4
ኤልፋዜይ ኮይሮ ሃሳይዳ ሃሳያ
1 ቴማኔ ዴሬ ኣስ ኤልፋዜይ ሂዝጊ ዛሪዴስ፤
2 «ኢዮቤ! ኢሲ ኣሲ ኔ ቦላ
ዎልቃꬂ ሃሳይኮ
ኢዛዴ ኔ ዳንዳያን ኤዝጋኔ?
ሃሳያናፔ ኣቲን
ኦኒ ኣጋኔ?
3 ኔኒ ዳሮ ኣሳታ ታማርሳዳሳ፤
ዳቡርዳ ቄሴታካ ሚንꬃዳሳ።
4 ካሴ ኔ ቃላቲ ꬉጴቲዛይታ
ማዴቴስኮሺን፤
ኔኒ ኮኮሪዛ ጉልባቴታካ
ሚንꬃሳኮሺን።
5 ሃኢ ጊዲኮ ሜቶይ
ኔ ቦላ ጋኪዳ ጊሻስ
ሂዶታይ ባይንዳዴ ጊዳዳሳ፤
ሜቶይካ ኔ ቦላ
ሚኒዳ ጊሻስ
ሂዶታ ቃንጻዳሳ።
6 ጾሳስ ኔ ያዪዛ ያሻይ
ኣማንꬂዛዝ ጊዴኔ?
ኔ ሱሬ ኦጌቲካ
ኔስ ሂዶታታ ዴቴኔ?
7 ጺሎ ኣስ ጊዲ ዲሺን
ኢዛ ሜቶይ ጋኪዳዴይ፥
ሱሬ ኣስ ጊዲ ዲሼ
ቲምኢ ጊ ꬋይዳዴይ፥
ዲኮ ኣኔ ቆፓ።
8 ታኒ ኣኬኪዳ ማላ፥
ኢታቴꬅ ጎዪዲ ሜቶ ዜሪዛይቲ
ሄይታንቲ ባ ኦꬆሮ
ሺሻና።
9 ኢስቲ ጾሳ ፔኖን ꬋያና፤
ኢዛ ሃንቆ ዳምባላን
ኢስቲ ዲፒ ጊ ꬋያና።
10 ኢታቲ ጋሞ ማላ ጻጋና፤
ባ ቃላ ꬎቁ ኦꬂዲ
ዋሳና፤
ጾሲ ጊዲኮ ኢስታስ
ኣቻ ሜንꬄሬꬃና።
11 ጋሞይ ሻንካቲዲ
ሚዛዝ ꬋይዳ ዎዴ
ሃይቂዛ ማላ ኢስቲካ ሃይቃና፤
ጋሞ ማራቲካ ላሌቲዛ ማላ
ኢስታ ናይቲካ ላሌታና፤
12 ጋላሳፌ ኢሲ ጋላስ ጹራ ጊዲዳ
ኪታይ ታኮ ዪዴስ፤
ሄሳ ሄ ኪታዛ ሳሱኬꬃን
ታ ሲያዲስ።
13 ኣሳይ ኦማርስ ዎልቃማ ꬊስኮ
ሴሪዳ ዎዴ፥
ታና ኢታ ኣጉሞይ ኣጉንꬂዴስ።ኢዮ 33፡15
14 ባቦይኔ ኮኮርሲ ታና ኦይኪን፥
ታስ ሜቄꬃቲ ኡባይ
ኮኮራና ማላ ኦꬂዴስ።
15 ኣያናይ ታ ሲንꬃራ ኣꬊዴስ፤
ዳጋማፔ ዴንዲዳይሳን
ታ ሃሳይ ኤቂዴስ።
16 ሄንካ ኢሲ ሚሺ
ኤቂ ዲዛይሳ ቤያዲስ፤
ቲሺ ኦꬃ ጼላዲስ ሺን
ኢዚ ኣዛኮ ሻካ
ኤራናዉ ዳንዳያቤኬ።
ሄሳፌ ጉዬ ጮኡ ጊዳሶሆፔ
ሂዝጊዛ ቃላ ሲያዲስ፥
17 ‹ጾሳ ሲንꬃን ጺሎ ጊዲ
ቤታናስ ዳንዳይዛ ኣሲ ዲዜ?
ዎይኮ ባና ሜꬊዳይሳ
ሲንꬃን
ጌሻ ኣሲ ቤታኔ?
18 ጾሲ ባስ ኦꬂዛይታን
ኣማኔቶንታ ኣጊኮ፥
ባ ኪታንቻታ ቦላካ
ኢዚ ሞሮ ሚሽ
ዴሚዛዝ ጊዲኮ፥
19 ሂስቲን ሃራꬎይ
ሞንታ ዲሺን ላሌቲዛ
ኢስታ ዮቻይ ቢታፌ ጊዲዳ
ኡርቃፌ ኦሴቲዳ ኬꬃ ጊዶን
ዲዛይታ ቦላ
20 ማላዶፔኔ ኦማርሳፌ ጊዶን
ኢስቲ ሜቄሬታና፤
ኤሬቶንታ ዲሺን
ኢስቲ ሜርናስካ ꬋያና።
21 ቶሌ ꬊሽኬይ
ሾዴቲቺዳ
ዱንካኔ ማላ
ኢስቲ ኤራቴꬂ ባይንዳ ሃይቃና።›