29
ኢዮቢ ዉርሴꬃን ሺሺዳ ማጋና
1 ኢዮቢካ ባ ሃሳያ
ሲንꬅ ጉጂዲ ሂዝጊዴስ፤
2 «ታስ ሃኢ ዴኦዚ
ካሴ ጾሲ ታና
ናጊዛ ዎዴዛ ማላ ጊዲዳኮ
ታና ኣይ ማላ ኡፋይሳንዴሻ!
3 ሄ ዎዴ ꬉማ ጊዶራ ታ ቢሺን
ጾሲ ታስ ፖኢሲሺን
ታኒ ፖኦን ሄሜታይሲኮሺን።
4 ጾሳ ማዶይ ታ ኬꬃ
ካሴ ናቴቴꬃ ዎዴ
ናጊዛይሳꬆ
ሃኢካ ናጊዳኮ
ኣዜ ዲዛይ?
5 ኡባ ዳንዳይዛ ጾሳይ
ታናራ ዲዛ ጊሻስ
ታ ናይቲ ኡባይ
ታ ዩሾን ዴቴስኮሺን።
6 ታኒ ቶሆ ማꬃን
ሜጬታናሼ ጋካናስ
ዳሮ ማꬅ ዴማይስኮሺን፤
ዎጋራ ሚꬃቲ
ሜላ ቢታንካ ቶኬቲዲ
ዲኦ ማላ ጎጊዛ ዳሮ ዛይቴ
ታስ ኢሜቴስኮሺን።
7 ካታማ ፔንጌ ኣቻን ዲዛ
ዱቡሻ ባዳ
ዱላታን ታ ኡቲዛ ዎዴ፥
8 ናቴꬃ ናይቲ ታና ቤኢዲ፥
ቦንቾስ ታ ሲንꬃፌ
ኢሲ ባጋ ጌቴሲሺን፤
ጪማቲካ ታ ቦንቾ ጊሻስ
ባ ኡቲዳሶሆፔ
ዴንዲ ኤቄቴሲሺን።
9 ሃሳይሼ ዲዛ ዴሬ ካሌꬂዛይቲ
ታና ቤኢዲ ባንታ ኩሼታን
ባ ዶና ዶና ኦይኪዲ
ጮኡ ጌቴስኮሺን።
10 ዴሬ ዳናቲካ ታኒ ዲዛሶን
ጮኡ ጌቴሲሺን፤
ኢስታስ ኢንጻርሲ ኦይኬቲን
ሃሳያይካ ኢስታ ጾኔስኮሺን።
11 ታና ሲዪዳ ኡባይ ናሺዴስ፤
ታና ቤኢዳ ኡባይ ጋላቲዴስ።
12 ሃይሲካ ሃኒዳይ
ታኒ ማንቆታ ዎሳ ሲያዳ
ኢስታ ኣሺዛይሳኔ
ዪኦ ናይታ ታ ማዲዛ ጊሻሳ።
13 ሃይቃና ማቲዳ ኣሳታ
ታ ማዲዛ ጊሻስ
ታና ኢስቲ ኣንጂዳ፤
ኣምኤ ማጫሳታ
ታ ማዲዛ ጊሻስ
ኡፋይሳን ዬጺዳ።
14 ጺሎቴꬅ ማይኦ ማላ ማይኣዲስ፤
ሱሬ ፒርዳካ
ካባ ማላ ጎጳ ማይኣዲስ፤
ቆቤ ማላካ
ሁኤን ዎꬃዲስ።
15 ቆቄታስ ኣይፌ፥
ዎቤታስካ ቶሆ ጊዳዲስኮሺን።
16 ማንቆታስ ኣዋ፥
ታ ኤሮንታ ኣሳታስካ
ኣፓካቶኮሺን።
17 ጌኔ ኣሳ ባንቂላ ሜንꬃዲስ፥
ኢዚ ቦንቂ ኤኪዳይሳካ
ኢዛ ዶናፔ ዬጊሳዲስ።
18 «ታኒ፥ ‹ታ ላይꬃይ
ኣንጮ ማላ ዳሪን
ታኒ ታሶን ዲዛ ማላ
ቦንቾን ሃይቃና›
ጋዲስኮሺን።
19 ጻጶቲ ኡባ ዎዴ
ሃꬄ ዴሚዛ ማላኔ
ሃጋቲካ ጻዛን
ጪሊሊዛ ሚꬃ ማላኮሺን።
20 ኡባ ዎዴ
ታ ቦንቼቲዳ ማላ
ዳይስኮሺን፤
ታ ዎልቃይካ
ኡባ ዎዴ ኦራጼስኮሺን።
21 ኣሳይ ታ ዞሬዛ
ላሞታን ጮኡ ጊዲ ኤዝጌስ።
22 ታ ሃሳያይ ኢስታ ኣሊዛ ጊሻስ
ታፔ ጉዬራ ሃሳይዛ
ኣሲ ዴና።
23 ጎሻንቻይ ባꬌሳ
ኢራ ዴማናዉ
ኣሞቲዛይሳ ማላ
ኢስቲካ ታ ሃሳያ ሲያናዉ
ባንታ ዶና ዶይዲ
ናጌቴስኮሺን።
24 ታ ሚጫ ቤሲሺን
ኢስቲ ኡፋዬቴቴስ፤
ታ ሲንꬃይ ፖኢሺን ጺርጶቲዳ
ኢስታ ሲንꬃይ ቢርሼቴስ።
25 ካሴ ታ ኢስቲ
ኮዪዳ ማላ ኣይሳይስኮሺን፤
ባ ኦላ ኣሳ ካሌꬂዛ
ካዎ ማላ
ታ ኢስታ ካሌꬃዲስኮሺን፤
ኢስቲ ሙዞቲሺን
ታኒ ኢስታ
ሚንꬄꬃይሲኮሺን።