34
1 ኤሊሁይ ባ ሃሳያ ጉጂዲ ሂዝጊዴስ፤
2 «ኢንቴኖ ኣꬎ ኤራንቻቶ!
ታ ኢንቴስ ሃሳይዛይሳ ሲዪቴ፤
ኢንቴኖ ኤራንቻቶ
ታ ሃሳያ ኤዝጊቴ።
3 ኢንጻርሲ ካꬃ ማልኦ
ሻኪ ኤሬስ፤
ሄሳꬆካ ሃይꬂ ዮኦ
ሻኪ ኤሬስ። ኢዮ 12፡11
4 ቱሙ ጊዲዳ ዮኦ
ኣኔ ሻኪ ኤሮስ፤
ሎኦ ጊዲዳ ሚሺካ
ኢሲፌ ታማሮስ።
5 «ኢዮቢ፥ ‹ታኒ ጺሎ ሺን
ጾሲ ታና ሱሬ ፒርዳ ዲጊዴስ።
6 ታኒ ቱማንቻሺን
ዎርዳንቻ ማላ ቆዴታዲስ፤
ታ ኣይኮካ ሞሮንታ ዳሼ
ፓጾንታ ማዱንꬃን
ዋዬታይስ› ጊዴስ።
7 ኢዮቤ ማላ ጾሳ ቦላ
ቂልጪዛዴይ ቤታንዴሻ?
8 ኢዚ ኢታ ኦꬂዛይታራ ላጌቴስ፤
ኢዛስ ፔይሻይካ ኢታ ላጌታራ።
9 ‹ጾሳ ኡፋይሳና ጊዲ ኦሶይ
ኣስ ኣይኮካ ማዴና› ጌስ።
10 «ኣኬኪዛ ኣሳቶ
ኣኔ ታና ኤዝጊቴ!
ኢታ ኦሶይ ጾሳፌ፤
ባላ ኦሶይ
ኡባ ዳንዳይዛ
ጾሳፌ ሃኮ!
11 ጾሲ ኣሳስ
ኢዛዴ ኦሶ ማላ ኢሜስ፤
ኢዛስ ኢዛዴ ሄሜꬃ ማላ
ኦꬄስ።ማዛ 62፡12
12 ኡባ ዳንዳይዛ ጾሳይ
ሙሌካ ኢታ ሚሽ ኦꬄና፤
ኣይ ኣሳስካ
ሱሬ ፒርዳ ጌላሴና።
13 ጾሳሲ ቢታ
ሃዳራ ኢሚዳዴይ ዴና፤
ኢዛ ኣላሜ ቦላካ
ሹሚዳዴይ ዴና።
14 ጾሲ ባ ኣያናዛኔ
ባ ሼምፖዛ
ባኮ ዛሪ ኤካና ኮዪዳኮ፥
15 ኣሾ ማይኢዳይ ኩሜꬅ ꬋያና፤
ኣሳ ዜሬꬂካ
ዱጌ ቢታን ሲማና።
16 ኔኒ ኣኬኪዛ ጊዲኮ ሃይሳ ሲያ፤
ታ ኔስ ሃሳይዛይሳ ኤዝጋ።
17 ሱሬ ፒርዳ ኢጺዛዴይ
ዴሬ ኣይሳናስ ዳንዳይዜ?
ኔኒ ጺሎኔ ዎልቃማ ጾሳ
ናጋራንቻ ኬሳይ?
18 ካዎታ ኢንቴ ꬋሌኬታ፤
ሹሜታካ ኢንቴ ኢታ
ጋናይ ኦኔ?
19 ኡባቲካ ኢዛ ሜꬌታታ ጊዲዳ
ጊሻስ ኢዚ ሹሜታ
ሻኪ ማዴና፤
ዱሬታካ ማንቆታፔ
ሻኬና።
20 ኢስቲ ሌላ ጊዶꬅ
ቆፖንታ ሃይቃና፤
ኡባይ ኮኮሪ ꬋያና፤
ዎልቃማቲካ ኦና ኩሼይካ
ቦቾንታ ኪቻና።
21 «ጾሲ ኣሳ ኡባ
ታንጎዛ ጼሌስ፤
ኢሳ ኢሳ ሄሜꬅ ካሌቴስ።
22 ኢታ ኣሳቲ ቆቴታና ማላ
ጊርዲ ጊዳ ꬉማይ ዴና።
23 ጾሲ ኣሳ ቦላ ፒርዳናስ
ባሬ ኢሜና።
24 ዎልቃማ ዳናታ
ዳናቴꬃፌ ዴንꬃናስ፥
ኢስታሶሆን ሃራ ዎꬃናስ፥
ኣይኮ ኦይሻይ ሺቆንታ
ኢዚ ሄሳꬆ ኦꬄስ።
25 ኢዚ ኢስታ ኦሳ ኤሪዛ ጊሻስ
ኢሲ ኦማርስ
ኢስታ ዳናቴꬃፌ ꬋይሳና።
26 ኢስቲ ኦꬂዳ ማካላቴꬃ
ጋሶን ኡባ ኣሳ ሲንꬃን
ማካላንቻታ ቃጻዬስ።
27 ኢዚ ኢስታ ቃጻዪዛይሲ
ኢስቲ ኢዛ ካሊዛይሳ ኣጊዳ
ጊሻሳ፤
ኢዛ ኣዛዞታካ
ኢስቲ ካꬊዳ ጊሻሳ።
28 ኢስቲ ማንቆታ ኡንኤꬂዳ፤
ፑዴ ጾሳኮ ዋሳና ማላ
ኦꬂዳ።
ጾሲካ ማንቆታ
ዋሶዛ ሲዪዴስ።
29 ጾሲ ጮኡ ጊኮ
ኦኔ ኢዛ ቦላ ፒርዳናይ?
ኢዚ ባ ዞኮ ዛሪኮ
ኦኔ ኢዛ ቤያናይ?
30 ሄሳꬆካ ጾሳስ
ያዮንታ ዴራ
ኡንኤꬂዛ ካዎይ
ዴራ ቦላ ዴንዲኮ
ኢዛ ኦኔ ዲጋናይ?
31 «ኢዮቤ! ኔኒ ኔ ናጋራ
ጾሳስ ፓጻዳ
ዛራ ናጋራ ኦꬂኬ ጋ
ቃላ ጌላዲ?
32 ታ ኦꬂዳ ናጋራይ ኣዋይሳኮ
ታና ታማርሳ፤
ታ ሞሪዳ ጊዲኮ
ዛራዳ ኢዛꬆ
ኦꬂኬ! ጋዲ?
33 ሂስቲን ኔኒ ማሬታናፔ
ኢጺስ ጋዳ
ኔኒ ሺሺዛ ቆፋ ማላ
ጾሲ ኔ ኣሞዛ
ኔስ ፖላና ማላ
ኔ ኮያይ?
34 «ታና ሲዪዛ ኣሳቲ
ኣኬኪዛ ኤራንቻቲካ፥
35 ‹ኢዮቢ ኤራቴꬂ ባይንዳ ሃሳዬስ፤
ሁኤይ ባይንዳ ሃሳያታ
ሃሳዬስ› ጌቴስ።
36 ኢታ ኣሳታ ዛሮ ማላ
ዛሪዛ ጊሻስ
ኢዮቢ ዉርሴꬂ ጋካናዉ
ፓጬቲዳኮ ኣዜ ዲዛይ!
37 ኑ ጊዶን ዎጋፔ ካሬ ኬኢዴስ፤
ጾሳ ቦላ ካꬌ ዳርሲዴስ፤
ባ ናጋራ ቦላካ
ማካላቴꬅ ጉጂዴስ» ጌቴስ።