3
ኢስራኤሌ ኣሳ ቦላ ጋካና ሃንቆ
1 ኢስራኤሌ ኣሳዉ! ጊብጼፔ ኬዚዳ ኢስራኤሌ ኣሳስ ኢንቴስ ጎዳይ ዮቲዳ ቃላ ሃይሳ ሲዪቴ።
2 ጾሳይ፥ «ኩሜꬃ ኣላሜን ዲዛ ዴሬ
ኡባፌ ታ ኢንቴና ጻላ ዶራዲስ፤
ኢንቴ ኦꬂዛ
ናጋራ ኡባ ጊሻስ
ታ ኢንቴና ቃጻያይስ» ጌስ።
3 ናምኡ ኣሳቲ ኦጌ ኢሲፌ ባና ጊዲ
ቃቾንታ ኣጊኮ
ኢሲፌ ባናስ ዳንዳይዞ?
4 ጋሞይ ዎራ ጊዶን
ኣይኮ ሚዛ ሚሽ
ሻንካቲ ዴሞንታ ዲሼ
ጮ ሜላ ጻጊ ኤሪዜ?
ዎዳላ ጋሞይ
ኣይኮ ሚዛ ሚሽ
ዴሞንታ ዲሼ ባ ዲዛሶን
ጮ ሜላ ባ ቃላ ሲሲ ኤሪዜ?
5 ያርዴይ ዎይኮ ጊቴይ ባይንዳሶን
ጮ ሜላ ጋዴን
ካፎይ ኦይኬቲ ኤሪዜ?
ዎይኮ ዲዛይ ኢሲ ሚሺ ባና
ቦቾንታ ዲሺን
ጮ ሜላ ፒሪ ኤሪዜ?
6 ካታማ ጊዶን ኦላስ
ዛዬይ ፑኔቲሺን
ባቦን ኮኮሮንታ ኣሲ ዲ ኤሪዜ?
ጎዳ ሼኔይ ባይንዳ ዲሺን
ካታማ ቦላ ኢታ ሚሺ
ጋኪ ኤሪዜ?
7 ጎዳይ ባ ጹራ ባ ኦሳንቻ
ናቤታስ ኮይሮቲ ዮቶንታ ዲሼ
ኣይኮካ ኦꬄና።
8 ጋሞይ ጻጊን ሲዪዲ
ዳጋሞንታይ ኦኔ?
ጎዳይ ባ ጹራ ኢዛስ ዮቲን
ቲንቢቴ ሃሳዮንታይ ኦኔ?
ሳማሪያ ኩንዴꬅ
9 ኣሽዶዴኒኔ ጊብጼን ዲዛ
ሚጻታን ዲዛ ኡባስ፥
«ሳማሪያ ዙማታ ቦላ ሺቂቴ፤
ሄን ኢስታን ኦሴቲዛ
ጌኔ ኦሶኔ
ቡልኣኬቲዛይሳ ጼሊቴ»
ጊ ኣዋጂቴ።
10 ጎዳይ፥ «ሃይቲ ዴሬቲ ሎኦ
ኦሶ ኤሬቴና።
ማካላኒኔ
ጌኔን ኤኪዳ ሚሻን
ባ ሚጻ ኩንꬄቴስ።
11 ሄሳ ጊሻስ ኢንቴ ዴሬ
ሞርኬይ ዎራጃና፤
ኢንቴ ሚጻታ ላሊዲ
ኢንቴ ኬꬃካ ቦንቃና» ጌስ።
12 ጎዳይ፥ «ሄንꬃንቻይ
ጋሞ ዶናፔ
ዶርስ ዎꬂ ኤኪዛ ዎዴ
ዶርሳስ ናምኡ ጌዳታ ዎይኮ
ዱጻ ሃይꬃታ
ዎꬂ ኤኪዛ ማላ
ሳማሪያ ቢታን ኢሻሎን ኡቲዳ
ኢስራኤሌ ኣሳፔ ጉꬃቲ
ጻላ ኣታና» ጌስ።
13 ሳሎ ጎዳይ፥
«ሄኮ ኣኔ ሃይሳ ሲዪቴ!
ያቆቤ ዜሬꬃ ቦላ
ማርካቲቴ።
14 ኢስቲ ኦꬂዳ ናጋራ ጊሻስ
ታኒ ኢስራኤሌ
ኣሳ ቃጻዪዛ ዎዴ
ቤቴሌን ዲዛ
ያርሾ ያርሺዛሶሆታ
ታኒ ላላና፤
ያርሺዛሶሆታ ቦላ ዲዛ
ካጬቲ ሜቄሬቲ ኩንዳና። 2ካዎ 23፡15
15 ኢስቲ ኢዛን ቦኔኔ ባልጎ ዲዛ
ኬꬃታ ኡባ
ታ ላላ ꬋይሳና፤
ዳንጋርሳ ዛሌን
ሎኤꬂ ኣሌቂሲዳ
ኬꬃቲ ዉሪካ ላሌታና፤
ጊታ ኬꬃቲ
ዉሪካ ꬋያና» ጌስ።