ማዛሙሬ ማጻፋይ ጌሻ ማጻፋ ጊዶን ዬꬃኔ ዎሳ ማጻፋ ጊዲዲ ኤሬቴስ። ሃ ማጻፋ ጊግሲዳይቲ ኣዱሳ ዎዴታ ጊዶን ቤቲዳ ዱማ ዱማ ኣሳታ። ኢሲ ኢሲ ዬꬃታ ካዎ ዳዊቲ ጻፊዴስ፤ ሃ ዬꬃታኔ ሃ ዎሳታ ሺሺዲ ባ ጎይኒዛ ዎዴን ጎኤቲሼ ጋምኢዳይቲ ኢስራኤሌ ኣሳታ። ጉꬃ ዎዴፔ ጉዬ ባንታ ጌሻ ማጻፋታ ጊዶን ጌልꬂዳ።

ሃይታንቲ ኣያናፔ ጻፌቲዳ ጊንጾታ ቆሞይ ጮራ፤ ኢስቲካ ጋላታ ጋላቲዛ ጊንጾኔ ጾሳ ጎይናና ጎኢዛ ጊንጾታ፤ ጾሲ ማዳና ማላ፥ ናጋና ማላኔ ሳሮን ዎꬃና ማላ ዎሲዛ ዎሳታ ጊንጾ፤ ናጋራፔ ማሬታናስ ሺሺዛ ዎሳ ጊንጾታ፤ ጾሳ ኣንጆ ጊሻስ ዮቲዛ ጋላታ ሳባታኔ ሞርኬታ ቃጻያና ማላ ጾሳስ ዮቲዛ ማጋና ጊንጾታ። ሃ ዎሳቲ ኢሲ ኣሲ ባርካ ዎሲዳ ዎሳታኔ ጮራ ኣሳይ ኢሲፌ ዎሲዳ ዎሳታ። ኢስታፌ ኢሶቲ ኢሶቲ ኢሲ ኢሲ ኣሳ ዎዚናን ሲዬቲዳ ሚሾታ ቆንጪሲዛይታ። ሃራቲ ቃሴ ጾሳ ኣሳይ ኡባይ ኮይዛይሳኔ ኣስ ኡባስ ሲዬቲዛ ሃኖቴꬅ ቤሲዛይታ።

ዬሱሲ ታማርሲሼ ዬꬃ ማጻፋፔ ቦቺ ቦቺ ኤኪዲ ታማርሲዴስ። ኦራꬃ ጫቆ ማጻፋታ ጻፊዳይቲካ ኢዛን ጻፌቲዳይሳፌ ባ ጻፊዛ ማጻፋ ጊዶ ጌልꬂዳ። ዎሳ ኬꬃያ ኤቆሶፌ ዶማዳ ዬꬃ ማጻፋ ጾሳስ ጎይኒዛ ዎዴ ጎኤቲዛ ጊታ ሚንጃ ሚሻ ማላ ኦይካዱስ።

ማዛሙሬ ማጻፋይ ኢቻሽ ኪፊሌታን ሻኬቴስ፤ ዳሪዛ ባጋታ ኮይሮ ኪፊሌታኔ ናምኣንꬆ ኪፊሌታ ጻፊዳይ ካዎ ዳዊቴ። ሄꬓንꬆ ኪፊሌዛ ጻፊዳይ ኣሳፌ ዎይኮ ቆሬ ናይታ።

ማዛሙሬ 120-134 ጋካናስ ዲዛ ዬꬃቲ ባኣሌ ቦንቾስ ዬጼቲዛ ዬꬃታ፤ ሃይሳፌ ካሊዲ ማጻፋዚ ኢቻሽ ኪፊሌታን ሻኬቲዳይሲ ቆንጪዴስ።