3
ካዎቴꬃታ ቦላ ዪዳ ፒርዳ
1 ጾሲ፥ «ሄ ዎዴ ታኒ ዬሩሳላሜፔኔ
ዩሁዳፔ ዲኤቲ ኤኬቲዳ
ሚሽ ኡባ ዛራና።
2 ታኒ ካዎቴꬃታ
ኡባ ሺሻዳ
ዱጌ ኢዮሳፊጼ
ሄንካ ታ ኢስታ ቦላ ፒርዳና፤
ጋሶይካ ታ ዴሬ ኢስራኤሌ ኣሳ
ካዎቴꬃታ ጊዶን ላሊዲ
ኢስቲ ቢታ ጊሼቲ
ኤኪዳ ጊሻሳ።
3 ኢስቲ ባ ዲኢ ኤሂዳ
ታ ዴሬታ ጊሼቲ ኤካናስ
ኢስታ ቦላ ሳማ ዬጊዳ፤
ላይማ ማጫሳታ ዴማናስ
ኣቱማ ናይታ ኣꬂ ኢሚዳ፤
ዎይኔ ኡሹ ኡያናስ
ማጫ ናይታ
ኣይሌቴꬃስ ባይዚዳ።
4 ኢንቴኖ ጺሮሴ፥
ሲዶናኔ ፊሊስጼሜ ኣሳቶ!
ኢንቴ ኣይ ኦꬂሼ ዴቲ?
ኢንቴ ታ ቦላ
ሃሎ ኬሳና ቆፔቲ?
ኢንቴ ሄሳ ማላ ቆፒኮ
ታኒካ ካሴታዳ ኢንቴ ቦላ
5 ታ ቢራ፥ ዎርቃኔ
ታስ ዲዛ ኣልኦ ሚሽ
ኡባ ኢንቴ ቦንቂ ኤኪዲ
ኢንቴ ኤቃ ኬꬅ ጌልꬂዴታ።
6 ዩሁዳኔ ዬሩሳላሜ ዬሌታታ
ኢስታ ዴሬ ꬋሳፌ ሃሲ ኤፊዲ
ጊሪኬ ኣሳስ ባይዚዴታ።
7 «ሄኮ ታኒ ሃኢ ኢስቲ ባይዜቲ ዲዛሶፔ ኢስታ ዴንꬄꬃዳ ዛራና፤ ኢንቴ ኢስታ ቦላ ጋꬂዳ ቆሆዛ ታ ኢንቴ ቦላ ዛራ ኤሃና። 8 ኢንቴ ማጫ ናይቲኔ ኣቱማ ናይቲ ዩሁዳ ኣሳስ ባይዜታና ማላ ታ ኦꬃና፤ ኢስቲካ ሃሆ ዴሬን ዲዛ ሳባኔ ኣሳስ ኣꬂ ባይዛና፤ ሃይሳ ዉርሳ ዮቲዳይ ታና ጎዳ።
9 «ሃይሳ ኡባ
ካዎቴꬃታስ ኣዋጂቴ!
ኦላስ ጊጌቲቴ!
ኦላ ቃራታ ዴንꬄꬂቴ!
ኢንቴ ኦላንቻቲ ኡባይ
ኬዚዲ ሞርኬታ ኦሌቶ!
10 ማራሻ ጊꬃ ማሻ ቆጺቴ፤
ባጫ ቃሴ ቶራ ቆጺቴ፤
ላፋይካ ባና፥
‹ታኒ ሚኖ ኣሳ› ጎ። ኢሳ 2፡4፤ ሚኪ 4፡3
11 ኢንቴኖ ዩዪ ኣꬋናስ ዲዛ ካዎቴꬃቶ!
ኢንቴ ዉሪካ ኤሶን ኬዚቴ!
ሂርኪ ሾባን ኢሲ ቦላ ሺቂቴ።
ጎዳዉ፥ ኔኒ
ኔ ኦላንቻታ ኪታ!
12 «ካዎቴꬃቲ ኡባይ ዴንዲዲ
ዱጌ ኢዮሳፊጼ ሾባ ቤቶ፤
ታኒ ጾሳይ ኢንቴ ዩሾን ዲዛ
ካዎቴꬃታ ቦላ ፒርዳናስ
ታ ሄን ኡታና።
13 ኢስታ ኢታቴꬂ ኬሂ ዳሪዴስ፤
ሄሳ ጊሻስ ካጺዳ ካꬂ
ባጫን ጫኬቲዛ ማላ
ኢስታ ጫኪቴ፤
ዎይኔ ሚꬃ ኣይፌይ
ጉምኤቲዛሶን ኩሚዲ
ዬꬌቲዛ ማላ
ኢንቴ ኢስታ ዬꬌቲቴ» ጊዴስ። ኣጁ 14፡14-16፥19-20፤ 19፡15
14 ዮኦ ፒርዲዛ ዙሌን
ጎዳይ ፒርዲዛ ጋላሲ ጋኪዴስ፤
ሄሳ ጊሻስ ዳሮ ዴሬይ
ሄን ሺቂ ኡቲዴስ።
15 ሄ ጋላስ ኣርሼይኔ
ኣጊናይ ꬉማና፤
ጾሊንቴይካ ፖኤና።
16 ጎዳይ ጺዮኔ ዙማ ቦላ
ዬሩሳላሜን ዲሼ
ባቢሲዛ ባ ቃላ ጊሪስ ሲሳና፤
ሳሎይኔ ሳኣይ ቃጻና፤
ጎዳይ ጊዲኮ
ባ ዴሬ ኢስራኤሌስ
ሺቂ ኣቲዛሶ ጊዳና።
ጾሳ ዴራ ኣንጄቴꬅ
17 «ኢስራኤሌ ኣሳዉ! ሄ ዎዴ ታኒ
ጎዳ ኢንቴ ጾሳ ጊዲዳይሳ
ኢንቴ ኤራና፤
ታኒ ጌሽ ጊዲዳ ታ ዙማ
ጺዮኔ ቦላ ዴኣና፤
ዬሩሳላሜይ ኣንጄቲዳ
ካታማ ጊዳና፤
ሄሳፌ ጉዬ ሃራ ኣላጋ ዎታዳራይ
ኢዞ ዎራጄና።
18 «ሄ ዎዴ ዙማቲ ዉሪካ
ዎይኔ ሚꬃን ኩማና፤
ዙምቡላን ዳሮ ማꬃ ሚዛቲ
ሄሜታና፤
ጎዳ ኬꬃፌ
ፑልቶይ ፑልታና፤
ዩሁዳ ዴሬን ዲዛ ሻፋታ
ኡባ ሃꬂ ኩማና፤
ሺጺሜ ሾባይ ሃꬅ ካላና።
19 ጊብጼ ኣሳይኔ ኤዶሜ ኣሳይ
ዩሁዳ ኣሳ ቦላ
ጌኔ ኦꬂዳ ጊሻስ
ቃሴካ ጺሎ ኣሳ ዎꬊዳ ጊሻስ
ጊብጼይ ባዞ ጊዳና፤
ኤዶሜይ ኣሲ ባይንዳሶ ጊዳና።
20-21 ሄሳ ጋካናዉ ታኒ
ሃሎ ኬሶንታ ኣጊዳ
ጺሎታ ሱꬃ ጊሻስ
ሃሎ ኬሳና፤
ዩሁዳይኔ ዬሩሳላሜይ
ቃሴ ሜርናስ ታ ዴሬይ
ዴኢዛሶ ጊዳና፤
ታኒካ ጾሳይ
ጺዮኔ ዙማ ቦላ
ዴኣና» ጊዴስ።