2
1 ጎዳይ ሞኣቤስ፥
«ሞኣቤ ኣሳይ ዛሪ ዛሪዲ
ኦꬂዳ ናጋራ ጊሻስ
ታ ኢስታ ቃጻዮንታ ኣጊኬ፤
ኢስቲ ኤዶሜ ካዎ ሜቄꬂ
ቢዲንꬅ ጊዳና ጋካናስ ጹጊዳ። ኢሳ 15፡1—16፡14፤ 25፡10-12፤ ኤር 48፡1-47፤ ሂዚ 25፡8-11፤ ሶፎ 2፡8-11
2 ሄሳ ጊሻስ ታኒ ሞኣቤ ቦላ
ታማ ዬዳና፤
ሄ ታማይ ቂሪያቴ
ሚጻታ ማና።
ኦላንቻቲ ማጉልꬅ፥
ዋሶኔ ዛዬ ጊሪስ ሲሲሼ
ሞኣቤ ኣሳ ዎꬊ ዉርሳና።
3 ታኒ ኢስታ ሃሪዛ ካዎዛኔ
ዳናታ ኡባ ꬋይሳና» ጌስ።
4 ጎዳይ ዩሁዳ፥ «ዩሁዳ ኣሳይ
ዛሪ ዛሪዲ
ኦꬂዳ ናጋራ ጊሻስ
ታ ኢስታ ቃጻዮንታ ኣጊኬ፤
ኢስቲ ታ ዎጋ ካꬊዳ፤
ታ ኣዛዞታካ ናጎንታ ኢጺዳ፤
ካሴ ኢስታ ኣዋቲ ጎይኒዳ ኤቃ
ጾሳታ ካሊዲ ኢስቲ ባሌቲዳ።
5 ሄሳ ጊሻስ ታኒ ዩሁዳ ቦላ
ታማ ዬዳና፤
ሄ ታማይ ዬሩሳላሜ
ሚጻታ ማና» ጌስ።
6 ጎዳይ ኢስራኤሌስ፥
«ኢስራኤሌ ኣሳይ
ዛሪ ዛሪዲ ኦꬂዳ
ናጋራ ጊሻስ
ታ ኢስታ ቃጻዮንታ ኣጊኬ።
ጺሎ ኣሳታ ቢራስ፥
ሜቶቲዳይሳ ቶሆ
ጫማስ ባይዚዳ።
7 ኢስቲ ማንቆታ ጉዱላ ቦላ
ጌንዴሪሲዲ ኢስታ
ሁኤ ዬꬌቴቴስ፤
ቆሄቲዳይታስ ጌላ ፒርዴቴስ፤
ኣዋይኔ ናይ
ኢሲ ማጫሳይራ ላይማቴቴስ፤
ኢስቲ ሄሳꬆ ኦꬂ ኦꬂዲ
ታ ሱንꬅ ቱኒሴቴስ።
8 ኣሳፔ ኦይሶ ኤኬቲዳ
ማይኦ ሂጺዲ
ያርሾ ያርሺዛሶዛ
ጋርሳን ኣቄቴስ፤
ኢስቲ ባንታ ጾሳ ኬꬃን
ኤዳሲ ኤኪዲ ዎይኔ ኡሹ
ኢዛን ኡዬቴስ።
9 «ኢስታስ ኣዱሳቴꬃይ
ዚጋ ሚꬃ ማላ፤
ሚኖቴꬃይካ ጺዳ ማላ
ጊዲዳ ኣሞሬ ኣሳ ታኒ
ኢንቴ ሲንꬃፌ ꬋይሳዲስ፤
ኣይፎንታ ማላ
ጻጶፔ ሾዳ ዲጋዲስ። ዛሬ 3፡8-11
10 ታኒ ኢንቴስ ኣሞሬ ዴሬ
ቢታ ኢማናስ
ኢንቴና ጊብጼፔ ኬሳዲስ፤
ኦይዱ ታሙ ላይꬅ ኩሜꬅ
ባዞራ ካሌꬃ
ኤሃዳ ላቲሳዲስ።
11 ቃሴካ ታኒ ኢንቴ
ኣቱማ ናይታ ጋርሳፌ ናቤታ፥
ናቴꬃታ ጊዶፌ
ናዚራዌታ ዴንꬃዲስ።
ኢስራኤሌ ዴሬዞ!
ሄሲ ቱሙ ጊዴኔ?» ጌስ።
12 ጾሳይ፥ «ኢንቴ ጊዲኮ ናዚራዌታ
ዎይኔ ኡሹ ኡሺዴታ፤
ናቤታካ ቲንቢቴ
ዮቶንታ ማላ ኣዛዚዴታ።
13 ቤኢቴ ዳሮ ካꬅ ዴጼቲ
ጫኔቲዳ ጋሬይ
ጋርሳራ ዲዛ ሚሽ ሊቂሲዛ ማላ
ታኒካ ኢንቴና ሊቂሳና።
14 ፒላታ ኣሲ ኬሲ ኤኪ ኣቴና፤
ሚኖይካ ባ ሚኖቴꬃን
ማዴቴና፤
ዎልቃማይካ
ባ ሼምፖ ኣሼና።
15 ዎንዳፌ ኦይኪዳዴይ ባ ዲዛሶን
ሚኒ ኤቂዲ ኦላ ዛሬና፤
ፒላታ ኦላንቻይካ
ዎጺ ኣቴና፤
ቶጋንቻይካ ባ ሼምፖ ኣሼና።
16 ኦላ ቃራቲካ ሄ ጋላስ
ጎሮ ካሎ ባቃታና» ጌስ።