4
ዬሩሳላሜ ቦላ ጋኪዳ ቂጻቴ
1 ዎርቃይ ዋኒ ታሲዴስ፤
ዋላካይ ባይንዳ ሙሩታ ዎርቃይ
ዋኒ ላሜቲዴ!
ጾሳ ኬꬂ
ኬጼቲዳ ቦንቾ ሹቻቲ
ኦጌ ዶናን ላሌቲዳ።
2 ካሴ ቦንቼቲዳ
ዎርቃ ሚሳቲዛ
ጺዮኔ ናይቲ ሃኢ ዋኒዲ
ኩሼን ኡርቃፌ ቲሊዲ ሜꬊዳ
ማና ሚሻ ማላ ጊዲዶ!
3 ዎራካናቲ ባ ማራታ ዲቻናስ
ባ ꬋንꬅ ꬋንꬄቴስ፤
ታ ዴሬይ ጊዲኮ
ባዞን ዲዛ
ያንቻ ካፎታ ማላ
ሜንጼ ኢቲዴስ።
4 ዳሮ ሳሜቲዳ ጊሻስ
ጉꬃ ናይታ ኢንጻርሲ
ፑዴ ጎንጊራꬃራ ኦይኬቲዴስ፤
ናይቲ ካꬅ ዎሲዳ ሺን
ኦኒካ ኢስታስ ኢሚቤና።
5 ካሴ ሎኦ ካꬅ ሚዛይቲ
ሃኢ ሜቶቲዲ
ኦጌ ቦላ ቶይላቲዳ፤
ካሴ ሎኦ ማይኦ ማይኢዲ
ኢሻሎን ዲጪዳይቲ
ሃኢ ቢዲንꬃን ኢቺዳ።
6 ታ ዴሬዛ ቦላ ጋኪዳ ቂጻቴይ
ኦና ኩሼይካ
ቦቾንታ ዲሺን
ኤሶን ኣꬋ ዎꬊዳ
ሶዶሜ ካታማ
ኣሳ ጋኪዳ ቂጻቴዛፔካ
ኬሂ ኢታ። ሜꬌ 19፡24
7 ኢስታ ካሌꬂዛይቲ
ሻቻፌ ኣꬊዳ ጌሻ፤
ማꬃፌ ኣꬊ ቦꬃ፤
ኢስታ ቦላይ ዞኦ ኢንቁፌ
ኣꬊዳ ኣሪሳ፤
ቃሴ ኢስታስ ሜꬋይካ
ሲምፔሬ ጌቴቲዛ
ሹቻ ማላ።
8 ሃኢ ጊዲኮ ኢስታ ሜꬋይ
ሻላፔካ ኣꬊ ካሬቲዴስ፤
ኦኒካ ኢስታ ኦጌን ቤኢዲ ኤሬና፤
ኢስቲ ሜቄꬅ ጻላ ኣቲዳ፤
ሜላ ሚꬃ ማላ ጊዲዳ።
9 ኮሻን ሃይቂዳይታፔ
ማሻን ሃይቂዳይቲ ሎኦ፤
10 ታ ኣሳ ቦላ ጋኪዳ ሃንቆ ጋሶን
ናይታስ ሚሼቲዛ ኣዬቲ
ባ ዬሊዳ ናይታ
ባ ኩሼራ ዶይሲ ሚዳ። ዛሬ 28፡57፤ ሂዚ 5፡10
11 ጾሲ ባ ዎልቃማ
ሃንቆዛ ቆንጪሲዴስ፤
ጺዮኖ ዲፒ ሂስቲ
ꬋይሲዛ ታማ ኦይሴꬂዴስ።
12 ቢታ ቦላ ዲዛ ካዎታፔ
ዎይኮ ኣላሜ ቦላ ዲዛ
ኣሳፔ ኦኒካ ኢስታ ሞርኬቲ
ዎይኮ ዎራጂዛይቲ
ዬሩሳላሜ ፔንጌታ
ሜንꬂ ጌላና ጊዲ
ኦኒካ ቆፒቤና።
13 ሃይሲ ሃኒዳይ ናቤቲኔ
ቄሴቲ ኦꬂዳ
ናጋራ ጋሶና፤
ቃሴ ኢስቲ ጺሎታ ሱꬅ
ጉሲዳ ጊሻሳ።
14 ቆቄ ኣሳ ማላ
ኢስቲ ኦጌ ቦላ ጋዲጋዳና፤
ኢስቲ ሱꬃን ቱኒዳ ጊሻስ
ኢስታ ማይኦ ቦቻናስ
ጻሊዛዴይ ዴና።
15 ሄሳ ጊሻስ ኣሳይ ኢስታ ቦላ፥
«ኪቺቴ! ኢንቴ ቱና! ሃኪቴ!
ኑና ቦቾፍቴ!» ጊ ዋሳና።
ሄሳ ጋሶን ኢስቲ ባቃቲዲ
ካዎቴꬃ ጊዶን ቶይላቲሼ
ኣሳይ ኢስታስ፥ «ኢንቴ ኑናራ
ሃይሳን ዳናስ
ዳንዳዬኬታ» ጊዳ።
16 ኢስታ ላሊዳይ ጾሳ፤
ሃይሳፌ ጉዬ ኢዚ ኢስታስ ቆፔና፤
ኢስታ ቄሴታስ ቦንቾይ ኢሜቴና፤
ጪማታስካ ፑላይ ዴና።
17 ኑ ኣይፌይ ማዶ ዴማናስ
ጼሊሼ ጮ ሜላ ዳቡርዴስ፤
ኑና ኣሻናስ
ዳንዳዮንታ ዴሬታፔ
ማዶ ዴማናስ
ላሞታን ናጊዶስ።
18 ኣሳይ ኑ ጌዶን ኤቂዛ ጊሻስ
ኑ ኦጌራ ሄሜታናስ
ዳንዳይቤኮ፤
ኑስ ዉርሴꬂ ማቲዴስ፤
ኑ ላይꬂ ዉሪዴስ፤
ኑ ꬋይዛ ዎዴይ ጋኪዴስ።
19 ኑና ጎዲዛይቲ ሳሎራ ፓሊዛ
ጎሌፌ ኣꬊ ኤሶቴቴስ፤
ኢስቲ ኑና ዙማ ቦላራ ጎዲዳ፤
ባዞን ኑና ዙጊ ናጊዳ።
20 ኑኒ ኢዛ ኩዋ ጋርሳን
ኡቲ ዴኣና ጊ ቆፒዳይሳ፥
ጾሲ ቲይዳይሳ፥
ኑስ ዴኦ ሼምፖካ ጊዲዳይሳ
ባንታ ዎጺማዴን ኦይኪዳ።
21 ኢንቴኖ ኡጼ ቢታን ዲዛ
ኤዶሜ ኣሳቶ!
ኡፋይስ ኖጮጩ ጊቴ!
ጊዶ ኣቲን ቃዳይ
ኢንቴናካ ጋካና፤
ኢንቴ ማꬆታናኔ
ካሎ ኣታና።
22 ኢንቴኖ ጺዮኔ ኣሳቶ!
ኢንቴ ሞሮ ጋሶን ቃጻዬቶይሲ
ኢንቴስ ጊዳና፤
ሃይሳፌ ጉዬ ኢንቴና
ዲኤቲዳ ቢታን ጋምኢሴና፤
ጊዶ ኣቲን ኤዶሜ ኣሳቶ!
ኢዚ ኢንቴና ኢንቴ
ናጋራ ጊሻስ ቃጻያና፤
ኢዚ ኢንቴ ሞሮዛካ
ቆንጬ ኬሳና።