ሂዝጊ ዛሪዴስ፤

ኔ ቦላ ዛሮ

ኢማና ማላ ሱጊዴስ፤

ሄሳ ጊሻሳ

ታ ሃሳያናዉ ኤሶቲዳይ።

ታ ኣኬኪዛ ኣኬካዚ

ታና ኔስ

ዛሮ ኢማ ኢማ ጌስ።

ቤቶሶፌ ዶሚዲ

ካሴፔ ሃይሳ ማላ

ጊዶይሳ ኔ ኤራይ?

ጉꬃ ዎዴሳ፤

ጾሳ ካዲዛ ኣሳታስ ዲዛ

ኡፋይሳይ ቂጲዳ ኣይፌይ

ጼላና ጋካናሳ።

ሳሎ ጋኪኮካ፥

ኢዛ ሁኤይ ሻራ ጋኪ

ቦቺንካ፥

7 ኢዚ ባ ሼሻ ኡቴꬃ ማላ

ሙሌራ ፒቴታና፤

ካሴ ኢዛ ቤዪሼ ዲዛ ኣሳቲካ፥

‹ኢዚ ኣዋን ዲዜ ጋኔ?›

ꬋይዛ ጊሻስ ቤቴና፤

ኦማርሳ ኤሉንꬃ ማላ

ኢዚ ꬋያና።

ꬋይዛ ጊሻስ፥

ኢሲቶ ኢዛ ቤኢዳ ኣስ

ናምኣንꬆ ዛሪ ቤዬና።

ኢስታ ኣዋይ ማንቆታፔ

ጌኔራ ቦንቂዳ

ሚሻ ዛራና።

ኣሳቴꬃይ ጉꬃ

ዎዴፔ ጉዬ ቢታ ጊዳና።

ካꬃ ማላ ኣይ ማልኢኮካ

ባ ኢንጻርሳን ኢዚ ላጪ ጼሊኮካ፥

13 ዉሮንታ ማላ ዶናን

ጮሚሼ ጋምኢኮካ

14 ኢዛ ኡሎ ጊዶን

ጫሞን ላሜታና፤

ኢዛስ ሾሻ

ማርዜ ማላ ጊዳና።

ኡንኤቲ ዛራና፤

ኡሎ ጊዶን ዲዛይሳካ

ጾሲ ኢዛ ጮሻና።

ኢዛስ ሾሻ

ማርዜ ማላ ጊዳና፤

ሾሻ ማርዜ ማላ ጊዲዲ

ኢዛ ዎꬋና።

ኤሲኔ ማꬂ ሻፋ

ሃꬃ ማላ ጎጊሺን

ኢዚ ቤኦንታ ሃይቃና።

ዛሬꬂ ጌዴ ኢማና ኣቲን

ባ ሁኤስ ሜና።

ዛልኢዲ ኢዚ ሺሺዳ

ዴኦዛንካ ኡፋዬቴና።

ኢዚ ማንቆታ ኡንኤꬂዳ

ጊሻሲኔ

ባ ኦꬆንታ ኬꬃ

ጌኔን ኤኪዳ ጊሻሳ።

ኢዛስ ሼምፖ ꬋይሲዴስ፤

ኢዚ ሺሺዳ ሃሮይካ

ኢዛ ኣሻናዉ ዳንዳዬና።

ቁጬቲ ዉሪዛ ጊሻስ

ኢዛስ ዶናን ጌልꬃናዚካ

ኣቴና።

ኢዛ ዪሎይ ጋካና፤

ዳሮ ሜቶይካ ኢዛራ ጋይታና።

ጾሲ ዎልቃማ ሃንቆ

ኢዛ ቦላ ዬጋና፤

ባ ሃንቆዛካ ኢዛ ቦላ ጉሳና።

ጻርቂማላ ዎንዳፌን ጫዴታና።

ካንꬂ ኬኣና፤

ጾጾልቁ ጊዛ ጼራዚ ኢዛስ

ቲሬዛ ዱሴሬꬂዲ ኣꬋና፤

ዎልቃማ ሂርጋን

ኢዛ ዎዚናይ ዳጋማና።

ኡባይ ጊርዲ ጊዳ

ꬉማ ጊዶን ꬋያና፤

ኣሲ ኦይꬆንታ ታማይ ጹጋና፤

ኢዛሶን ኣቲዛ ሚሽ ኡባ

ዲፒ ሂስታና።

ሳሎይ ቆንጪሳና፤

ሳኣያካ ኢዛስ

ሞርኬ ጊዳዳ ዴንዳና።

ኢዛ ሶን ዲዛ ሃሮይ ዉሪ

ዲኦን ቁጬቲ ꬋያና።

ዎꬂዳ ቃዳይ፥

ኢታ ኣሳቲ ኤካና ዋጋይ ሃይሳ።»