11
ዞፋሬ ሃሳያ
1 ናኢማኔ ዴሬ ኣስ ዞፋሬይ ሂዝጊዴስ፤
2 «ሃይሳ ሃ ሃዳ ቃላታስ ኡባስ
ዛሮ ኢሚዛይ ባዬ?
ኣሲ ሃሳያ ዳሮን
ጺሎ ጊዳና ዳንዳይዜ?
3 ኢዮቤ! ኔ ሃሳይዳ
ሃዳ ሃሳያታስ
ዛሮይ ኢሜቶንታ ሚሳቲዜ?
ኔ ሃይሳ ማላ ቂልጪሺን
ኔና ሴራና ኣሲ
ባይንዳዝ ሚሳቲዜ?
4 ኔ ቆፋን፥ ‹ታኒ ጺሎ› ጋሳ፤
ጾሳስካ፥ ‹ኔ ሲንꬃን
ታኒ ጌሻ› ጋሳ።
5 ጾሲ ኔስ ሃሳይዳኮኔ
ሊኬ ዛሮ ኢሚዳኮ
ኣዜ ዲዛይ!
6 ኤራቴꬃስ ኦጌይ
ዳሮ ጊዲዳ ጊሻስ፥
ጾሳይ ኔስ ኤራቴꬃ
ጹራ ቆንጪሲዳኮ
ኣዜ ዲዛይ!
ሄሳ ጊሻስ
ጾሲ ኔና ቃጻዪዛይ
ኔስ ቤሲዛይሳፌ
ጉꬃራ ጊዲዳይሳ ኤራ።
7 «ኔኒ ጾሳስ ጪማ ጊዲዳ ጹራ
ኤራናስ ዳንዳያይ?
ኡባ ዳንዳይዛ ጾሳ
ፒልጋዳ ጋካናዉ ዳንዳያይ?
8 ኢዛ ጊታቴꬃይ ሳሎፔ ቦላ፤
ኔኒ ኣይ ኦꬃናዉ ዳንዳያይ?
ኢዛ ጪማቴꬃይካ
ሲኦሌፔካ ዚቃ፤
ኔኒ ኣይ ኤራይ?
9 ጾሳ ጊታቴꬃይ ቢታፌ ዳሬስ፤
ኣባፌ ኣኬስ።
10 ጾሲ ዪዲ ቃቺኮ፥
ጌዴ ፒርዳ ኬꬅ ሺሺዳኮ
ኦኔ ኢዛ ዲጋናይ?
11 ጾሲ ጎኦንታ ኣሳታ ኤሬስ፤
ኢዚ ቆሆ ቤዪሼ
ጮኡ ጊዲ ጼሌና።
12 ኤያ ኣሲ ኤራንቻ ጊዳናፔ
ሃሬይ ኣስ ጊዲዲ
ዬሌታናይሲ ካዉያና፤
13 ጊዲኮካ ኔኒ
ኔ ዎዚና ሱሪሲኮ፥
ኔ ኩሼዛ ሚጫዳ
ፑዴ ጾሳኮ ዎሲኮ፥
14 ኔኒ ናጋራፔ ሃኪኮ፥
ኢታ ሚሺካ
ኔሶን ቤቶንታ ማላ
ኔ ኦꬂኮ፥
15 ሄ ዎዴ ꬎቁ ጋዳ
ዬላይ ባይንዳ ኡባ ሚሽ
ኔ ቤያና፤
ዬላይ ባይንዳ
ሚና ኤቃናዉ ዳንዳያሳ።
16 ኔ ሜቶዛ ኡባ ኔ ዶጋና፤
ኔ ኣኬኪዛይካ
ኣꬊ ቢቺዳ
ሃሮ ሃꬃ ማላ ጊዳና።
17 ኔ ሼምፖያ ሴታ ጋላሳ
ኣዋፔ ኣꬋዳ ፖኣና፤
ꬉማይካ ዎንታ
ፖኦ ማላ ጊዳና።
18 ኔስ ሂዶታይ ዲዛ ጊሻስ
ኔኒካ ኣማኔታዳ ዳና፤
ጾሲ ኔና ናጊዛ ጊሻስ
ኔኒ ሂርጋይ ባይንዳ
ዎፑ ጋዳ ዳና።
19 ኔ ኦናስካ ባቦንታ ኢቻና፤
ዳሮ ኣሳቲካ ኔ ሲንꬃን
ቦንቾ ዴማናስ ኮያና።
20 ኢታታ ኣይፌይ ቆቃና፤
ኢስቲ ኣታና ኦጌቲ ኡባይ
ጎርዳ ጊዳና፤
ኢስታ ዉርሴꬃይካ ሃይቆ።»