9
ኢዮቤ ሃሳያ
1 ኢዮቢ ሂዝጊ ዛሪዴስ፤
2 «ኤ! ታኒ ሃይሲ
ቱሙ ጊዲዳይሳ ኤራይስ፤
ጊዶ ኣቲን ኣሲ ጾሳ ሲንꬃን
ዋኒ ጺሎ ጊዳናስ ዳንዳይዜ?ኢዮ 4፡17
3 ኢዛራካ ኦኒ ማርሼታናስ
ዳንዳይዜ?
ኢዚ ኢሲ ሺ ኦይሾታ
ኦይቺዛ ጊዲኮ
ኢስታፌ ኢሲኖካ
ዛራናስ ዳንዳይዛዴይ ዴና።
4 ጾሲ ኤራንቻኔ ዎልቃማ፤
ኢዛራ ኤቄቲዲ ጾኔቶንታይ?
5 ኣኬኮንታ ዙማታ ኮኮርሳና፤
ባ ሃንቆዛንካ
ሺሬቺ ዬጋና።
6 ጾሲ ቢታ ዲዛሶፔ ኮኮርሳና፤
ቢታ ቱሳታካ ቃሴꬃና።
7 ኣዋ ኣርሼይ ሞኮንታ ማላ
ኦꬃናዉ ዳንዳዬስ፤
ጾሊንቴቲካ
ፖኢሶንታ ማላ
ኦꬃና።
8 ኦኒካ ማዶንታ ዲሺን
ሳሎታ ሚጪዳይ ኢዛ፤
ኢዚ ኣባ ዳምባላ ቦላ ሄሜቴስ።
9 ዛርዶ፥ ኦሪዮኒኔ
ፒሊያዲሴ ጌቴቲዛ ጾሊንቴታ፥
ቃሴካ ዱጌ ባጋራ ዲዛ
ዳሮ ጾሊንቴታ፥
ሳሎ ቦላ ሜꬊ
ዎꬂዳይ ጾሳ። ኢዮ 38፡31፤ ኣሞ 5፡8
10 ኢዚ ኦꬂዛ ማላሊሲዛ ሚሻታ
ኑኒ ፒልጊዲ
ኣኬካናዉ ዳንዳዮኮ፤
ኢዚ ፖሊዛ ማካላ ሚሻታ
ኑኒ ቆዳናዉ ዳንዳዮኮ።
11 «ጾሲ ታ ማታራ ኣꬊኮካ
ታ ዴሚኬ፤
ሃ ታኮ ሺቂኮካ
ሻካዳ ኤሪኬ።
12 ኢዚ ባ ኮዪዳይሳ ኤኪኮ
ኦኒካ ኢዛ ዲጌና፤
‹ኣይስ ሃይሳꬆ ኦꬃይ?› ጊዲ
ኢዛ ኦይቻናስ ጻሊዛይ ዴና።
13 ጾሳይ ባ ሃንቆዛፔ
ጉዬ ሲሜና፤
ኤራኣቤ ጌቴቲዛ
ኣባ ጊዶ ዶኣታ
ማዲዛይቲካ
ኢዛ ቶሆ ጋርሳን ጉልባታና።
14 «ሂስቲን ታኒ ኢዛስ ዛሮ
ዋና ኢማና ዳንዳያዚና?
ኢዛራ ማርሼታናስ
ኣይ ቃላ ታ ዴማኔ?
15 ጌሽ ጊዳ ታ ቤቲዳኮካ፤
ታ ቦላ ፒርዲዛዴይ
ታና ማራና ማላ
ዎሳና ኣቲን
ኢዛስ ዛሮ ኢማናስ ጻሊኬ።
16 ታ ኢዛ ሱንꬃ ጼይጊኮ
ኢዚ ዛሮ ታስ ኢሚዛ ጊዲኮካ
ታ ማጋና ኢዚ ሲያና ጋዳ
ታ ኣማኔቲኬ።
17 ኢዚ ታና ጎቴ ጫርኮን ሊቂሳና፤
ኣይኮ ጋሶይካ ባይንዳ
ታስ ማዱንꬃ ሃ ዳርሳና።
18 ሼምፖ ታ ዛራና ዎዴይ
ጋካናስካ
ታስ ሼምፖ ኢሜና፤
ታ ሼምፖን ዋዬ ኩንꬂዴስ።
19 ታስ ዲዛ ዎልቃን
ታ ኢዛራ ባጼታና ጎንታ ማላ
ዎልቃን ኢዛራ ኤቄቲዲ
ዳንዳያናይ ዴና፤
ታ ሞቴታዳ ኢዛ
ላꬃና ጎንታ ማላ
ኢዛ ፒርዲዛ ኣሳታኮ
ሺሻናስ
ዳንዳይዛ ኣሲ ዴና።
20 ታኒ ጌሺኔ ጺሎኮሺን
ታ ሃሳያይ ታና
ቆሃንቻ ኬሴስ፤
ታ ሃሳይዛ ሃሳያቲ ኡባይ
ታ ቦላ ፒርዴቴስ።
21 «ኣይኮካ ታኒ
ቦሬይ ባይንዳዴ ጊዲኮካ
ታ ጊሻስ ቆፒኬ፤
ታ ሼምፖዮካ ሃራሴታይስ።
22 ጾሲ ጺሎዛኔ ቆሃንቻዛካ
ꬋይሲዛ ጊሻስ
ኣይኮ ዱማቴꬂካ ዴና
ታ ጊዳይ ሄሳ ጊሻሳ።
23 ኣሲ ኢታ ሜቶን ዉርሺን
ኢዚ ጌሻ ኣሳ ሜቶ ቂꬌስ።
24 ቢታይ ኢታ ኣሳታ ኩሼን
ኣꬊ ኢሜቲሺን
ኢዚ ፒርዲዛ ኣሳታ ኣይፌ ጎዜስ፤
ሃይሳ ኦꬂዳይ ጾሳ
ጊዶንታ ኣጊኮ ሃራይ ኦኔ?
25 «ታ ላይꬃቲ ዎጺዛይታፔ
ሃ ኣꬊ ኤሶቴቴስ፤
ኣይኮ ኡፋይሲካ
ታ ዴሞንታ ኣꬌቴስ።
26 ኢስቲካ ሶኬ ጊዛይሳፌ ኦሴቲዳ
ዎጎሎ ማላ ኤሶቴቴስ፤
ባቂ ኤኪዛ ጎሌ ካፎ ማላ
ኤሶቴቴስ።
27 ታኒ ታ ዙዙንꬃ ባላና፤
‹ታ ሲንꬃካ ካሬꬆ ኣጋዳ
ኣኔ ፖኢሳ ቤሳይስ› ጊኮ፥
28 ጾሲ ታና ጌሽ ኦꬂዲ
ቆዶንታይሳ ታኒ ኤሪዛ ጊሻስ
ሜቶይኔ ዋዬይ
ታ ቦላ ጋካና ጋዳ ያያይስ።
29 ሂስቲን ታ ቆሃንቻ
ጌቴታ ቆዴቲዳ ጊዲኮ
ታስ ሃዳ ዳቡራይ ኣዛሴ?
30 ታኒ ታ ኣሳቴꬃ
ሳሙናን ሜጪዛ ጊዲኮ፥
ታ ኩሼዛካ
ኬሃ ጌሺዛ ጊዲኮ፥
31 ሃ ኡባ ኦꬂንካ
ኔኒ ዱጌ ኢታ ጪማን ታና ኦላና፤
ታ ማይኦቲካ ታና ሻቴታና።
32 ኢዚ ታ ማላ ኣስ ጊዶንታ ጊሻስ፥
ፒርዲዛ ኣሳታኮ ቢዲ
ፒርዴቶስ ጋናዉ ዳንዳይኬ።
33 ኑ ቦላ ባ ኩሼዛ
ጋꬂ ዎꬂዲ
ፒርዲ ኑና ሻኪዛ ኣሲ
ኑ ጊዶን ዲዛኮ፥
34 ኢዛ ቴማቴꬂ
ታና ሂርጊሶንታ ማላ
ጾሲ ባ ጉፌዛ
ታ ቦላፌ ዴንꬂዳኮ፥
35 ታኒ ኢዛስ ያዮንታ
ሃሳያናኮሺን፤
ሃኢ ጊዲኮ ታ ዲዛ ሃኖን ዳሼ
ሃሳያና ዳንዳይኬ።