ኣሲ ታና።

ኬሲ ዬዲዴስ፤

ፖኦይ ባይንዳ ጌዴ ꬉማን

ታና ጌልꬂዴስ።

ዛሪ ዛሪዲ ታና ሾጪዴስ።

ታ ሜቄꬃታካ

ሜንꬄሬꬂዴስ።

ኢታ ቱጋ ጊዶ ዬጊዴስ።

ታኒ ꬉማን

ዳና ማላ ኦꬂዴስ።

ታ ዩሾዛ ዲርዴስ፤

ሚኖ ሳንሳላታን

ታና ቃቺዴስ።

ዋሳ ጼይጊንካ

ኢዚ ታ ዋሳ

ሲያናስ ኮዪቤና።

ሹቻን ጎርዲዴስ፤

ታ ኣꬋ ቢዛ

ኦጌዛካ ጌላሲዴስ።

ዛርዶ ማላ ጊዲዴስ፤

ቃሴካ ቆቴቲ ናጊዛ

ጋሞ ማላ ጊዲዴስ።

ጎቺ ኬሲዲ

ዱሴሬꬂ ዬጊዴስ፤

ታና ኣሲ ባይንዳሶን ኦላጊዴስ።

ዳፊ ኦይኪዴስ፤

ታና ጫዳናስ

ባ ዪሽ ጊግሲ ዎꬂዴስ።

ታስ ዎዚና ኣይፌን ጫዲዴስ።

ቂꬌ ሚሽ ጊዳዲስ፤

ጋላስ ኩሜꬅ ታ ቦላ

ቂꬌ ማዛሙሬ ዬጼቴስ።

ኢዚ ታና ጪዬ ኡሹ ካልሲዴስ።

ኢዚ ታና ጉዱላን ዬꬌቲዴስ።

ኡፋይሲ ኢዚ ኣዛኮኔ

ታ ባላዲስ።

«ታ ቦንቾይ

ታፔ ሻኬቲዴስ፤

ታኒ ጾሳፌ ናጊዛ ሂዶታ

ኡባይ ꬋይዴስ» ጋዲስ።

ታ ቆፒሺን ታ ዴኦይ

ታና ጫሚዴስ።

ታ ዎዚናይ ጬጬስ።

ሃይሳ ቆፒዛ ዎዴ

ታስ ሲንꬃፌ ሂዶታይ ዴስ።

ጎዳ ሲቆይ

ዳሮ ጊዲዳ ጋሶና፤

ኢዛ ቃꬌታይካ ሜርናስ

ዉሮንታ ጊሻሳ።

ኔ ኣማኔቴꬃይካ ዳሮ።

ሄሳ ጊሻስ ታ ኢዛን ጻላ

ሂዶታ ኦꬃይስ።

ኦꬂዛይታሲኔ

ኢዛ ኮይዛይታስ ሎኦ።

ኢዛዴይ ጮኡ ጊ ናጊኮ ሎኦ።

ቃምባራ ቶኪኮ ሎኦ።

ኢዚ ባርካ ጮኡ ጊ ኡቶ።

ዳንዳይዛ ጊሻስ

ባና ዚቂ ሂስቲ ሃሪሶ።

ኢዚ ባ ሻጋላ ቤሶ፤

ካዉሻቴꬂካ ኤኮ።

ዬጊ ኣጌና።

ባ ሜርና ሲቆን

ሲሚ ቃꬌቴስ፤

ዎይኮ ዋዬ ኤሂ ኤሬና።

ኡባይ ጌኔን ዬꬌቲሺን፥

ኣሳስ ኣሳቴꬃ

ማታይ ዲጌቲዛ ዎዴ፥

36 ቃሴካ ቱማ ፒርዳይ

ጌላቲዛ ዎዴ

ጎዳይ ሄሳ ማላ

ሃኖታ ዴሜኔ?

ባ ጊዳዝ ፖላናስ

ዳንዳይዛይ ኦኔ?

ባ ጊዳዝ ፖሊዛይ

ኡባፌ ꬎቃ ጾሳ ጊዴኔ?

ፓጻ ዲዛ ኣሲ ባ ናጋራን

ቃጻዬቲሼ ኣዛስ ዙዙሚዜ?

ኑ ኦጌ ኣኔ ፒልጊ ጼሎስ፤

ጎዳኮካ ሲሞስ።

ኑ ኩሼ ሳሎን ዲዛ

ጾሳኮ ፑዴ ዴንꬂዲ፥

ናጋራካ ኦꬂዶስ፤

ሄሳ ጊሻስ ኔኒ

ኑና ማራቤካ።

ኑና ጎዳዳሳ፤

ኔ ኑና

ቃꬌታይ ባይንዳ ዎꬋዳሳ።

ቦንታ ማላ

ኔና ሻራን ካማዳሳ።

ኦርጮኔ ቡራ ኬሳዳሳ።

ባ ዶና ኑ ቦላ ዶይዳ።

ላሌቴꬃን ሜቶኒኔ

ሺሮን ኩምዶስ» ጎስ።

ታ ኣይፌፔ ኣፉንꬂ

ዲኦ ማላ ጎጊዴስ።

ታ ኣይፌፔ ኣፉንꬂ ጉኬስ።

ዱጌ ጼላና ጋካናሳ።

ኡባ ማጫሳታ ቦላ

ጋኪዳ ሜቶዛ

ታኒ ታ ኣይፌን ቤኢዳ ጊሻስ

ታ ዎዚናይ ጬጪዴስ።

ታስ ሞርኬ ጊዲዳይቲ

ካፎ ማላ ታና ሻንካቲዳ።

ፓጻ ዲሺን ዱጌ ኦላን ዬጊዳ፤

ሹቺካ ታ ቦላ ኦሊዳ።

ታስ ሁኤ ቦላራ ጎጊዴስ፤

ታኒ ꬋያዲስ ጋዳ ቆፓዲስ።

ታኒ ጪማ ኦላ ጊዶን ዳሼ

ኔ ሱንꬃ ጼይጋዲስ።

ታ ኔና ዎሲን ሲያዳሳ።

ኔ ታኮ ሺቃዳ፥

«ያዮፋ» ጋዳሳ።

ታና ኣሻዳሳ።

ጋኪዳ ቆሆዛ ቤያዳሳ፤

ኔ ታስ ፒርዳ።

ሃሎ ኬሳናስ ቆፒዳይሳኔ

ኢስቲ ታ ቦላ

ዙፔቲዳይሳ ኔ ቤያዳሳ።

ኢስቲ ታና ጫዪዳ ጫሻኔ

ታ ቦላ ማቄቲዳ ማቆዛ

ኔ ሲያዳሳ።

ታ ቦላ ሳሱኬቴቴሲኔ

ዙዙሜቴስ።

ኢስቲ ኤቂዲ ጊዲን ኡቲዲ

ባ ዬꬃን ታና ጫዴቴስ።

ኢስታ ኦሶ ማላ ኢማ።

ኔ ቃንጌꬂ ኢስታ ጋኮ።

ኔ ኢስታ ኔ ሃንቆን ጎዳ፤

ሳሎ ጋርሳፌ ꬋይሳ።