6
ኢዮቤ ሃሳያ
1 ሃይሳፌ ጉዬ ኢዮቢ ሂዝጊ ዛሪዴስ፤
2 «ታ ሙዞቴꬂ ጌዳሬቲ
ኡቲዳኮ ኣዜ ዲዛይ!
ታ ሜቶይ ኡባይ
ጌዳራን ጌዳሬቲ ኡቲዳኮ
ኣዜ ዲዛይ!
3 ኣባ ላንቄን ዲዛ
ኣጬፔ ኣꬊ
ዴጻናኮሺን፤
ሄሳ ጊሻስ ዳንዳያይ ፓጪዳ
ታ ሃሳያይ
ኔና ማላሊሳናስ ቤሴና።
4 ኡባ ዳንዳይዛ ጾሳይ
ታና ባ ዪሻታን ጫዲዴስ፤
ኢስታ ማርዜቲካ
ታ ኣሳቴꬃ ጊዶን ላሌቲዳ፤
ዳጋንꬂዛ ጾሳ ቦሻይ
ታ ዩሾን ዩዪ ኣꬊዴስ።
5 ቱማፔ ሃርዲዳይ ጪሊላ ማታ
ዴሚዲ ጫጊ ኤሪዜ?
ቦራይካ ባሶ ማታ ዴሚኮ
ጻጊ ኤሪዜ?
6 ማጺኔይ ጌሎንታ ማልኦንታ
ካꬂ ሜቴቲዜ?
ጱጱሌ ሃꬂ ማልኢዜ?
7 ሃይሳ ማላ ካꬅ
ማናስ ኮይኬ፤
ሙሲ ኣቲን ኩሼንካ ቦቺኬ።
8 «ታ ኣሞቲዛይሳ ጾሲ
ታስ ኢሚዳኮ ኣዜ ዲዛይ!
ኢዚ ታ ዋሶ ሲዪዳኮ
ኣዜ ዲዛይ!
9 ሃይሳ ኡባፌ ኢዛስ ሼኔ ጊዲን
ኢዚ ታና ሜንꬄሬꬂ
ዬጊዛኮ!
ባ ኩሼዛ ዬዲዲ
ኢዚ ታና ꬋይሲዳኮ!
10 ሼምፖ ኢሞንታ ኣይ ሃርጌይ
ታና ሳኪኮካ
ታኒ ኡፋይሳን ጉፓና፤
ታኒ ጌሻዛ ቃላ
ኣይ ዎዴንካ ካዳቤኬ፤
11 «ዴኦን ዴኣና ማላ ዳንዳይዛ
ኣይ ሚኖቴꬂ ታስ ዲዜ?
ሂዶታይ ባይንዳ ኣጊኮ
ኣይስ ዴኣዚና?
12 ታኒ ሹቻ ማላ ሚኖ?
ታ ኣሳቴꬃይካ
ጻርቂማላꬆ ሚኖ?
13 ታና ማዳናስ
ታስ ኣይኮ ዎልቃይ ዴና፤
ታስ ዲዛ ዎልቃይ
ኡባይ ኤኬቲቺዴስ።
14 «ኡባ ዳንዳይዛ ጾሳስ
ያሽ ኣጊዳዴሲኔ
ዳቡርዳዴስካ ኢዛ ላጌይ
ኢዛስ ኪያቴꬅ ቤሳናስ ኮሼስ።
15 ታ ኢሻቲ ጊዲኮ ሃሮይ ሃሮቲ
ዎꬊዳፔ ጉዬ ሜሊዛ
ኣማንꬆንታ
ሻፋታ ማላ ባሌꬂዛይታ።
16 ሻፋታን ባልጎ ባልጎ
ሻቺ ኩሜስ።
17 ቦኔ ኣጊናታን ጊዲኮ
ማዪ ꬋዬስ፤
ሻፋቲካ ሃꬂ ባይንዳ
ሜላታ ጊዴቴስ።
18 ጫና ሜሄታ ላጊ ኦጌራ ቢዛ
ኣሳቲ ሃꬅ ኮሻስ
ኦጌፔ ኬኢ ባዞ ቢታ ጌሊዲ
ቶይሉ ቶይሊሼ ꬋዬቴስ።
19 ቴማ ቢታፌ ቢዛ ማንዳራ ኣሳቲ
ሃꬄ ኮዬቴስ፤
ሳባ ዴሬ ዛልኣንቻቲካ
ሃꬄ ዴማናስ
ሂዶታ ኦꬄቴስ።
20 ባንቲ ኣማኔቲ ኡቲዳ ሻፋቲ
ሜሊዳይሳ ቤኢዲ
ሂዶታ ቃንጼቴስ፤
ሃꬃኮ ጋኪዛ ዎዴ
ዪሎቴቴስ።
21 ኢንቴካ ታስ ሃይታ
ሃ ሻፋታ ማላ፤
ታ ቦላ ጋኪዳ ሜቶዛ ቤኢዲ
ጌዴ ጉዬ ባቃቲዴታ።
22 ሂስቲን ታ ኢንቴና ሄሳ ዎይኮ
ሃይሳ ታስ ኢሚቴ፥
ዎይኮ ኢንቴ ሃሮዛፔ ኬሲዲ
ታና ኣሺቴ ጋዲና?
23 ቃሴ ታ ሞርኬታ
ኩሼፔ ታና ኣሺቴ፤
ዎይኮ ታና ዋዪሲዛይታ
ኩሼፔ ታና
ኬሲ ኤኪቴ ጋዲና?
24 «ታና ታማርሲቴ፤
ታኒካ ጮኡ ጋና፤
ታ ሞሮዛካ ታና ቤሲቴ።
25 ቱማ ቃላይ
ጫሞ ጊዲኮካ ኤኬቴስ፤
ኢንቴ ዋላሳይ ጊዲኮ
ኣይኮስካ ጎኤና።
26 ኢንቴ ታ ሃሳያ
ጫርኮ ማላ ቆዴታ፤
ሂስቲኮ ሂዶታ ቃንጺዳ ታስ
ዛሮ ኢማናስ ኣይስ ኮዬቲ?
27 ዪኦ ናይታ ቦላ ሳማ ዬጌታ፤
ኢንቴ ኢንቴ ሲቆ ላጌታ
ባይዛናስ ሚሻን
ማርሼቴቲ?
28 «ኣኔ ታና ሃ ጼሊቴ፤
ኢንቴ ሲንꬃን ታ ዎርዶታዲና?
29 ኢንቴስ ቆሆ ጊዶንታ ማላ ሲሚቴ፥
ታኒ ሊኬ ኣሳኮ!
30 ቱሙካ ታ ኢንጻርሳን
ቆሆይ ቤታኔ?
ታ ዶናይካ ጌኔ ሚሽ
ሻኪ ኤራናስ ዳንዳዬኔ?