47
ፊሊስጼሜ ጊሻስ ዮቴቲዳ ኪታ
1 ፓሮኔይ ጋዛ ኦሊ ኦይካናፔ ካሴ ፊሊስጼሜታ ጊሻስ ጎዳፔ ኤርማሳኮ ዪዳ ቃላይ ሃይሳፌ ካሊ ዲዛይሳ። ኢሳ 14፡29-31፤ ሂዚ 25፡15-17፤ ኢዩ 3፡4-8፤ ኣሞ 1፡6-8፤ ሶፎ 2፡4-7፤ ዛካ 9፡5-7
2 ጎዳይ፥ «ቤኢቴ፥ ፑዴሃ ባጋን
ሃꬂ ኩሚ ኩሚ ቤስ፤
ዎልቃማ ዲኦ ጊዳና፤
ዴሬዮኔ ኢዚ ጊዶን
ዲዛይታ ኡባ
ኢዚ ካታማታኔ
ካታማታን ዲዛ
ኣሳ ኡባ ሚታና።
ዴሬዚካ ባ ቃላ
ꬎቁ ሂስቲ ዋሳና፤
ሄ ቢታን ዲዛ ኣሳይ ኡባይ
ጫሞ ዬሆ ዬካና።
3 ፓራ ቶሆ ጊሪሲ
ሞርኬ ፓራ-ጋሬታ ዋሶ፥
ፓራ-ጋሬታ ቶሆይ ጌንዴሪሼ
ጊሪዛ ጊሪሳ ጋሶን
ኣዋቲ ባንታ ናይታ ኣሻናስ
ጉዬ ሲሚ ጼሌቴና፤
ኢስታ ኩሼይካ ሲላ ጊዳና።
4 ፊሊስጼሜ ኣሳ ኡባ ꬋይሳናስ፥
ባስ ኣቲዲ ሃራታ ማዲዛይታ
ኡባ ጺሮሴፔኔ
ሲዶናፔ ዱꬃ ኣሻናስ
ዎዴይ ጋኪዴስ።
ጎዳይ ካፍቶሬ ጋጻን
ኣቲዳ ፊሊስጼሜ ኣሳ
ꬋይሳና ዴንዲዴስ።
5 ጋዛይ ካዮስ
ባ ቢናና ሜዴታና፤
ኣስቄሎናይ ባ ዶና ቦላ
ኩሼ ዎꬃና፤
ኢንቴኖ ዴምባ ቦላ
ጫሻ ኣቲዳይቶ!
ኢንቴ ኣይዴ ጋካናስ
ኢንቴ ቦላ ቃጪሼ ዳኔ?
6 «ኢንቴ፥ ‹ኔኖ ጎዳ ማሻዉ!
ኔ ኣይዴ ሼምፓኔ?
ኔ ኮሆን ሲማ ጌላ፤
ኔኒ ጮኡ ጋዳ ኡታ› ጋና።
7 ጊዶ ኣቲን ጎዳይ ኣስቄሎናኔ
ኣባ ጋጻ ኦላና ማላ ኣዛዚሺን
ዋኒ ሼምፓናስ
ዳንዳዬቲዜ?» ጌስ።