2
ጾሳ ዩሳ ጋላስ ቤሲዛ ማላታ
1 ጺዮኔን ዛዬ ዛዪቴ፤
ጌሻ ዙማ ቦላ ዋሲቴ!
ጎዳ ዩሳ ጋላሲ
ጋኪዳ ጊሻስ
ቢታ ቦላ ዲዛይ
ዉሪካ ኮኮሮ።
2 ሄ ጋላሳይ ꬉማኔ
ቱላላ ጋላሳ፤
ሻራኔ ሳካና
ꬉማ ጋላሳ፤
ዎንታ ፖኦይ ኤሶን
ዙማታ ጋኪዛ ማላ
ዎልቃማ ቦሌይ
ቢታ ኡባን ማይኣና፤
ሄሳ ማላይ
ሃይሳፌ ካሴ ሃኒቤና፤
ሃይሳፌ ጉዬንካ ሃኔና።
3 ሄ ቦሌቲ ባ ሲንꬃን ቤቲዳዚ
ኡባ ታማ ማላ ማና፤
ታማ ላጮ ማላ ጹጋና፤
ቡሮ ኢስታ ጋኮንታ ቢታይ
ኤዴኔ ጋናቴ ማላ
ጪሊላ ቢታ ሺን
ኢስቲ ጋኪ ኣꬊዳ ቢታይ
ኣይኮይ ባይንዳ
ባዞ ቢታ ጊዳና፤
ቦሌቲ ሚሺን ኣቲዳ
ሚሺካ ቤቴና።
4 ኢስታስ ሜꬋይ ፓራ ማላ፤
ኢስታ ቡሳይ
ኦላ ፓራ ቡሳ ማላ።
5 ፓራ-ጋሬ ጊሪሳ ማላ
ጊሪስ ሲሲሼ
ዙማታ ቦላራ ጉፔቴስ፤
ታማይ ቡራ ሚዛ ማላ
ቤቲዳ ሚሻ
ኡባ ጹጋና፤
ጊጌቲዳ ሚኖ ኦላንቻታ
ሳልፌ ማላ ጊሬቴስ። ኣጁ 9፡7-9
6 ኢስታ ቤኢዲ ዴሬይ ኮኮራና፤
ኣሳ ኣይፌሶይ ዉሪካ
ባቦን ቦታና።
7 ኦላ ቃራታ ማላ
ጌዴ ሲንꬄ ቤቴስ፤
ኦላንቻታ ማላ
ዲርሳ ቦላራ ጉፒ ኣꬋና፤
ዉሪካ ሲቲ ጊዲ
ጌዴ ሲንꬄ ባና፤
ባ ቢዛ ኦጌፔ ሃራ ኦጌ ቤቴና።
8 ኢሶይ ኢሳራ ሱጌቴቴና፤
ኢሶይ ኢሶይ ባ ኦጌ ዬዴና፤
ባ ሞርኬ ኦላ ሚሽ ኡባ
ꬋይሲዲ ኣꬊ ባና፤
ኣይኮይካ ኢስታ ቴቄና።
9 ኢስቲ ካታማዛ ዎራጃና፤
ካታማ ጊምቤዛ ቦላ
ኢስቲ ዎጻና፤
ጉፒ ጉፒዲ
ኬꬃታ ቦላ ኬዛና፤
ካይሶ ማላ ማስኮቴራ
ሶ ጌላና።
10 ቢታይ ኢስታ ሲንꬃን ኮኮራና
ሳሎይካ ቃጻና፤
ኣዋ ኣይፌይኔ ኣጊናይ ꬉማና፤
ጾሊንቴይካ ፖኦ ኢሜና። ኣጁ 8፡12
11 ጎዳይ ባ ኦላንቻታ
ሲንꬃን ዳዳ ማላ ጉማና፤
ኢዛ ኦላንቻቲ ኣይ ማላ ዳሮ!
ኢዛ ኣዛዞ ኦꬂዛይቲ
ኣይ ማላ ዎልቃማ!
ቱማፔካ ጎዳ ጋላሳይ
ኬሂ ዎልቃማ፤
ኬሂ ባቢሲዛ ሄ ጋላሳ
ዳንዳይ ኤቃናይ ኦኔ?ኣጁ 6፡17
ማሬቴꬃ ጼይስ
12 ጎዳይ፥ «ሃኢካ ጊዲኮ
ጾማን ዬሆኒኔ ጬጬን ኢንቴ
ኩሜꬃ ዎዚናፔ
ሃ ታኮ ሲሚቴ።
13 ኢንቴ ኢንቴ ካዮ ቤሳናስ
ማይኦ ዳኬꬅ ጻላ ጊዴና፤
ሄሳፌ ቦላራ ኢንቴ ዎዚናይ
ሜቂን ማሬቲቴ፤
ጎዳ ኢንቴ ጾሳይ
ኪያኔ ማሪዛ ጾሳ፥
ሃንቆስካ ኤሶቴና፤
ሜርና ሲቆን ኢዚ ዱሬኔ
ቃጻያናስ ኤሶቶንታ ጾሳ፤
ሄሳ ጊሻስ ኢንቴ
ኢዛኮ ሲሚቴ።
14 ኦኔ ኤሪዛይ ጎዳ ኢንቴ ጾሳይ
ባ ሃንቆዛ ዛሪዲ
ኢንቴና ኣንጃናኮ፥
ኢንቴካ ሄ ዎዴ ጎዳ
ኢንቴ ጾሳስ ካꬃ ያርሾኔ
ኡሻ ያርሾ ሺሻንዴታ።
15 ጺዮኔ ዙማ ቦላ ዛዬ ፑኒቴ፤
ዴሬዛ ኣያና ሺቆስ ጼይጊቴ፤
ጾማካ ኣዋጂቴ።
16 ዴሬዛ ኡባ ኢሲ ሶ ሺሺቴ፤
ጌሻ ዱላታስ ጊግሲቴ፤
ጪማታ ጼይጊቴ፤
ናይታኔ ቡሮ ꬋሚዛ
ናይታካ ኡባ ሺሺቴ፤
ሚሺራቲካ ሚሺራ ኬꬃፌ
ኣቶንታ ኬዜቶ።
17 ጎዳስ ኦꬂዛ ቄሴቲካ
ያርሾ ያርሺዛሶዛሲኔ
ኣሲ ሲሜሬቲዛሶ
ጊዶን ኤቂዲ ዬኬቶ፤
ጎዳዉ! ኔኒ ኔ ዴሬዛስ ቃꬌታ፤
ካዎቴꬃቲ ኢስታ ጾሳይ
ኣዋን ዲዜ?
ጊዲ ኑና ካꬋናሲኔ
ኢስቲ ኑ ቦላ
ሚጪ ካኣና ማላ
ኔ ኢስታ ኦꬆፋ» ጌቶ።
ጎዳይ ባ ዴራስ ኢሚዳ ሂዶታ
18 ጎዳይ ቢታይስ ዲዛ
ሚሼቴꬃፌ ዴንዲዳይሳን
ባ ዴሬዛስ ቃꬌቲዴስ።
19 ሄሳ ጊሻስ ጎዳይ፥
«ኢንቴ ካꬅ፥ ዎይኔ ኡሺኔ
ዎጋራ ዛይቴ ካላና ጋካናስ
ታ ኢንቴስ ኢማናስ
ሃይሳፌ ጉዬ
ካዎቴꬃቲ ኢንቴና
ባስ ካሳ ሚሽ ሂስታና ማላ
ታ ኢስታስ ኣꬃ ኢሚኬ።
20 ፑዴሃፔ ያና ኦላንቻታ
ታ ኢንቴፌ ሃሳና፤
ዱጌ ባዞ ዛራ ጎዳና፤
ሲንꬃቲ ዪዛይታ ዱጌ
ሃይቆ ኣባን ዬዳና፤
ጉዬራ ዪዛይታ ሜዲቴራኔ
ኣባን ዬዳና፤
ሄን ኢስታ ኣሃይ ዜቃና፤
ቱማፔ ታኒ ጎዳይ
ጊታ ሚሽ ኦꬃዲስ።
21 ቢታዬ ባቦፋ፤
ጎዳይ ኔስ ኦꬂዳ
ጊታ ሚሻ ጊሻስ ኡፋዬታ!
22 ኢንቴኖ ቢታ ቦላ ዲዛ
ዶኣቶ ባቦፍቴ፤
ካሴ ኢንቴ ኢዛን ሄሜቲዛ
ጋዴይ ጪሊሊዴስ፤
ሚꬃቲካ ኣይፊዳ፤ ባላሴይኔ
ዎይኔ ሚꬃይ
ኬሂ ዳሮ ኣይፊዴስ።
23 ኢንቴኖ ጺዮኔ ዴሬቶ፥
ጎዳን ኢንቴ ጾሳን
ኡፋይሲ ኦꬂቴ፤
ኢዚ ቱሙ ፒርዲዲ
ባꬌሳ ኢራኔ
ኦፊንꬃ ኢራ ዎጋራ ኢሚዴስ።
24 ኢንቴ ካሴ ካꬅ ቡኪዛ ባሌን
ካꬂ ኩማና፤
ዎይኔ ኡሺኔ
ዎጋራ ሚꬃ ዛይቴይ
ካሴ ኢስታን ጉምኤቲዛ
ኦላታ ኩሚ ፓላሃና።
25 ሃይሳፌ ካሴ ዎልቃማ ኦላንቻ
ሚሳቲዛ ታ ዬዲዳ ኡሾ
ጫርኮꬆ ሾጪዛ ቦሌቲ፥
ጉምባሮቲኔ ጎንዶቲ፥
ካሴ ሚዳ ካꬃ ጊሻስ
ታ ኢንቴስ ዛራ ኢማና።
26 ኢንቴ ቡሮ ዳሮ ሚዲ ካላና፤
ኢንቴስ ማላሊሲዛ ሚሻታ
ታ ኦꬂዳ ጊሻስ
ኢንቴ ታና ጎዳ
ኢንቴ ጾሳ ጋላታና፤
ሃይሳፌ ጉዬ ታ ዴራ
ዬላይ ጋኬና።
27 ኢስራኤሌ ኣሳቶ
ታኒ ኢንቴ ጊዶን ዲዛይሳኔ
ጎዳ ኢንቴ ጾሲ
ታና ጻላ ጊዲዳይሳኔ
ታፔ ሃራይ ባይንዳይሳ
ኢንቴ ኤራና፤
ሄሳፌ ጉዬ ታ ዴሬዛ
ዬላይ ጋኬና» ጊዴስ።
ጎዳ ጋላሳ
28 ጎዳይ፥ «ሃይሳፌ ጉዬ
ታኒ ኣሳ ኡባ ቦላ
ታ ኣያና ጉሳና፤
ኢንቴ ማጫ ናይቲኔ ኣቱማ
ናይቲ ቲንቢቴ ሃሳያና፤
ጪማ ኣሳይካ ኣጉሞ ኣጉሜታና፤
ዬላጋ ናቴꬃቲ ኣጁታ ቤያና። ሃዋ 2፡17-21
29 ሄሳꬆካ ሄ ጋላሳታን
ታስ ኦꬂዛ ማጫሳ ቦላኔ
ኣቱማሳ ቦላ ታኒ
ታ ኣያና ጉሳና።
30 ሳሎኒኔ ሳኣን ማላሊሲዛ
ሚሻታ ታ ቤሳና፤
ሱꬂ፥ ታማይኔ
ጩዋ ቱሲ ቤታና።
31 ጊታ ባቢሲዛ ጎዳ ጋላሳይ
ያናፔ ካሴቲዲ ኣርሼይ ꬉማና፤
ኣጊናይካ ሱꬅ ኣꬃና።ማቶ 24፡29፤ ማር 13፡24-25፤ ሉቃ 21፡25፤ ኣጁ 6፡12-13
32 ጎዳ ሱንꬅ ጼይጊዛይ
ዉሪካ ኣታና፤
ጎዳይ ካሴ
ዮቲዳ ማላ
ጺዮኔ ዙማ ቦላፌኔ
ዬሩሳላሜፔ
ኣቶቴꬂ ቤታና፤
ኣታናይታ ጋርሳን ጎዳይ
ጼይጊዳይቲ ዳና» ጊዴስ። ኦሮ 10፡13