28
ኣꬎ ኤራቴꬅ ናሻናስ ሺቂዳ ጊንጾ
1 «ቱማፔ ቢታ ጋርሳን ዲዛ
ማኢዲኔቲ ቦኬቲዲ
ቢራ ኬኢዛሶይኔ
ዎርቃይ ሴሪ ኦሴቲዛሶይ ዴስ።
2 ቢራታይ ቢታፌ ቤቴስ፤
ጻርቂማላይ ማኢዲኔ ሹቻፌ
ሴሪዲ ኬኤስ።
3 ኣሳይ ꬉማ ካንꬂዲ፥
ዱጌ ቢታ ጊዶ ቦኪ ጌሊዲ
ሃኪ ዲዛሶዛ ዱጌ ዎꬊዲ
ጊርዲ ጊዳ ꬉማ ጊዶን
ማኢዲኔ ሹቻ ኮዬቴስ።
4 ኣሲ ዲዛሶፔ ሃኪዲ፥
ኣሳ ቶሆይ ዬꬊ ኤሮንታሶ
ጋኬቴስ።
ሄንካ ጪማ ኦላ
ቦኬቴስ፤
ዎዶሮ ቦላራ
ኩሎቲ ኩሎቲ ዎꬊዲ
ኣሳፔ ሻኬቲ ባርካ
ኦꬄቴስ።
5 ቢታይ ሜቴቲዛ ካꬅ ኢሜስ።
ኢዛስ ጊዶይ ታማን ሴሪዲ
ሺሬቲ ሺሬቲ ዎꬌስ።
6 ሴምፔሬ ጌቴቲዛ ኣልኦ ሹቻይ
ቢታን ዲዛ ሹቻታ ጊዶን ቤቴስ፤
ሄ ቢታ ጊዶንካ
ዎርቃይ ቤቴስ።
7 ጌዴ ማኢዲኔዛኮ ኤፊዛ ኦጌ
ጺሎይካ ኤሬና፤
ኣንኮታ ኣይፌይካ ቤዪቤና።
8 ኢታ ዶኣቲ ሄ ሶሆዛ
ዬꬊቤቴና፤
ጋሞይካ ኢዛ ባጋራ
ኣꬊቤና።
9 ኣሲ ጋዴ ጎዪሼ ሚኖ ሹቻታ
ባ ኩሼን ዴንꬄስ፤
ዙማታካ ጻጶፔ
ሺሪ ዬጌስ።
10 ዛላካ ጳልቂዲ
ኢዛ ጊዶራ ኣꬋናስ
ኦጌ ኬሴስ፤
ኣልኦ ጊዲዳ ማኢዲኔ
ሹቻታካ ዴሜስ።
11 ሻፋታ ፑልቶታ ቴቄስ፤
ቢታ ጊዶን ቆታን ዲዛ
ሚሻታ ቆንጬ ኬሴስ።
12 ሂስቲን ኣꬎ ኤራቴꬂ
ኣዋፔ ቤቲዜ?
ኣኬካሲካ ዲዛሶይ ኣዋ?
13 ኣꬎ ኤራቴꬂ
ሼምፖራ ፓጻ ዲዛ ሜꬌታቲ
ዲዛ ቢታን ቤቱኩ፤
ኢዚስ ቱማ ዋጋካ
ኤሪዛ ኣሲ ዴና።
14 ‹ዎጋ ጊታ ኣባይካ
ታ ጊዶን ዱኩ፤
ኣባይካ ታናራ ዱኩ› ጌስ።
15 ኤራቴꬂ ጌሻ
ዎርቃን ሻሜቱኩ፤
ኢዚ ዋጋይካ
ቢራን ሄሬጌቴና።
16 ኣꬎ ኤራቴꬂ
ኦፊሬ ጌቴቲዛ ዎርቃፌ፥
ማርጊዴኔ ሴምፔሬ ጌቴቲዛ
ኣልኦ ሹቻታፔ
ኣꬋ ቦንቼቲዳሮ።
17 ዎርቃይኔ ጌሻ ሄሬጋይ
ኢዚራ ጊናቴቴና፤
ጺንታ ዎርቃፌ ኦሴቲዳ
ጌጼይካ ኢዞ ላማና።
18 ቦንቼቲዳ ሄሌሎይኔ
ኣልማዜ ጌቴቲዛይቲ
ኣꬎ ኤራቴꬃራ ጊናቴቴና፤
ኣꬎ ኤራቴꬃ ጋቴይ
ሉሌ ጌቴቲዛይሳፌካ ቦላ።
19 ቶጳዚዮኔ ጌቴቲዛ
ቶጵያ ቢታ ኢንቁይካ
ኢዚራ ጊኔና፤
ኬሂ ጌዪዳ
ዎርቃፌካ ኣꬋዉስ።
20 «ሂስቲኮ ኤራቴꬂ ኣዋፔ ያዜ?
ኣኬካይካ ኣዋፔ ቤታዜ?
21 ሼምፖራ ፓጻ ዲዛ
ሜꬌታታፔ ጌሚዳሮ፤
ሳሎራ ፒራꬊዛ ካፎቲካ
ኮዪዲ ኢዞ ዴሜቴና።
22 ꬋዮይኔ ሃይቆይ፥
‹ኑ ኢዚ ጊሻስ ኤሪዛይ
ዎሬን ጻላ› ጌቴስ። *ዎሬ ጊዛይሳ ኢሲ ኢሲ ባጋ ጋሞꬆ ቃላን ፓፑንꬃ ጌቴስ።
23 ኣꬎ ኤራቴꬃኮ ኤፊዛ ኦጌዛኔ
ኢዛ ዲዛሶዛ ኤሪዛይ ጾሳ ጻላ።
24 ኢዚካ ሳኣ ጋጻ ኩሜꬅ ዴሜስ፤
ሳሎፔ ጋርሳን ዲዛይሳ
ኡባ ቤዬስ።
25 ኢዚ ጫርኮ ዎልቃ ኦꬂዳ ዎዴ
ዎጋ ጊታ ኣባ
ኢዚ ማኪዳ ዎዴ፥
26 ኢራሲኔ ዎልቃንꬃራ ዲዛ
ዳዳስ ዎጋ ዎꬂዳ ዎዴ፥
27 ጾሲ ኤራቴꬅ ቤዪዴስ፤
ፓጪ ጼሊዲ ኢዞ ቦንቺዴስ፤
ፒልጊ ቤኢዲ ሚንꬂ ዎꬂዴስ።
28 ሄ ዎዴ ኣሳስ፥
‹ሄኮ ኤራቴꬅ ጉሲ
ጾሳስ ያሻቴꬃ፤
ኣኬካ ጉሲ
ኢታፔ ሃኮ› ጊዴስ።»ማዛ 111፡10፤ ኢሳ 1፡7፤ 9፡10