21
ኢዮቤ ሃሳያ
1 ኢዮቢካ ሂዝጊ ዛሪዴስ፤
2 «ኣኔ ታ ሃሳያ
ዎዚናፔ ኤዝጊቴ፤
ሃይሲ ኢንቴ ታና
ሚንꬄꬂዳ ማላ
ኢንቴስ ቆዴታና።
3 ኢሲቶ ሃሳያና ማላ
ታስ ጊሺ ኢሚቴ፤
ሄሳፌ ጉዬ ኢንቴ ኮዪዳ ማላ
ታና ቂꬋናዉ ዳንዳዬታ።
4 «ታኒ ኣሾ ማይኢዳ ኣሳ
ቦላ ሚሼታዚና?
ሂስቲን ታስ ዳንዳዮንታ ኣጊኮ
ኢዛን ኣዚ ማላሊሲዜ?
5 ኣኔ ታኮ ሃ ጼሊቴ፤
ሃሳያይ ኢንቴና
ጾናናሼ ጋካናስ
ታ ሃኖዚ ኢንቴና ሻጴስ።
6 ታኒ ቆፒሺን ታናካ ዳጋንꬄስ፤
ታ ኣሳቴꬃካ
ያሻን ኮኮሪሴስ።
7 «ኣይስ ኢታ ኣሳታ
ላይꬃይ ኣዱቂዲ
ኢስታ ሃሮይካ ዳሪዲ
ቢታ ቦላ ዲዜ?
8 ኣይስ ኢስታ ናይቲኔ ናይታ ናይቲ
ዲጪዲ ሎኢ ዲሺን ቤዪዞ?
9 ኢስቲ ኣይኮ ሂርጋይ ባይንዳ
ሳሮን ዴቴስ፤
ጾሳፌ ቦሻይ
ኢስታ ቦላ ጋኪ ኤሬና።
10 ኢስታ ሜሄቲካ
ኢሲ ሜቶይ ባይንዳ ዬሌቴቴስ፤
ኢስታስ ሚዛቲካ
ኣዉጫዮንታ ዬሌቴስ።
11 ባንታ ናይታ
ዶርሳ ዉዴ ማላ ሄሜቴስ፤
ኢስታ ናይቲካ
ጉፒ ጉፒ ካኤቴስ።
12 ካራቤ ባቂሼ፥ ዲꬂ ዲጺሼ፥
ዲንኬ ፑኒሼ
ኡፋይሳን ዬጼቴስ።
13 ባንታ ላይꬃ ዎጌቴꬃኒኔ
ኡፋይሳን ኣꬄቴስ፤
ዋዬቶንታ ሃ ቢታፌ
ሃይቆን ሻኬቴቴስ።
14 «ሄሲ ሄሳꬆ ጊዲ ዲሺን
ኢስቲ ጾሳ፥
‹ኑፔ ሃካ፤ ኔ ኦጌ ኤራናስ
ኑ ኮዮኮ› ጌቴስ።
15 ‹ኑ ኢዛስ ጎይናና ማላ
ኡባ ዳንዳይዛ ጾሳይ
ኢዚ ኦኔ?
ኑ ኢዛ ዎሲን ኢዚ ኑና
ኣይ ማዳኔ?› ጌቴስ።
16 ኢስቲ ሄሳ ጊዛይ
ኢስታ ኩሼን ዲዛ ሃሮይ ዉሪ
ኢስታ ዎልቃን ኢስታስ ሺቂዳ
ሚሳቲዛ ጊሻሳ።
ታኒ ጊዲኮ
ኢታ ኣሳታ ቆፋ ኤኪኬ።
17 «ሂስቲን ኢታ ኣሳታስ ጾምፔይ
ቶኢ ኤሪዜ?
ቦሻይ ኢስታ ቦላ ጋኪ ኤሪዜ?
ጾሲካ ኢስታ ቦላ
ሃንቄቲ ኤሪዜ?
18 ኢስቲ ሃፓ ማላ ጫርኮን ቢዳሶይ
ጉዱላ ማላ ጎቴ ጫርኮን
ኢስቲ ፒቴቲ
ꬋይዳ ዎዴይ ዲዜ?
19 ኢንቴ፥ ‹ኣዋቲ ቆሂዳ ቆሆን
ጾሲ ናይታ ሃንቄቴስ› ጌታ፤
ኣኔ ጾሲ ናጋራንቻታ
ቃጻዮ፤
ሄሳꬆ ሃንኮ ባንታ ቆሆ
ኢስቲ ኣኬካናዉ ዳንዳዬቴስ።
20 ናጋራንቻቲ ባንቲ ኦꬂዳ
ቆሆን ባንታ ቂጻቴ ኤኬቶ፤
ኡባ ዳንዳይዛ ጾሲ
ባ ሃንቆዛ ኢስታ ቦላ ኤሆ።
21 ኣሲ ሃይቂዳፔ ጉዬ
ባ ናይታስ ቆፒ ኤሪዜ?
22 «ጾሲ ጊታ ኣሳታ ቦላካ ፒርዳና፤
ሂስቲን ኣሲ ኢዛ ፒርዳ
ታማርሳና ዳንዳይዜ?
23 ኢሲ ኢሲ ኣሳቲ
ባንታ ላይꬃ ዉርሴꬂ
ጋካናስ ኣይኮ ሜቶይ
ኢስታ ቦላ ጋኮንታ ሚኖታኔ
ሃርጌይ ባይንዳይታ ጊዲዲ
24 ኢስታ ቦላይ ኦርዲዲ
ካይሺዳ ማላ፥
ኢስታ ሜቄꬃይካ
ሺጪዳ ማላ ሃይቄቴስ።
25 ሃራቲ ጊዲኮ ዪሎኔ
ጫሞን ኩሚዳ ማላ
ሜቶን ኦይኬቲዳ ማላ
ኣይኮ ሎኦ ሚሽ
ቤኦንታ ሃይቄቴስ።
26 ኡባይካ ዱጌ ዱፎን ጌሊዲ
ቢታ ጊዴቴስ፤
ጉጹኔይካ ኢስታ ላታና።
27 «ቤኢቴ! ታና ቆሃናስ
ቆፒዲ ኢንቴ ቃቺዳ
ጌኔዛ ታ ኤራይስ።
28 ኢንቴ፥ ‹ሃይሳ
ጊታ ኣዳሶይ ኣዋኔ?
ናጋራንቻዛ
ዱሳሶይ ኣዋኔ?› ጌታ።
29 ማንዳራ ኣሳታ ኦይቺቤኬቲ?
ኢስቲ ኢንቴስ ማርካቲዳ
ማርካቴꬃ
ኢንቴ ኤኬኬቲ?
30 ሄይቲ፥ ‹ኢታ ኣሳታ ቦላ
ቦሻይ ዪዛ ዎዴ
ቆሆይ ኢስታ ጋኬና፤
ጾሳ ሃንቆይ ቆንጪዛ ዎዴ
ኢስቲ ኣቲ ባና› ጊዲ ሃሳይዳ።
31 ኢታ ኣስ ኢዛ ኢታቴꬃ ጊሻስ
ዋላሲዛይ ኦኔ?
ኢታ ኦሶዛ ጊሻስ
ኢዛ ቃጻያናይ ኦኔ?
32 ኢዚ ሃይቂዳፔ ጉዬ
ኢዛ ኣሃ ቶኪ ኤኪዲ
ዱፎን ኤፌቴስ፤
ኢዛ ዱፎይካ ናጌቴስ።
33 ሾባን ዲዛ ቢታይ
ኢዛስ ጊጋ ጊዴስ፤
ኣሳቲ ኡባይካ ኢዛ ካሌቴስ፤
ኣዳፌ ዳሮ ኣሳቲካ
ኢዛፔ ሲንꬃራ ቤቴስ።
34 «ሂስቲን ኢንቴ ሃዳ ጊዲዳ ዮኦራ
ታና ሚንꬄꬃናስ
ኣይስ ቆፔቲ?
ኢንቴ ታስ ኢሚዛ
ዛሮቲ ኡባይ ዎርዶ።»