27
ኢዮቤ ሃሳያ
1 ኢዮቢካ ባ ሃሳያ
ሲንꬃዉ ጉጂዲ ሂዝጊዴስ፤
2 «ሱሬ ፒርዳ ዲጊዲ
ታ ሼምፖዮ
ኣዳፌ ጫሞ ኦꬂዳ፤
ኡባ ዳንዳይዛ ዴኦ ጾሳ
ሱንꬃን ጫቃይስ፤
3 ጾሲ ታና
ሼምፖራ ዎꬂዳ
ዎዴይ ጋካናስ፥
4 ኡባካ ኢታ ቃላይ
ታ ዶናፔ ኬኤና፤
ታ ኢንጻርሳንካ ዎርዶ ሃሳይኬ።
5 ኢንቴ ሃሳይዳይሲ ዉሪ
ሊኬ ጋዳ ሙሌካ ኤኪኬ፤
ታ ሃይቃናሼ ጋካናስ
ሱሬቴꬃን ሚና
ኤቃናይሳ ኣጊኬ።
6 ታኒ ታ ጺሎቴꬃን
ሚና ኤቃና ኣቲን
ጺሎቴꬃ ኣጊኬ፤
ሼምፖራ ፓጻ ዲዛ
ላይꬃ ኡባን
ታ ዎዚናይ ሃ ሚሻን ሲꬌና።
7 «ናጋራንቻታ ቦላ
ፒርዴቲዛ ማላ
ታ ሞርኬታ ቦላ ፒርዴቶ፤
ታና ኢጺዛይታ ቦላካ
ጌኔ ኣሳታ ቦላ
ፒርዴቲዛ ማላ ፒርዴቶ።
8 ጾሲ ኢስታ ሼምፖዮ
ኢስታ ኣሾፔ ሻኪዲ
ኢስታ ላይꬃ ቃንጺዳ ዎዴ
ጾሳ ካዲዳ ኣሳታስ
ኣይ ሂዶታይ ዳንዴ?
9 ሜቶይ ኢስታ ቦላ ዪዛ ዎዴ
ጾሲ ኢስታ ዋሶዛ ሲያንዴ?
10 ኡባ ዳንዳይዛ ጾሳን
ኢስቲ ኡፋዬታንዴቶ?
ዎዴን ዎዴንካ
ጾሳ ሱንꬃ ጼይጋንዴቶ?
11 «ጾሳ ዎልቃይ ኣይ ማላ ጊታኮ
ታ ኢንቴና ታማርሳና፤
ኡባ ዳንዳይዛ ጾሳይ
ቆፒ ዎꬆይሳ
ታ ኢንቴፌ ቆቲኬ።
12 ኢንቴኒካ ሃይሳ ኡባ ኤሬታ፤
ሂስቲን ሃይሳ ሃዳ ሚሽ
ኣይስ ሃሳዬቲ?
13 «ሄኮ ኡባ ዳንዳይዛ ጾሳይ
ኢታ ኣሲኔ ጌናንቻቲ
ኤካና ላታይ
ሃይሳፌ ካሊዛይሳ።
14 ኢዛ ናይቲ ቲሪፒኮካ ኦላን ዉራና፤
ኢዛ ዜሬꬃቲካ
ካꬂ ꬋዪን ኮሻታና።
15 ሄሳፌ ኣቲዳይቲ ሃርጌን ዉራና፤
ኣምኤቲካ ኢስታስ ዬኬቴና።
16 ኢታ ኣሲ ቢራ
ቢታ ማላ ሺሻናዉ፥
ማይኦካ ማና ቢታ ማላ
ዶራናዉ ዳንዳዬስ።
17 ጊዶ ኣቲን ኢታ ኣሲ ሺሺዳ
ማይኦዛ ጺሎ ኣሲ ማይኣና፤
ኢዚ ሺሺዳ ቢራካ
ጌሻቲ ጊሼቲ ኤካና።
18 ኢዚ ኬጺዛ ኬꬃቲካ
ኣቻሮ ኬꬃ ማላኔ
ካꬅ ናጊዛዴይ ኣቂዛ
ጋባ ማላ ላሌታና።
19 ኢታ ኣሲ ዉርሴꬃ ዎዴ
ዱሬ ጊዲዲ ኢቼስ፤
ኢዚ ቤጊዛ ዎዴ ጊዲኮ
ኢዛ ኣቆታይ ኡባይ ꬋይዴስ።
20 ዳጋማይ ኢዛ ቦላ ዲኦ ማላ
ቆፖንታ ዲሺን ጋካና፤
ጊዶꬂካ ጎቴ ጫርኮይ
ኢዛ ዴንꬂ ኤፋና።
21 ኣርሼይ ሞኪዛሶ ባጋ ጫርኮይ
ኢዛሶፔ ኢዛ ፒቲ ꬋይሳና።
22 ኢዚ ባቃቲዲ ኣቲ ባናስ
ባጼቲኮካ
ጫርኮዚ ቃꬌቴꬂ ባይንዳ
ኢዛ ቦላ ጌዴ ሚናና።
23 ጫርኮዚ ኢዛ ቦላ ኩሼ ባቂዴስ፤
ኢዚ ዲዛሶፔ ዋይቄꬃን
ፒጺሪ ዬጊዴስ።