8
ቤሊዳዴ ሃሳያ
1 ሹሃ ዴሬ ኣስ ቤሊዳዴ ጌቴቲዛይሲ ሂዝጊዲ ዛሪዴስ፤
2 «ኔ ዶናፔ ኬኢዛ ቃላቲ
ጎቴ ጫርኮ ማላ፤
ኣዉዴ ጋካናስ ሃይሳꬆ
ኔ ሃሳያኔ?
3 ጾሲ ፒርዳ ቦካሲ ኤሪዜ?
ኡባ ዳንዳይዛ ጾሳይ
ጺሎቴꬅ ቦካሲ ኤሪዜ?
4 ኔ ናይቲ ጾሳ ቆሂዳ ጊዲኮ፥
ኢስቲ ባንታ ፒርዳ ኤኪዳ ጉሳ።
5 ጊዲኮካ ኔ ጾሳኮ ሲሚኮ፥
ኡባ ዳንዳይዛ
ጾሳ ዎሲኮ፥
6 ሱሬኔ ጌሽ ጊዲኮ
ኢዚ ኤሶቲ ኔስ ቤሲዛ ሶሆን
ኔና ዛራና።
7 ኔ ዶሜꬃይ
ጉꬅ ሚሳቲኮካ፥
ኔስ ፖሎይ ኬሂ ሎኦ ጊዳና።
8 «ኣኔ ካሴ ዬሌታ ኦይቻ፤
ካሴ ኣዋቲ ጋኪዳሶዛ
ፒልጋ ጼላ።
9 ኑ ላይꬃዚ
ቡሮ ጉꬅ ጊዲዳ ጊሻስ
ኑኒ ኣይኮካ ኤሮኮ፤
ኑ ላይꬃይካ
ኤሾ ማላ ኣꬊዛዛ።
10 ኢስቲ ኔስ ታማርሲዛይሲኔ
ኔስ ዮቲዛይሲ
ባ ኣኬኪዛይሳፌ
ኤኪዲ ጊዴኔ?
11 ቱሙካ ጫሬይ ባይንዳሶን
ሻጫ ማታይ ሞኪ ኤሪዜ?
ሃꬂ ባይንዳሶን
ማርጮይ ጪሊሊዜ?
12 ሃይሲ ሃኖንታ ኣጊኮ ዲጪዲ
ቡች ጋካናፔ ሲንꬃን
ቡሮ ጪሊላን ዲሼ ሜሌስ።
13 ጾሳ ዶጊዛ ኣሳታ
ኡባ ዉርሴꬃይ
ሄሳ ማላ ሃናና፤
ጾሲ ባዋ ጊዛ ኣሳታ
ሂዶታይ ቃንጼታና።
14 ኣቻሮ ኬꬃ ማላ
ሚሻን ኣማኔቴቴስ፤
ኢስቲ ሂዶታ ኦꬂዛ
ሚሺ ዲኮካ
ካዉሻራ ꬋያና።
15 ኣቻሮ ኬꬃ ቦላ
ኢስቲ ዜምፒዛ ጊዲኮ
ኢዚ ሚኒ ኤቄና፤
ኣቻሮ ኬꬃዛ ኢዚ ኦይኪኮ
ዱጼሬቲ ዎꬋና።
16 ሃꬃ ካሊዳ ሃሩማይ
ሆኦ ዴሚዲ ዳዬስ፤
17 ጻጶዛ ሹቻ
ሙሄ ጊዶን ዬዴስ፤
ዛላ ዛኣን ጻጴስ።
18 ባ ዲዛሶፔ ሾዴቲዛ ዎዴ
ኢዚ ዲዛሶዚ ኤሬቴና።
19 ኢዛ ዉርሴꬂ ሄሳ ማላ ጊዴስ፤
ሃራ ማታቲ ቢታፌ ዶሌቴስ።
20 «ጾሲ ዎሶይ ባይንዳ
ኣሳታ ኦሌና፤
ኢታ ኣሳታ ቄሴ ሚንꬄና።
21 ሄሳ ጊሻስ ኔኒካ
ኡፋይሳን ሚጫና ማላኔ
‹ኢሊላና› ማላ ኢዚ ኦꬃና።
22 ኔና ኢጺዛ ኣሳቲ ጊዲኮ
ዬላ ማይኣና፤
ኢታ ኣሳታ ኬꬂካ ꬋያና።»