ታ ዴኢዛ ጫሞ ዴኦዛ

ቆንጬን ሲሳና።

ታ ቦላ ኔስ ላንጬይ ዲኮ

ታስ ቆንጪሳ ኣቲን

ታ ቦላ ፒርዶፋ!

ኔስ ዎጋ?

ኔኒ ኔርካ ሜꬊዳ ኣሳ

ኔ ካꬋናስ ኔስ ቤሲዜ?

ኢታ ኣሳታ ዱላታይ

ኔና ኡፋይሲዜ?

ዎይኮ ኔ ኣሳꬆ ጼላይ?

ዎይኮ ኔ ላይꬃቲ

ኣሳ ላይꬃ ማላ ቃንꬄ?

ኣይስ ኔ ታ ናጋራካ

ካላ ካላዳ ኣጎንታ ኢጻይ?

ኔ ኩሼፔ ኦኒካ

ታና ኣሾንታይሳ ኔ ኤራሳ።

ኢሚ ሜꬊዳይ

ኔ ኩሼታ፤

ሂስቲን ሃኢ ሃ ኩሼቲ

ታና ዛሪ ላሊ ꬋይሳኔ?

ቢታፌ ሜꬎይሳ ቆፓ፤

ሂስቲን ሃኢ ኔ ታና

ጉዱላ ማላ ሊቂሳኔ?

ሜቆ ማꬃ ማላ

ኢርኪሳ ኦꬃዳሳ።

ኣሾን ካማዳሳ፤

ሜቄꬃኒኔ ሻያን

ጋꬃ ኦይꬃዳሳ።

ታስ ኢማዳሳ፤

ኔ ናጎይካ

ታ ኣያና ሚንꬂዴስ።

ኔ ዎዚናን

ቆታ ዎꬃዳ ዳሳ፤

ኔ ቆፋይካ ሃይሳ ጊዲዳይሳ

ታ ኤራዲስ።

ኔ ኣይፌቲ ቤያና፤

ታ ናጋራ ጊሻስ

ታና ቃጻዮንታ ኣꬋካ።

ኤሶራ ሜቶ ጊዶን ኩንዳና፤

ሎኦ ሚሽ ኦꬂዳ ጊዲኮካ

ጋላቴቲኬ፤

ታ ጊልቂን ዬላይ ታና ጋኪዴስ።

ኔ ታና ጋሞ ማላ

ሻንካታዳ ኦይካና፤

ኔ ታና ቆሃናስ

ዛራ ዛራ ሻንካታና።

ኔ ኡባ ጋላስ ዴማና፤

ታ ቦላ ኔ ሃንቆይ

ጌዴ ዳሪ ዳሪ ባና፤

ኔኒ ታና ቆሃናስ

ኡባ ጋላስ ኦራꬃ ቆፋታ

ኦላ ኣሳታ ማላ

ታ ቦላ ዴንꬃሳ።

ኣይስ ታ ዬሌታና ማላ ኦꬃዲ?

ኦኒካ ታና ቤኦንታ

ታ ሃይቃይቺዳኮ

ሎኦኮሺን!

ታኒ ታ ኣዬይ ኡሎፔ

ዱፎን ቢዳኮ

ታስ ሎኦ ጊዳናኮሺን!

ቃንꬅ ጊዴኬ?

ሄ ቃንꬃ ላይꬃይን

ጉꬃራ ታ ኡፋዬታና ማላ

ታና ኣጋርኪ!

ሃ ሲማናስ ዳንዳዮንታ

ጊርዲ ጊዳ ꬉማሶ

ባናፔ ሲንꬃና።

ሺሮይ ኩሚዳ ቢታ፤

ሄን ዲዛ ፖኦዚ ꬉማ ማላ።»