ኣዉዴ ጋካናስ ዋዪሳንዴቲ?

ኣዉዴ ጋካናስ ዮኦን

ታስ ሜቄꬅ ሜንꬃንዴቲ?

ታና ካዉሺሼካ

ዬላቴኬታ።

ታ ባላይ ታና ጻላ ቆሃና።

ታ ካዉሻቴꬃ ኢንቴስ

ማርሼ ሚሽ ኦꬄታ።

ታ ቦላ ጋꬂዳይኔ፥

ጊቴ ጊዶ ታና ዬጊዳይ

ጾሳ ጊዲዳይሳ

ኢንቴ ኤራና ማላ ታ ኮያይስ።

ታና ሲዪዛ ኣስ ዴማቤኬ፤

ታ ቃላ ꬎቁ ኦꬃዳ

ማጋኒኮካ

ሱሬ ፒርዳ ዴማቤኬ።

ኣꬋናሶይ ዴና፤

ታ ባናሶዛካ

ꬉማን ጎርዲዴስ።

ታና ካዉሺዴስ።

ቆጼሬꬂዲ

ሙሌራ ላሊዴስ፤

ታስ ዲዛ ሂዶታ

ጻጶፔ ሾዴቲዲ ኩንዲዛ

ሚꬃ ማላ ኦꬂዴስ።

ታ ቦላ ጋꬂዴስ፤

ባስ ሞርኬ ማላ ታና ቆዲዴስ።

ባ ኦሳንቻታ ኪቲዴስ፤

ታስ ዱንካኔዛ ዩዪ ኣꬊዲ

ታና ጊዶꬂዳ።

ታፔ ሃካና ማላ

ኦꬂዴስ፤

ታና ኤሪዛ ኣሳቲ ኡባይ ታና

ኣሳ ዴሬ ኣስ ኬሲዳ።

ታ ላጌቲካ ታና ባሊዳ።

ሞካ ኤኪዳይቲ

ኡባይ ታና ባሊዳ፤

ታ ጋራዴቲ

ታና ኢማꬃ ማላ ቆዲዳ፤

ኣላጋ ማላካ ጼሊዳ።

ኢዚ ታስ ኮዬና፤

‹ታና ማዳርኪ›

ጋ ታ ዋሲሺንካ

ኤሮ ጌና።

ፔኖዛ ሻቴታዱስ፤

ታ ኢሻቲካ ሃራሬቲዳ።

ታና ቤኢዛ ዎዴ

ታ ቦላ ቂልጬቴስ።

ታና ሻቴቲዳ፤

ታ ሲቆቲ ታ ቦላ

ሞርኬ ጊዲ ዴንዲዳ።

ጋልባዚ ሜቄꬃራ ኦይኬቲዴስ፤

ታና ሺሺን ኣታዲስ።

ታና ሾጪዳ ጊሻስ

ኣኔ ዛይ ታስ ሚሼቲቴ!

ታስ ቃꬌቲቴ!

ኢንቴካ ታና ኣዛስ ጎዴቲ?

ሃይሳ ጋካናስ ኢንቴ ታና

ዋዪሲዳይሲ ጊዴኔ?

ታ ሃሳይዳ ቃላ ኣኬኪዛይኔ

ማጻፋን ጻፊዛ ኣሲ ዲዛኮ

ታና ኣይ ማላ ኡፋይሳኔሺን!

ዎይኮ ሹቻ ቦላ

ዎጬቲ ኡቲዲ

ሜርናስ ዳና ማላ

ኦꬂዳኮ

ኣይ ማላ ታና ኡፋይሳንዴሺን!

ፓጻ ዴኢዛ ማላ

ዉርሴꬃ ዎዴን

ታና ዎዛናስ

ቢታ ቦላ ኢዚ ኤቃናይሳ

ታኒ ኤራይስ።

ታኒ ታ ኣሳቴꬃፌ ሻኬታዳ

ታኒ ጾሳ ቤያናይሳ ኤራይስ።

ኢዛካ ታኒ ታ ሁኤን

ታ ኣይፌራ ቤያና፤

ታ ዎዚናይካ ሄ ጋላሳዮ

ኬሂ ላሞቴስ።

ታና ዋላሲዲ ዋዪሳናስ፥

‹ሃይሳ ሜቶዛ ኢዚ ባርካ

ባስ ኤሂዴስ› ጊዲ ሃሳዬታ።

ቃጻዬቴꬃን

ጋꬂዛ ጊሻስ ማሻይ

ኢንቴና ሞንታ ማላ ናጌቲቴ።

ጾሳ ፒርዳይ ዲዛይሳካ ኤሪቴ።»