42
ኢዮቢ ባና ካዉሺዴስ
1 ሃይሳፌ ጉዬን ኢዮቢ ጾሳስ ሂዝጊ ዛሪዴስ፤
2 «ታ ጎዳዉ!
ኔኒ ኡባ ሚሽ ኦꬃናስ
ዳንዳይዛይሳ ታ ኤራዲስ፤
ኔ ቆፋካ
ꬉጲ ዲጋናይ ዴና።
3 ታ ኤሪዛራ ኬሂ ጉꬅ ጊዲሺን
ታ ዳሮ ሃሳይዛይሳ
ኣዛስ ጊዲዳኮ
ኔ ኦይቻዳሳ፤
ቱሙካ ታኒ ኤሮንታይሳኔ
ኣኬኮንታ ኡባ ሃሳያዲስ። ኢዮ 38፡2
4 ‹ታ ኦይሻ ኤዝጋ ሲያዳ
ታስ ዛሮ ኢማ› ጋዳሳ። ኢዮ 38፡3
5 ታ ሃኖ ጋካናስ ኔ ጊሻስ ኤሪዛይሲ
ኣሳፔ ሲዮይሳን ጻላ፤
ሃኢ ጊዲኮ ታ ኣይፌታን
ታ ኔና ቤያዲስ።
6 ሄሳፌ ዴንዲዳይሳን
ታ ሃሳይዳ ሚሻቲ
ታና ዬላቺዳ ጊሻስ
ቢዲንꬃኒኔ ጉዱላን ኡታዳ
ታ ኔፔ ማሬታና።»
ኩሻ ቆፋ
7 ጾሲ ኢዮቤራ ሃይታንታ ኡባ ሃሳዬቲዳፔ ጉዬ ቴማኔ ዴሬ ኣስ ኤልፋዜስ፥ «ኢንቴ ታ ኣይሌ ኢዮቤ ማላ ታ ጊሻስ ሊኬ ሃሳዮንታ ጊሻስ ታኒ ኔ ቦላኔ ኔ ላጌታ ቦላ ሃንቄታዲስ። 8 ሄሳ ጊሻስ ሃኢ ላፑን ዎፋኖታኔ ላፑን ꬋርሾታ ኤኪዲ ታ ኦሳንቻ ኢዮቤኮ ቢቴ። ሄን ኢንቴ ናጋራ ጊሻስ ጹጌቲዛ ያርሾ ሺሺቴ። ታ ኦሳንቻ ኢዮቢ ኢንቴስ ዎሳና፤ ታኒካ ኢዛ ዎሳ ሲያዳ ኢንቴና ኢንቴ ናጋራ ማላ ቃጻይኬ። ኢንቴ ታስ ኢዮቤ ማላ ሎኦ ሚሽ ሃሳይቤኬታ» ጊዴስ።
9 ሄሳፌ ጉዬ ቴማኔ ዴሬ ኣስ ኤልፋዜይ፥ ሹሃ ዴሬ ኣስ ቤሊዳዲኔ ናኢማኔ ዴሬ ኣስ ዞፋሬይ ቢዲ ጾሲ ኢስታ ኣዛዚዳ ማላ ኦꬂዳ። ጾሲካ ኢዮቤ ዎሳ ሲዪዴስ።
10 ኢዮቢ ባ ሄꬑ ላጌታስ ዎሲዳፔ ጉዬ ጾሲ ኢዚ ዛሪ ዱሬታና ማላ ኦꬂዴስ። ካሴ ኢዛስ ዲዛይሳፌ ኣꬂዲ ዳኮ ኢዛስ ኢሚዴስ። ኢዮ 1፡1-3 11 ሄ ዎዴ ኢዮቤ ኢሻቲ፥ ኢዛ ሚቼቲኔ ካሴ ኢዛ ኤሪዛይቲ ኡባይ ኢዛ ቤያናስ ዪዳ። ኢዛራ ኢሲፌ ኢዛሶን ካꬅ ሚዳ፤ ኢስቲ ኢዛስ ሚሼቲዛይሳ ቆንጪሲዲ ጾሲ ኢዛ ቦላ ጋꬂዳ ሜቶዛ ጊሻስ ኢዛ ሚንꬄꬂዳ። ኢሶይ ኢሶይ ቢራፔኔ ዎርቃፌ ኦሴቲዳ ሚዲጋ ኢዛስ ኢሞታ ኢሚዳ። 12 ጾሲ ኢዮቤስ ዉርሴꬃ ዴኦዛ ኮይሮይሳፌ ኣꬂ ኣንጂዴስ። ሄሳ ጊሻስ ኢዮቤስ 14,000 ዶርሲ፥ 6,000 ጋሜላቲ፥ 1,000 ዋꬃ ቦራቲ፥ 1,000 ማጫ ሃሬቲ ዴቴስ። 13 ቃሴካ ላፑን ኣቱማ ናይታኔ ሄꬑ ማጫ ናይታ ዛሪ ዬሊዴስ። 14 ማጫ ናይታፔ ኮይሮሮ ዪሚማ፥ ናምኣንꬃዮ ቄጺኦ፥ ሄꬓንꬆዮ ቄሬኔ-ሃፊኮ ጊዲ ሱንꬂዴስ። 15 ቢታ ቦላ ኢዮቤ ማጫ ናይታ ማላ ሜꬋ ሎኦ ማጫይ ቤቲቤና። ኢስታ ኣዋይ ኢስታስ ኢስታ ኢሻታራ ቢታ ላታና ማላ ሻኪ ኢሚዴስ።
16 ሄሳፌ ጉዬ ኢዮቢ 140 ዴኢዴስ። ባ ናይታ ኦይዳንꬆ ዬሌታ ጋካናስ ቤዪዴስ። 17 ኢዮቢ ዳሮ ላይꬅ ዲዲ ሎኦ ጪማ ጪሚዲ ሃይቂዴስ።