36
1 ኤሊሁይ ባ ሃሳያ ጉጂዲ ሂዝጊዴስ፤
2 «ጾሳ ጊሻስ ታኒ ሃሳያና
ሃራይ ዲዛ ጊሻስ
ጉꬅ ዳንዳያዳ ታ ጊዛይሳ ሲያ።
3 ታኒ ዳሮሶፔ ዴሚዳ
ኤራቴꬃን፥ ታና ሜꬊዳ
ጾሲ ጺሎ ጊዲዳይሳ
ታኒ ኔስ ኤሪሳይስ።
4 ታ ቃላይ ዎርዶ ጊዶንታይሳ
ኔኒ ሎኤꬃ ኤራ፤
ኔናራ ሃሳያና ታስ ኩሜꬃ
ኤራቴꬂ ዲዛይሳ ኤራ።
5 «ቱሙካ ጾሲ ዎልቃማ፤
ጊዶ ኣቲን ኦናካ ካꬌና፤
ኢዚ ኡባካ ኣኬኬስ።
6 ኢዚ ኢታ ኣሳታ ፓጻ ዎꬄና።
ሜቶቲዳ ኣሳታስ ጊዲኮ
ሱሬ ፒርዳ ፒርዴስ።
7 ጾሲ ጺሎ ኣሳታ ናጌስ፤
ካዎታ ማላ
ቦንቾ ኣልጋን ኡቲሴስ፤
ሜርናስ ኢስታ
ꬎቁ ꬎቁ ሂስቴስ።
8 ጊዶ ኣቲን ኣሲ
ሳንሳላታን ቃሼቲኮ፥
ዎይኮ ሜቶ ጊቴን ኦይኬቲኮ፥
9 ኢስቲ ባ ኦቶሬቴꬃን
ኦꬂዳ ናጋራ ቆንጪሴስ።
10 ኢስቲ ሴራ ሲያና ማላ
ኢስታ ሃይꬃ ዶዬስ፤
ኢስቲ ባንታ ኢታ ኦሳፔ ሲሚዲ
ማሬታና ማላ ኣዛዜስ።
11 ኢስቲ ጾሳስ ኣዛዜቲዲ ኦꬂኮ፥
ባንታስ ኣቲዳ ላይꬃ
ዱሬቴꬃኒኔ
ኡፋይሳን ኦንጋና።
12 ጊዶ ኣቲን ኢዛ ሲዮንታ ኢጺኮ
ኢስቲ ኦላን ዉራና፤
ኢስቲ ባንታ ኤያቴꬃን
ዲሼ ሃይቃና።
13 «ባንታ ዎዚናራ ጾሳ ካዲዛይቲ
ቃጻዬቲዳ ማላ ዳና፤
ኢዚ ኢስታ ቃጻይሺንካ
ኢስታ ካሌꬂዛይቲ
ዎሴቴና።
14 ኢስቲ ባ ፖሊዛ
ኢታ ላይማቴꬃ
ቦሻን ꬋያና፤
ባንታ ዬላጋቴꬃ ላይꬃንካ
ሙልቄቲ ሃይቃና።
15 ጾሲ ሜቶን ኡንኤቲዛይታ
ኢስታ ሜታፔ ኣሻና፤
ኢስታ ጋኪዳ ሜታን
ኢስታስ ቲሚርቴ ኢማና።
16 «ሃይሳ ሃ ዎዴዛን
ጾሲ ኔስ ቆፒዛይ
ኔና ኔ ዲዛ ሜታፔ ኬሲዲ
ሎኦ ካꬂ ኩሚዳ
ማዳን ኤፋናሳ።
17 ሃኢ ጊዲኮ
ኔ ኦꬂዳ ሞራፔ
ዴንዶይሳን ኔ ቦላ
ፒርዴቲዳ ጊሻስ፥
ኔስ ቤሲዛ ቂጻቴ
ኤኮ ቦላ ዳሳ።
18 ኦኒካ ኔና ዱሬቴꬃ ዳሮን
ጪሞንታ ማላ፤
ማታኤንካ ኔና
ባሌꬆንታ ማላ ናጌታ።
19 ኔስ ዲዛ ኣቆታይኔ ጎዳቴꬂ
ዳሮ ጊዲኮካ
ኔና ሜቶፔ ኣሼቴና።
20 ዴራ ዲዛሶፔ ꬋይሲዛ
ꬉማ ዎዴይ
ያና ማላ ኣሞቶፋ።
21 ኔኒ ሜቶ ጊዶን ፓጬቲዛይ
ሄሳ ጋሶን ጊዲዳ ጊሻስ
ሲማዳ ናጋራ
ኦꬆንታ ማላ ናጌታ።
22 «ጾሳ ዎልቃይ
ኣይ ማላ ጊታኮ ኣኬካ፤
ጾሲ ኡባፌ ኣꬎ ኣስታማሬ።
23 ‹ሃይሳ ኦꬃ› ጊዲ
ጾሳ ኣዛዚዛ ኣሲ ዎይኮ፥
‹ኢታ ኦሶ ኦꬃዳሳ› ጊዲ
ኢዛ ዋላሲዛይ ኦኔ?
24 ኢዚ ኦꬂዛ ኦሳ ጊሻስ
ኣሳይ ኡባ ዎዴ ዬꬃን
ጋላቲዛይሳ ማላ፥
ኔኒካ ኢዛ ኦሳስ
ዬꬃን ጋላታ።
25 ኣሳ ዜሬꬂ ኡባይ
ጾሳ ኦሳ ቤዪዴስ፤
ኣሳይ ቲሺ ኦꬂ
ሃኮን ቤዪዴስ።
26 ጾሳ ጊታቴꬃ
ፒልጊዲ ጋካናስ
ኑኒ ዳንዳዮኮ፤
ኢዛ ላይꬃ ቆዳይካ
ኑ ኤራፔ ቦላ።
27 «ጾሲ ሃꬃ ኣባፌ
ፑዴ ሳሎ ኤፌስ፤
ዛሪዲካ ኢራ ሳሎፔ
ዱጌ ቡኪሴስ።
28 ኢራ ሻራፔ ኬሲዲ
ዎልቃማ ኢራ ኣሳስ ቡኪሴስ።
29 ጊዶ ኣቲን ጾሲ
ሻራ ዎስቲ ሚጪዛኮ፥
ዎልቃንꬃ ጊዶን ኡቲዲ
ኢዚ ዋኒ ሃሳይዛኮ
ኦኒ ኤራናዉ ዳንዳይዜ?
30 ጾሲ ኣባ ጪማቴꬃ ካሚዲ
ኢዚ ባ ዩሾን ዎልቃንꬃ
ዎስቲ ላሊዛኮ ጼላ።
31 ሃይሳ ማላ ኦꬂዲ
ጾሲ ባ ዴራ ኣይሴስ፤
ኣሳይ ሚዛ ዳሮ ካꬃካ ሞኪሴስ።
32 ዎልቃንꬃ ኢዚ
ባ ኩሼን ኦይኬስ፤
ኦይኪዲ ባ ዶሲዳ
ባጋ ባና ማላ ኣዛዜስ።
33 ዳዳይ ዎልቃማ ኢራይ
ያናይሳ ማላቴስ፤
ሜሄቲካ ኢራ ኡሾይ
ዪዛይሳ ኤሬቴስ።