48
ሞኣቤ ጊሻስ ዮቴቲዳ ኪታ
1 ሞኣቤ ጊሻስ ኡባፌ ዎልቃማ ጎዳ ኢስራኤሌ ጾሳይ፥
«ኔቦይ ꬋያና ጊሻስ
ኢዚስ ኣዬ ኣና!
ቂሪያታይሜይ ካዉያናኔ
ኦይኬታና፤
ሚጻቲካ ኦይኬታናኔ
2 ሃይሳፌ ጉዬ ሞኣቤይ
ቦንቼቱኩ፤
ኣሳይ ሃሴቦኔን ኡቲዲ፥
‹ሃ ዪቴ! ሃኖ ካታማዮ
ኣኔ ꬋይሶስ›
ጊዲ ኢዚ ቦላ ዱላታና።
ሃኔ ማዲሜኔ!
ኔና ቡሮ ጮኡ ሂስታና፤
ማሻይ ኔና ጎዳና።
3 ሆሮናይሜፔ ኬዚዛ ꬋይሳ
ዋሶኔ ጊታ ባሻ ዋሶ
ጊሪስ ሲዪቴ፤
4 ሞኣቤይ ሜቃና፤
ኢዚ ናይቲካ ዋሶ ሲሳና።
5 ጫሞ ዬሆ ዬካና፤
ሉሂቴ ፑዱንꬅ ኬዛና፤
ባና ጋኪዳ ኢታ ሜቶፔ
ዴንዲዳይሳን ጫሞ ዬሆ
ዬኪሼ ሆሮናይሜ
ዱጉንꬃ ዎꬋና።
6 ባቃቲዲ ኢንቴ ሼምፖ ኣሺቴ፤
ባዞን ቱሻ ዎራ ጊዲቴ።
7 ኢንቴ ኦꬂዳ ኦሶኒኔ
ኢንቴ ኣቆታን
ኢንቴ ኣማኔቲዛ
ጊሻስ ኢንቴካ ዲኤታና፤
ካሞሼይካ ባ ቄሴታራኔ
ባ ሹሜታራ ዲኤቲ ባና።
8 ካታማ ኡባ ቦላ
ꬋይሲዛይ ያና፤
ኢሲ ካታማይካ
ኬሲ ኤኪ ኣቴና፤
ጎዳይ ዮቲዳ ጊሻስ
ሾባይ ꬋያና፤
ዴምባቲካ ꬋያና።
9 ሞኣቤይ ፒራꬋ ኣታና ማላ
ኢዚስ ቄፌ ኢሚቴ፤
ኢዚ ካታማቲ ኣይኮይ ባይንዳ
ቡላ ጊዳና።
10 «ጎዳ ኦሶስ ዉዱ ጎንታዴይ
ቃንጌቲዳዴ ጊዶ!
ኢዛ ማሻይ
ሱꬅ ጉሶንታ ማላ
ዲጊዛዴይ ቃንጌቲዳዴ ጊዶ።
11 «ሞኣቤይ ዬላጋቴꬃፌ
ዶሚዲ ጋጬቶንታ
ቶጬራ ዲዛ ዎይኔ
ኡሻ ማላ ዎፓን ዴስ፤
ኦቶፔ ኦቶን ላሜቲቤና፤
ኢዚ ዲኤቲ ቢ ኤሬና፤
ኢዛ ማልኦይ
ካሴ ዲዛ ማላ ዴስ፤
ኢዛ ሳዎይካ ላሜቲቤና።
12 ጊዶ ኣቲን ኦቶዛ ላሚዛ ኣሳታ
ታ ኪታና ዎዴይ ያና፤
ኢስታካ ዎራ ጉሲዲ
ኦታ ጻላ ኣሻና፤
ዱቂዛ ሚሻታካ
ሜንꬄሬꬂ ዬጋና።
13 ኢስራኤሌ ኣሳይ ቤቴሌን
ኣማኔቲ ዲሼ
ዬላቲዳይሳꬆ
ሞኣቤ ኣሳይካ
ባ ጾሳን
ካሞሼን ዬላታና።
14 «ኢንቴ፥ ‹ኑኒ ሚኖ ኦላንቻታ›
ጋናስ ዋኒ ዳንዳይዴቲ?
15 ቤኢቴ ሞኣቤ ቢታይ ꬋያና፤
ኢዚ ካታማቲካ ዎራጄታና፤
ዶሬቲዳ ኢዚ ዬላጋ ናይቲካ
ሹኬታናስ ዱጌ ዎꬋና፤
ኢዛ ሱንꬃይ ጎዳይ ኡባፌ
ዎልቃማ ጾሳይ፥
16 «ሞኣቤስ ኩንዴꬃ
ዎዴይ ጋኪዴስ፤
ባሺ ኢዛ ቦላ ኤሶን ያና።
17 ኢዛ ዩሾን ዲዛ ኡባይ
ኢዛ ጊታቴꬅ ኤሪዛይቲ ኡባይ
ኢዛስ ዬኪቴ፤
ኢንቴ፥ ‹ሚኖ ኢዛ ጪካይ፥
ቦንቼቲዳ ጻንባሮይ
ዋኒ ሜቂዴ?› ጊቴ።
18 «ሞኣቤ ꬋይሳናይ
ኔ ቦላ ያና፤
ጊምቤቲዳ ኔ ካታማታ
ኢዚ ꬋይሳና፤
ሃኔ ዲቦኔ ናዬ!
ኔ ቦንቾዛፔ
ዱጌ ዎꬋ፤
ሜላ ቢታ ቦላ ዎꬋ ኡታ።
19 ሃኔ ኣሮኤሬን ዲዛሬ!
ኔኒ ኦጌ ዶናን ኤቃዳ ጼላ፤
ባቃቲዛ ኣቱማስ፥
ኬሳ ኤካ ቢዛ ማጫስ፥
‹ኣዜ ሜꬌቲዳይ?›
ጋዳ ኦይቻ።
20 ሞኣቤይ ላሌቲዲ ካዉዪዴስ፤
‹ዉ! ዉይ› ጊዲ ዋሲቴ፤
ሞኣቤይ ሙሌራ ꬋይዳይሳ
ኣርኖኔ ሻፋ ኣቻን ኣዋጂቴ!
21 ፒርዳይ ቦላ ጌዜ ቢታን
ሆሎኔ ቦላ፥
ያሃጼ ቦላኔ
ሜፋኣቴ ቦላ፥
22 ዲቦኔ ቦላ፥
ኔቦ ቦላኔ
ቤቲ-ዲቢላታይሜ ቦላ፥
23 ቂሪያታይሜ ቦላ፥
ቤቲ-ጋሙሌ ቦላኔ
ቤቲ-ማኦኔ ቦላ፥
24 ቂሪያቴ ቦላኔ ቦጺራ ቦላ፥
ሃሆኒኔ ማታን ዲዛ ሞኣቤ
ካታማታ ኡባ ቦላ ዪዴስ።
25 ሞኣቤ ካጬይ ቃንጼቲዴስ፤
ኢዛ ቄሴይካ ሜቄሬቲዴስ።
26 «ኢዚ ጎዳ ካꬊዳ ጊሻስ
ሞኣቤ ኡሻን ማꬆሲቴ፤
ሞኣቤይ ባ ጮሻ ቦላ ጌንዴሬቶ፤
ቂꬌስ ኣቶ።
27 ኔኒ ካሴ ኢስራኤሌ ቂꬋቤኪ?
ኢዚ ጊሻስ ኔ ሃሳይዛ ዎዴ
ኔኒ ኔ ሁኤ ቃꬃቤኪ?
ኢዛ ካይሶታራ ካይሶታሼ
ኦይኬታዴ?
28 ኢንቴኖ ሞኣቤን ዲዛይቶ!
ካታማፔ ኬዚ ቢዲ
ዛላ ጊዶን ዲቴ፤
ኣፎ ዶናን ባ ኬꬅ ኬጺዛ
ሃራጴይ ማላ ጊዲቴ።
29 ሞኣቤ ኦቶሬቴꬅ፥
ባና ꬎቁ ሂስቴꬅ፥
ጬቄቴꬂኔ
ዎዚና ሙሜቴꬅ
ኑ ሲዪዶስ።
30 ታኒ ኢዛ ዎልቃ ኤራይስ፤
ጊዶ ኣቲን ሄሲ ሃዳ፤
ኢዛ ጬቄቴꬃስ ጎኣይ ዴና።
31 ሄሳ ጊሻስ
ታኒ ሞኣቤስ ዬካይስ፤
ሞኣቤ ዴሬ ኡባስ፥
‹ዉ! ዉይ› ጋይስ፤
ቂሬ-ሄሬሴ ኣሳሲካ
ዬሆ ጬንጉርስ ሲሳይስ።
32 ኔኖ ሴባማ ዎይኔ ሚꬃዞ!
ኢያዜሬስ ዬኮይሳፌ
ኣꬃዳ ታኒ ኔስ ዬካይስ።
ኔ ሃጋቲ ዳዪዲ ኣባ ፒኒዲ
ኢያዜሬ ጋኪዳ፤
ጊዶ ኣቲን ኔስ ማጻ ጋኪዳ
ካꬃ ኣይፌኔ
ዎይኔ ꬋይሳናይ ዪዴስ።
33 ሞኣቤን ኣታኪልቴሶፔኔ
ጎሻ ጋዴፔ
ሃሹ ሂስቲዛዚኔ
ኡፋይሲ ꬋይዴስ፤
ዎይኔ ኡሺ ጉምኢን
ዎꬎንታ ማላ ሜሊሳዲስ፤
ኦኒካ ኢዛ ኢሊሊሼ ጉምኤና፤
ሄን ኣሳ ቃላይ ሲዬቲኮካ
ኢሊሊሳ ጬንጉርስ ጊዴና።
34 «ሃሴቦኔፔ ቢዲ ኤልኤሌኔ
ያሃጼ ጋካናስ፥
ዞኣሬፔ ቢዲ ሆሮናይሜ፥
ኤጊላቴ-ሻሊሺያ ጋካናስ
ኢስታ ዋሶይ ኬሂ ሴቴቴስ፤
ኒሚሪሜ ሃꬂ ሜሊዴስ።
35 ꬎቃሶሆታ ቦላ ያርሺዛይታኔ
ባንታ ኤቃ ጾሳታስ
ኤጻኔ ጩዋሲዛይታ
ታኒ ሞኣቤ ቢታፌ ꬋይሳና።
36 «ታ ዎዚናይ ሞኣቤሲኔ
ቂሬ-ሄሬሴ ኣሳስ ዛዬን
ዬኪዛ ኣሳ ማላ ዬኬስ፤
ጋሶይካ ኢስታ ዱሬቴꬂ
ꬋይዴስ።
37 ኣስ ኡባ ሁኤይኔ
ቡቺ ሜዴቲዴስ፤
ባንታ ኩሼካ ጫዴሬꬂዳ፤
ቃሴ ማቃ ማይኢዳ።
38 ሞኣቤን ዲዛ ኬꬃ
ኡባኒኔ ዳባባን
ዬሆፔ ኣቲን
ሃራይ ዴና፤
ጋሶይካ ታኒ ሞኣቤ ዴሬ
ሞሆ ኦቶ ማላ
ሜንꬄሬꬃ ዬጋዲስ።
39 «ሞኣቤይ ኣይ ሜቆ ሜቂዴ!
ኣሳይ ኣይ ዬሆ ዬኪዜ!
ሞኣቤይ ኣይ ማላ
ዬላቲዲ ዞኮ ዛሪዴ!
ሞኣቤይ ባ ሄራን ዲዛ
ኣሳ ኡባስ
ጫሻሲኔ ሻባርሳስ
ማላታ ጊዲዴስ» ጌስ።
40 ጎዳይ፥ «ጎሌይ ባ ቄፌ
ፒዲ ሂስቲ
ፒራꬊ ዎꬊዛ ማላ፥
ሞኣቤ ቦላ ዎꬋና።
41 ኢዛ ካታማቲኔ
ኢዛ ሚጻቲ ኦይኬታና፤
ሄ ጋላስ ሞኣቤ
ኦላንቻታ ዎዚናይካ
ሚጻ ኦይኬቲዳ ማጫሳ
ዎዚና ማላ ጊዳና።
42 ሞኣቤይ ጎዳ
ካዉሺዳ ጊሻስ ꬋያና፤
ኢዛ ካዎቴꬃይካ ኣታና።
43 ኔኖ ሞኣቤ ዴሬዞ!
ኔና ሻባርሲ፥ ኦላይኔ
ዎጺማዴይ ናጌስ።
44 «ሻባርሳፌ ባቃቲ ኣቲዳ ኡባይ
ኦላን ጌላና፤
ኦላፌ ኬዚዳይ
ዎጺማዴን ኦይኬታና፤
ታኒ ሞኣቤይ ቃጻዬቲዛ
ላይꬅ ኤሃና ጊሻሳ።
45 «ሃሴቦኔፔ ሞኣቤ ሊጴ፥
ጬቄቲዛይታ ፒꬌ
ጹጊዛ ታማይ፥
ታማ ላጮይ ሲሆኔ
ኬꬃፌ ኬዚዴስ፤
ባቃቲ ቢዳይቲ
ሃሴቦኔ ኩዋ ጋርሳን
ባናሶ ꬋይዲ ኤቂዳ።
46 ሞኣቤ ኔስ ኣዬ ኣና!
ካሞሼስ ጎይኒዛ
ዴሬይ ዉሪ ዉሪዴስ።
ኔ ኣቱማ ናይቲ ኡባይ ዲኤቲዳ፤
ማጫ ናይቲ ኡባይካ ዲኤቲ ቢዳ።
47 «ጊዶ ኣቲን ዉርሴꬃን ሞኣቤፔ
ዲኤቲ ቢዳይታ ታ ዛራና» ጌስ።
ሞኣቤ ቦላ ፒርዴቲዳ
ፒርዳይ ሄሳ።