18
ቤሊዳዴ ሃሳያ
1 ሹሃ ዴሬ ኣስ ቤሊዳዲ
ሂዝጊ ዛሪዴስ፤
2 ኢዮቤ! ኔ ኣይስ
ሃይሳ ማላ ሃሳያ ዳርሳይ?
ኣኔ ኤዝጋ፤ ኑኒካ ሃሳዮስ።
3 ኔኒ ኑና ኣይስ ሜሄታ ማላ ቆዳይ፤
ኔኒ ኣይስ ኑና ቱሌታ ማላ
ኣኬኮንታ ኣስ ኦꬃ ጼላይ?
4 ኔኒ ሃንቄቲኮ ኔና ቆሃሳ ኣቲን
ኔ ሃንቆዛን ቢታይ
ሜላ ኣቴና።
ዛላቲካ ባ ዲዛሶፔ
ቃጼቴና።
5 ናጋራንቻ ጾምፔይ ቶኣና፤
ታማ ላጮይካ ናምኣንꬆ ቤቴና፤
6 ኢዛ ዱንካኔ ጊዶን ዲዛ
ፖኦይ ቶኣና፤
ፖኦዚካ ꬉማና።ኢዮ 21፡17
7 ኢዛስ ሚኖ ታንጎይ
ቃሚ ቃሚ ባና፤
ጌኔ ቆፒዛዴ ቆፋይ
ኢዛ ዛሪ ኩንዲሳና።
8 ኢዚ ባርካ ቢዲ ዎጺማዴን ጌላና፤
ኢዛ ቶሆይካ ጊቴን ቃጼታና።
9 ዎጺማዴይ ኢዛ ቂርጴ ኦይካና፤
ሄንካ ዋጺ ኣሻና።
10 ሳኣ ቦላ ያርዴ ዎዶሮይ
ሚጬቲዴስ፤
ኢዛ ኦጌንካ ዎጺማዴይ
ጊጌቲዴስ።
11 «ያሺ ኢዛ ጊዶꬂዴስ፤
ጉዬራ ካሊ ካሊ
ጎዴሬꬄስ።
12 ኢዛ ዎልቃይ ኮሻን ዉሪዴስ፤
ቦሻይካ ኢዛ ꬋይሳናስ
ጊጌቲዴስ።
13 ሃርጌይ ኢዛ ኣሳቴꬃ ጊልቂሳና፤
ሃይቆይካ ሙሌራ ኤኪ ባና።
14 ሂርጋይ ባይንዳ ኣማኔቲ ዲዛ
ኬꬃፌ ኢዚ ጎዴታና፤
ኣስ ኡባ ሃሪዛ ሃይቆይ
ኢዛ ኤካና።
15 ኢዛ ኬꬃን
ኣይ ሚሺካ ኣቴና፤
ኢዚ ኣቂዛሶዛንካ
ዲኔ ታማይ ላሌታና።
16 ጻጶፔ ሜሊዛ ሚꬃ ማላኔ
ሃጋቲካ ሜቄሬቲዛ
ሚꬃ ማላ ጊዳና።
17 ቢታ ቦላ ኢዛ ቆፒዛ ኣሲ ዴና፤
ኢዛ ጎባቴꬂካ
ቢታፌ ꬋያና።
18 ኢዚ ፖኦሶፔ
ጌዴ ꬉማን ጎዴታና፤
ቢታ ቦላፌ ኢዚ ኪቻና።
19 ኢዛ ዳቦታ ጊዶፌ
ኢዛ ላታና ዬሌታይ ቤቴና፤
ኢዛ ባቻንካ
ዛሬይ ኢዛስ ኣቴና።
20 ኡሻቻ ባጋራኔ
ሃዲርሳ ባጋራ ዲዛ ኣሳይ፤
ኢዛ ቦላ ጋኪዳ ሜቶዛ ጊሻስ
ኬሂ ባቢዲ ኮኮራና።
21 ኣይ ዎዴካ ኢታ ኣሳታ ዉርሴꬃይ
ሄሳ ማላ፤
ጾሳስ ያዮንታ
ኣሳ ቃዳይ ሃይሳ።»