ኣሞጼስ ቲንቢቴ ሃሳያ ኤራቴꬂ ዴና፤ ኢዚ ቲንቢቴ ሃሳዮ ቲሚርቴ ታማርቤና። [7፡14] ጊዶ ኣቲን ኢዚ ፑዴ ሃን ዲዛ ካዎቴꬃ ጋርሳን ዲዛ ዴሬዛስ ኢዚ ኪታ ጋꬃና ማላ ኪቴቲዳ ዎዴ ኣሞጼይ ዩሁዳን ዲዛ ቴቁሄ ጌቴቲዛ ካሴ ኢዚ ዲዛ ጉታዮ ዬጊዲ ቢዴስ። ኢዚ ሄፔካ ዴንዲዲ ኢስራኤሌ ኣሳስ ኤሬቲዳ ጎይኖሶ ጊዲዳ ጌዴ ቤቴሌ ካታማ ቢዴስ። ሃይሳ ሃ ማጻፋዛን ኮይሮ ቦላ ኣሞጼይ ዴሬዛ ኣማቴስ፤ ሄሳፌ ኢስራኤሌ ኣሳ ሃራፔካ ሎኦ ዱሲ ዲዛ ዱሬታ ኣማቴስ። ሄ ዱሬቲ ዴሬዛ ቦንቂዲ ባስ ኣይሌ ሂስቲ ሃራናስ ኢስታስ ጊታ ዎልቃይ ዴስ። ኢስታፌ ዳሮቲ ጎይናናስ ሃራ ኤቃ ጾሳቲ ዲኮካ ኢስታ ናጊዛይ ጎዳ ጊዲዳይሳ ባ ዎዚናን ቆፔቴስ። ኣሞጼይ ጊዲኮ ኢስቲ ባ ናጋራ ጊሻስ ቃጻዬታናይሳ ኢስታስ ዮቲዴስ። «ኢታ ሚሽ ኢጺቴ ሎኦ ጊዲዳዚ ሲቂቴ። ፒርዳ ፒርዲዛሶን ፒርዳ ቱጮፍቴ። ሜꬌቴꬃ ጎዳይ ኣቲዳ ኢስራኤሌ ዴራ ኢዚ ማሮንታ ኣጌና።» [5፡15]