5
1 «ኢዮቤ! ኔ ጼይጊን
ኔስ ኮያናዴይ ዲኮ ጼይጋ፤
ኔስ ማዶ ኢማና ማላ
ኪታንቻታፔ
ኣዋይሳኮ ጼላይ?
2 ኤያ ኣስ ዪሎይ ዎꬋና፤
ቃናቴይካ ኣስ ꬋይሳና።
3 ኤያ ኣሲ ሚኒዲ ዲሺን ቤያዲስ፤
ጊዶ ኣቲን ኢዛ ኣቆይ
ቆፖንታ ዲሺን
ጾሳ ሃንቆን ላሌቲዴስ።
4 ኢዛ ናይቲካ ባ ዴኦዛስ
ኣማንꬂዛዝ ዴሜቴና፤
ዱቡሻንካ ኢስታ ጊሻስ
ሃሳይዛ ኣስ
ኢስቲ ዴሞንታ ጊሻስ
ኢስታ ቦላ ቆሆይ ጋካና።
5 ኢዚ ዜሪዳ ካꬃካ
ኮሻቲዳ ኣሳቲ ማና፤
ሃራይ ኣቲን ኣጉንꬃ ጊዶን
ሞኪዳይሳካ ኢዛስ ኣሼቴና፤
ሳሜቲ ኡቲዳ ኣሳቲ
ኢዛ ሃሮዛ ኤካናስ ኣሞቴቴስ።
6 ሜቶይ ጮ ቢታፌ ዴንዴና፤
ዋዬይካ ጋዴፔ ጮ ኬዜና።
7 ታማ ፊንጼꬂ ቦንቆፌ ዴንዲዲ
ፑዴ ፊንጺዛ ማላ፥
ኣሲካ ዋዬስ ዬሌቴስ።
8 «ታኒ ኔና ጊዲዳኮ
ጾሳ ዎሳና፤
ታ ሜቶ ኡባ ኢዛስ ቆንጪሳና።
9 ኢዚ ቆዳይ ባይንዳ
ማላሊሲዛ ሚሽ፥
ፒልጊን ጋኬቶንታ
ጊታ ሚሽ ኦꬄስ።
10 ቢታ ቦላ ኢራ ቡኪሴስ፤
ጎሻታካ
ሃꬃን ሹጊሴስ።
11 ካዉዪዳይታ ቦንቾን
ꬎቁ ሂስቴስ፤
ሙዞቲዛይታ ሚንꬄꬂዲ
ኡፋይሴስ።
12 ኢስታ ኦሶይ ፖሌቶንታ ማላ
ጌኔ ኣሳታ ቆፋ ሃዳ ኦꬄስ።
13 ጪንጫታ ኢስታ ጌኔ ኦሶዛን
ዛሪ ኦይኬስ።
ጌኔ ኣሳታ ቆፋካ
ኤሶራ ꬋይሴስ።1ቆሮ 3፡19
14 ጋላሳይ ኢስታስ ꬉማ ጊዴስ፤
ቡሮ ሴታ ጋላሳን
ኦማርስ ꬉማ ጊዶን ዲዛ ማላ
ኢስቲ ታታፌታና።
15 ማንቆታ ኢስታ ሞርኬታ
ማሻፌ ኣሼስ፤
ሜቶታንቻታካ
ዋዪሲዛይታ ኩሼፔ
ኬሲ ኤኬስ።
16 ማንቆታስ ሂዶታ ኢሜስ፤
ማካላቴꬂካ
ቢታ ቦላፌ ꬋይሴስ።
17 «ጾሲ ሴሪዛ ኣሲ ኣንጄቲዳይሳ፤
ሄሳ ጊሻስ ኡባ ዳንዳይዛ
ጾሳ ሴራ ሌቆፋ። ሌሚ 3፡11፤ ኢብ 12፡5-6
18 ጾሲ ማዱንꬂኮካ
ዛሪዲ ፓꬄስ፤
ኢዚ ሜንꬄስ፤
ባ ኩሼን ዛሪዲ ኮሌስ። ሆሴ 6፡1
19 ኡሱፑን ቆሞ ቦሻፔ
ኔና ኣሺ ኤካና፤
ላፑንꬃዛንካ ኣይ ቆሆይካ
ኔ ቦላ ጋኬና።
20 ኮሻ ላይꬃን ኢዚ ኔና
ሼምፖራ ፓጻ ዎꬃና፤
ኦላ ላይꬃንካ ኢዚ ኔና
ሃይቆፔ ኣሻና።
21 ጾሲ ኔና ኢታ
ኢንጻርሳፌ ናጋና፤
ቦሻይ ኔ ቦላ
ዪኮካ ያያካ።
22 ዎልቃማታ ቆሆይኔ
ኮሻይ ኔና ዳጋንꬄና፤
ቢታ ዶኣታስካ ኔ ያያካ።
23 ኔ ጎዪዛ ጋዴን ኔና
ሹቺ ዋዪሴና፤
ዶኣታራካ ኔ ሳሮን ዳና።
24 ኔ ኬꬃን ሳሮይ ኩማናይሳ
ኔ ሻካ ኤራና፤
ኔ ሜሄ ጼሊሺን
ኣቆፔ ፓጬና።
25 ኔ ዜሬꬃይ ዳራናይሳ ኔ ኤራና፤
ኔ ዜሬꬃይካ ዴምባን ዲዛ
ማታ ማላ ዳራና።
26 ካꬂ ካጺዲ ማጼቲዛይሳ ማላ
ኔካ ሎኤꬃ ጪማዳ
ዱፎን ባና።
27 ኑኒ ሃይሳ ኡባ ፒልጊዲ
ቱሙ ጊዲዳይሳ ኤሪዶስ፤
ኔኒካ ኣኬካዳ
ሃይሳ ኦሶን ፔይሻ።»