41
1 «ኔኒ ሌዋታኔ ጌቴቲዛ
ኣባ ጊዶን ዲዛ ዶኣ
ሞሌ ኦይኪዛ ማንጻኮን
ኦይካናስ ዳንዳያይ?
ዎይኮ ኢዛ ኢንጻርሳ
ዎዶሮን ቃቻናስ ዳንዳያይ?ማዛ 74፡14፤ 104፡26፤ ኢሳ 27፡1
2 ኢዛ ሲꬌዛን ዳፎ ኣꬃዳ፥
ዎይኮ ኢዛ ጋጮዛ
ማንጻኮን ጌልꬃዳ፥
ኦይካናስ ዳንዳያይ?
3 ኢዚ፥ ‹ታና ማራርኪ!› ጊ
ኔና ዎሳኔ?
ዎይኮ ሎኦ ቃላን
ኔና ኦይቻንዴ?
4 ኔስ ሜርናስ ኣይሌ ጊዲዲ
ኔስ ኦꬃናዉ
ኢዚ ኔስ ቃላ ጌላኔ?
5 ኣሳራ ሜዜ ካፎ ማላ
ኔ ኢዛ ኔናራ ሜዜሳኔ?
ዎይኮ ኔስ ማጫ ናይታ
ካሳና ማላ
ኔ ቃቻ ዎꬃኔ?
6 ሞሌ ዛልኣንቻቲ
ኢዛ ሻማናዉ
ሚሻን ማርሼታኔ?
ዎይኮ ቃንጼሬꬂዲ
ኢዛ ባንታስ ጊሼታኔ?
7 ኢዛ ጋልባካ ኔ ኮዪዳሶራ
ቶራን ጫዳ ዳካናስ
ዳንዳያይ?
ዎይኮ ኢዛ ሁኤዛ
ሆጼ ሚሻን
ጫዳ ሉካናዉ ዳንዳያይ?
8 ኣኔ ኔኒ ኢዛ ዳንዳያና ጊዲኮ
ኩሼን ቦቻ!
ኢዛራ ኔ ባጼቲዳ ባጼ
ዎዴናዉካ ባላካ፤
ናምኣንꬆ ኢዛራ
ኔ ባጼታናስ ካጃላካ።
9 ሌዋታኔ ጌቴቲዛ
ኣባ ጊዶ ዶኣራ ባጼቲዲ
ኢዛ ጾናና ካጃሎስ
ꬋሌይ ዴና።
ኢዛ ቤኢዛ ኡባይ
ባቦን ኮኮሬስ።
10 ኢዛ ቦላ ሜቶ ጋꬃና ጉሲ፥
ሄሳ ኬና ዴጾ ጊዲኮ፥
ሂስቲን ታናራ ኤቄታናስ
ጻሊዛዴይ ኢዚ ባስ ኦኔ?
11 ሳሎፔ ጋርሳን ዲዛ ሚሺ
ዉሪካ ታሳ፤
ሂስቲን ታ ኢዛስ ዛራና ማላ
ታስ ታልኢዳይ ኦኔ?
12 ሌዋታኔ ጌቴቲዛ
ኣባ ዶኣ ጊሻስ፥
ኢዛ ሚኖ ዎልቃ ጊሻሲኔ
ኢዛስ ሎኢዛ ቦላ ጊሻስ፥
ታ ቆንጪሶንታ ኣጊኬ።
13 ኦርዴ ጊዲዳ ኢዛ ጋልባ ሾቃናስ፥
ዎይኮ ኢዛ ባንቂላ ፖቃናስ
ዳንዳይዛይ ኦኔ?
14 ኬሂ ያሺሲዛ ኣቻቲ ዲዛ
ኢዛ ባንቂላታ ፖቃና
ዳንዳይዛይ ኦኔ?
15 ኢዛስ ዞኮ ጋልባይ
ማራራ ኡቲዳ ጎንዳሌታ ማላ፤
ኣዳፌ ሺዲ ኦይኬቲዳይታ።
16 ኢስቲ ኢሶይ ኢሳራ
ሺጲ ጊዳ ጊሻስ
ኢስታ ጊዶራ ሃራይ ኣቲን
ጫርኮይካ ኣꬌና።
17 ኢስቲ ኡባይካ ኢሶይ ኢሳራ
ኦይኬቲ ኡቲዳ ጊሻስ
ኣይ ሚሺካ
ኢስታ ሻካናዉ ዳንዳዬና።
18 ኢዚ ꬊሺዛ ዎዴ
ጾጾልቁ ጊዛ ፖኦይ ቤቴስ፤
ኢዛ ኣይፌቲካ ዎንታ ማላዶ
ኣርሼ ማላ ፖኤቴስ።
19 ኢዛ ዶናፔ ታማ ላጮይ ኬዜስ፤
ታማ ፒንጼꬂካ
ላሌቲሼ ቤቴስ።
20 ፔንቲዛ ዲስቴይ
ኡቲዳ ጮጬን ዲዛ
ኣፊራይ ጩዋቲዛ ማላ፤
ኢዛ ሲꬌፔ ጩዋይ
ኬዚሼ ቤቴስ።
21 ኢዚ ሼምፒዛ ሼምፖዛ ሴላይ
ጺጺንꬃ ኦይሴꬄስ፤
ታማ ላጮይካ ኢዛ ዶናፔ ኬዜስ።
22 ኢዛ ሞርጌን ዎልቃይ
ኩሚዳ ጊሻስ
ኢዛ ሲንꬃይ ያሺሴስ።
23 ኢዛ ኣሾይ ዲላኣ ጊዲዳ ጊሻስ
ኢዛ ቦላይ ቢራታ ማላ ሚኔስ።
24 ኢዛስ ቲራይ ሹቻ ማላ ሚኖ፤
ጋጪዛ ዎጻ ማላካ ሚኖ።
25 ሃ ዶኣዚ ዴንዲዛ ዎዴ
ዎልቃማቲ
ኣቶንታ ባቦን ኮኮሬቴስ።
26 ኣይ ማሻኒኔ ቶራን
ዎይኮ ዎንዳፌኒኔ
ጫዲዛዛን
ኢዛ ኢስቲ ጫዲኮካ ጾኔቴና።
27 ኢዚ ቢራታ ማቃ ማላ
ሜንꬄሬꬄስ፤
ጻርቂማላካ ሙሳ ሚꬃ ማላ
ቲፌሬꬄስ።
28 ኢዛ ቦላ ዎንዳፌ ጾንጊኮካ
ኢዚ ያዪዲ ባቃቴና፤
ያንባርሻ ሹቺካ
ኢዛ ሲንꬃን ኢሺና ማላ።
29 ኮጼ ማታ ማላ ቆዴስ፤
ኣሲ ኢዛ ቦላ ቶራ ጾንጊሺን
ቂꬌ ሚች ሚጬስ።
30 ኢዛስ ኡሎ ጋልባ ሃንቻዚ
ኢዚ ኡርቃ ጊዶራ ቢሺን
ቢታ ማራሻ ማላ ቦኬስ።
31 ኣባ ሃꬃ ፔንታ ማላ ፖጪሴስ፤
ኦቶን ፔንቲዛ
ዛይቴ ማላ ፖꬊሴስ።
32 ኢዚ ኣꬊ ቢዛ ኦጌይ ፖኢሴስ፤
ኣባ ሃꬃካ
ሆሞ ጮፑ ሂስቴስ።
33 ኢዚ ያሽ ኤሮንታ ሜꬌታ፤
ቢታ ቦላ ኢዛ ሚሳቲዛ ሜꬌታይ
ሙሌካ ዴና።
34 ኬሂ ጊታ ጊዲዳ ሜꬌታታካ
ኢዚ ካꬌስ፤
ኢዚ ዶኣ ኡባ ቦላ ካዎ።»