳታስ ያርሺዳ፤ ሃይሳ ሃ ሶሆዛን ጺሎ ሱꬅ ጉሲዳ። 5 ቃሴ ታኒ ኢስታ ኣዛዞንታይሳ፥ ዎይኮ ኢስታስ ዮቶንታይሳ፥ ዎይኮ ታ ዎዚናን ቆፖንታይሳ ባንታ ኣቱማ ናይታ ባኣሌስ ታማን ጹጊ ያርሻናስ ጎይኒዛሶሆ ዙምቡላታ ኦꬂዳ።ሌዌ 18፡21 6 ሄሳ ጊሻስ ኣሳይ ሃ ሶሆዛ ሹካ ሾባ ጋናፔ ኣቲን ቶፌቴ ዎይኮ ሄኖሜ ና ሾባ ጊ ጼይጎንታ ዎዴይ ያና።

7 « ‹ሃ ሶሆን ዩሁዳ ሃልቾኔ ዬሩሳላሜ ሃልቾ ታ ላላና፤ ኢስቲ ባንታ ሞርኬታ ማሻኒኔ ባንታና ዎꬋናስ ኮይዛይታ ኩሼን ሃይቃና ማላ ታኒ ኦꬃና፤ ኢስታ ኣሃ ሳሎ ካፎታሲኔ ዎራ ዶኣታስ ቁማ ሂስታ ኢማና። 8 ታኒ ሃ ካታማዮ ሙሌራ ꬋይሳና፤ ሚቻስካ ኬሳና፤ ኢዚ ማታራ ኣꬊዛ ኣሳይ ኡባይ ሃኖ ፓላ! ጊ ቂꬊ ካኣና። 9 ኢስቲ ባንታ ማጫ ናይታ ኣሾኔ ባንታ ኣቱማ ናይታ ኣሾ ማና ማላ ታኒ ኦꬃና፤ ኢስታ ዎꬋናስ ኮይዛ ኢስታ ሞርኬቲ ኢስታ ጊዶꬂን ኢስቲ ኡባይ ኢሶይ ኢሳ ኣሾ ማና› ጌስ።

10 «ሄሳፌ ጉዬ ኔናራ ኢሲፌ ቢዳ ኣሳታ ሲንꬃን ሄ ጎምቦዛ ሜንꬃ። 11 ሂስቲዲ ኢስታስ ኡባፌ ዎልቃማ ጎዳ ጾሳይ፥ ‹ማናዛ ጎምቦይ ሜቂዳይሳꬆኔ ሲሚ ኮሌታና ዳንዳዮንታይሳꬆ ታኒ ሃ ካዎቴꬃኔ ሃ ካታማ ሄሳꬆ ኦꬃና፤ ኣሳይ ኣሃ ሞጊዛሶይ ባይንዳ ጊሻስ ቶፌቴን ሞጋና። 12 ታኒ ሃ ሶሆዛኒኔ ኢዛን ዲዛ ኣሳ ቦላ ሄሳꬆ ኦꬃና፤ ታኒ ሃ ካታማዮ ቶፌቴ ማላ ኦꬃና። 13 ባንታ ኬꬃ ካራ ቦላ ሳሎ ሜꬌቴꬃታስ ኤጻኔ ጩዋሲዲኔ ኤቃ ጾሳታስ ኡሹ ሺሺዳይቲ ዬሩሳላሜ ኣሳ ኬꬃቲኔ ዩሁዳ ካዎታ ኬꬃቲ ቶፌቴ ማላ ቱናና› ጌስ። *ኬꬃ ካራ ቦላ ኤጻኔ ጩዋሶይ ኢስራኤሌ ኣሳይ ባ ኬꬃ ቦላ ፖቄ ማላ ኦꬂዲ ያርሾ ሺሺዛ ዎጋ።

14 «ሄሳፌ ጉዬ ኤርማሲ ጎዳይ ቲንቢቴ ዮታናስ ኪቲዳ ቶፌቴፔ ሲሚ ዪዲ ጎዳ ኬꬃ ዱቡሻን ኤቂዲ፥ 15 ኡባፌ ዎልቃማ ጎዳ ኢስራኤሌ ጾሳይ፥ ‹ሲዪቴ! ኢስቲ ባንታ ዎዚና ሹቻሲዲ ታ ቃላ ሲዮንታ ኢጺዳ ጊሻስ ታኒ ሃ ካታማ ቦላኔ ኢዛ ማታን ዲዛ ሞꬃታ ኡባ ቦላ ኤሃና ጊዳ ኢታ ሚሽ ኡባ ኢስታ ቦላ ኤሃና ጋይስ› ጌስ» ጊዴስ።