35
1 ኤሊሁይ ባ ሃሳያ ጉጂዲ ሂዝጊዴስ፤
2 «ኢዮቤ ኔ ኔና፥
‹ታኒ ጾሳ ሲንꬃን ጺሎ›
ጊዛይሲ ሊኬ?
3 ‹ናጋራ ኦꬆንታ ኣጊኮ
ታ ኣይ ጎኤታኔ?
ቃሴካ ኣይ ዴማኔ?› ጋዳ
ኔኒ ኦይቻዳሳ።
4 ታኒ ኔሲኔ ኔናራ ዲዛይታስ
ዛሮ ኢማና።
5 «ꬎቁ ጋዳ ፑዴ ሳሎ ጼላ፤
ኔፔ ꬎቁ ጊዲ ዲዛ
ሻራ ኣኬካ።
6 ኔኒ ናጋራ ኦꬂኮ
ጾሳ ኣዛን ቆሃይ?
ኔኒ ኢዛ ዳርሳ ዳርሳ ቆሂኮ
ኢዛ ኣይ ኦꬃናዉ ዳንዳያይ?
7 ኔኒ ጺሎ ጊዲኮ ኢዛስ ኣይ ኢማኔ?
ኢዚ ኔፔ ኣይኮካ ኮዬና።
8 ኔ ናጋራ ኦꬂኮ ቆሃናይ
ኔ ማላ ኣሳታ ጻላ።
ኔ ሎኦ ሚሽ ኦꬂኮካ
ኔ ጎኢዛይ ኣስ ጻላ። ኢዮ 22፡2-3
9 «ኣሲ ሃራይ ዳርሲ
ቆሂሺን ዋሴስ፤
ባፔ ዎልቃቲዛዴ ኩሼፔ
ባና ኣሺ ኤካናዴስ
ማጋኔስ።
10 ጊዶ ኣቲን ኢስታፌ ኦኒካ፥
‹ታና ሜꬊዳ
ጾሳይ ኣዋኔ?
ሌላ ጊዶꬅ
ማዛሙሬ ኢሚዛይሲ ኣዋኔ?
11 ሜሄታፔ ኑና ኣꬂ
ታማርሲዳ፤
ሳሎ ካፎታፔካ
ኣꬎ ኤራንቻታ
ኦꬂዳይ ኢዛ› ጊዳይ ባዋ።
12 ኢስቲ ዋሴቴስ፤
ኢዚ ጊዲኮ ኢስቲ ኦቶራንቻታኔ
ኢታታ ጊዲዳ ጊሻስ
ኢስታስ ዛሮ ኢሜና።
13 ጾሲ ቱማ ዎዚናፔ ጊዶንታ
ዋሶ ሲዬና፤
ኡባ ዳንዳይዛ ጾሳይ
ሄሳ ማላ ኤዝጌና።
14 ኢዮቤ! ኔኒ ታ ጾሳ ኣይኮካ
ቤኢኬ ጊኮካ፥
ኔ ሜቶይ ኢዛ ሲንꬃን
ዴኢዛ ጊሻስ፥
ኔኒ ዳንዳያን
ናጋና ኮሼስ።
15 ቃሴካ ጾሲ ኔና
ባ ሃንቆን ሃንቆንታ
ኣሳ ኢታቴꬃ ጮኡ ጊዲ
ኣꬋና ኔስ ሚሳቲዜ?
16 ኢዮቤ! ኔኒ ጮ ሜላ
ሃሳያ ዳርሳሳ፤
ኤራቴꬂ ባይንዳ
ጮ ጋዳ ሃሳያሳ።»