2
ጾሲ ዬሩሳላሜ ቦላ ኤሂዳ ሃንቆ
1 ጎዳይ ጺዮኔ ማጫ ናዮ ባ ሃንቆን ዎስቲ ካዉሺዴ!
ኢስራኤሌ ቦንቾ
ሳሎፔ ዱጌ ሳኣን ዬጊዴስ፤
ኢዚ ባ ሃንቆ ጋላስ
ባ ቶሆ ሼምፒሲዛሶ
ጊዲዳሮ ዛሪ
ቆፓናስ ኮዪቤና።
2 ያቆቤ ዱሳሶ ኡባ ጾሲ
ቃꬌታይ ባይንዳ ꬋይሲዴስ፤
ዩሁዳ ዴሬ ሚጻታ
ኢዚ ባ ሃንቆን ላሊዴስ፤
ኢዚ ካዎቴꬃኔ
ዴሬ ኣይሲዛይታ
ካዉሺዲ ዱጌ
ቢታን ዬጊዴስ።
3 ኢዚ ባ ጊታ ሃንቆን
ኢስራኤሌ ዎልቃ ሊቂሲዴስ፤
ሞርኬይ ኢዛ ኦላናስ ዪዛ ዎዴ
ባ ማዶ ኩሼ
ኢስታፌ ዴንꬂዴስ፤
ባ ዩሾን ዲዛ ኡባ
ሚዛ ታማ ላጮ ማላ
ኢዛ ሃንቆይ ያቆቤ ቦላ
ኤጺ ኬዚዴስ።
4 ኢዚ ሞርኬ ማላ
ዎንዳፌ ዳፊ ኦይኪዴስ፤
ኢዛ ኡሻቻ ኩሼይ
ዪሻ ዬዳናስ ጊግሲዴስ፤
ባና ሎኢዛይታ ኡባ
ሞርኬ ማላ ሹኪዴስ፤
ጺዮኔ ዱንካኔታ ቦላካ
ባ ሃንቆ ታማ ማላ ቆሊዴስ።
5 ጾሲ ሞርኬ ማላ ጊዲዲ
ኢስራኤሌ ዲፒ ሂስቲዴስ፤
ካዎቴꬃ ኬꬃካ
ꬋይሲዴስ፤
ኢዚ ሚጻካ ላሊዴስ፤
ዩሁዳ ኣሳ ቦላ
ካዮኔ ዚላስ ዳርሲዴስ።
6 ኢዚ ባ ኬꬃ ካꬃ ጊዶን ዲዛ
ጋባ ሾዲዛ ማላ
ሾዲ ኦሊዴስ፤
ጾሲ ጺዮኖ
ኢዛ ላይꬃን ላይꬃን
ቦንቺዛ ባኣሌታኔ
ሳምባታታ ዲጊዴስ፤
ኢዚ ባ ሚኖ ሃንቆን
ካዎዛኔ ቄሴዛ
ካዉሺዴስ።
7 ጎዳይ ያርሾ
ያርሺዛሶሆዛ ካꬊዴስ፤
ባ ኬꬃካ ኣጊዴስ፤
ባ ካዎቴꬃ ኬꬃ ጊምቤታ
ሞርኬስ ኣꬂ ኢሚዴስ፤
ባኣሌ ጋላሳታን
ኦꬂዛይሳꬆ
ኢስቲ ጎዳ ኬꬃን
ኬሂ ዋሲዳ።
8 ጎዳይ ጺዮኔ ካታማ ጊምቤ
ላላናስ ቃንጺ ዴንዲዴስ፤
ሚጼ ዎዶሮዛ ፒዲሲዴስ፤
ኢዚ ኢስታ ꬋይሶንታ ኣጌና፤
ሚጻቲኔ ጊምቤቲ ላሌቲዳ፤
ኢስቲካ ኢሲፌ ꬋይዳ።
9 ኢዚ ፔንጌቲ ዱጌ ቢታን ጌሊዳ፤
ካሬ ጎርዲዛ ቢራታ ኮላታቲ
ሜቄሬቲ ዎꬊዳ፤
ኢዚ ካዎዚኔ ዳናቲ
ኣይዛቤታን ዲኤቲ ቢዳ፤
ሃይሳፌ ጉዬ ካሴ ኢስታስ ዲዛ
ዎጋይ ኦꬄና፤
ኢዚ ናቤታስካ ሃይሳፌ ጉዬ
ጎዳፔ ኣጁታይ ቆንጬና።
10 ጺዮኔ ዴሬ ጪማቲ
ቢታ ቦላ ጮኡ ጊ ኡቲዳ፤
ኢስቲ ባ ሁኤን ጉዱላ ላሊዳ፤
ማቃካ ማይኢዳ፤
ዬሩሳላሜ ጌላኦቲ
ዱጌ ቢታ ጼሊዳ።
11 ታ ዴሬይ ዉሪዴስ፤
ናቴꬃ ናይቲኔ ቄሪ ናይቲ
ካታማ ጊዶን ላባኒ ኩንዲዳ።
ሄሳ ጊሻስ ታ ኣይፌይ
ኣፉንꬃን ባልጁሚዴስ፤
ታስ ማራጬይ ኮኮሪዴስ፤
ታ ዎዚናይካ ሴሪዴስ፤
12 ኦላሶን ማዱንጺ ኩንዲዳ
ኣሳታ ማላ
ካታማይ ጊዶን ኢስቲ ዳቡርዳ፤
ኢስቲ ባንታ ኣዬታ፥
«ካꬂኔ ሃꬂ
ኑስ ኣዋን ዲዜ?»
ጊ ኦይቺሼ ኢስቲ ቄሴ ቦላ
ቦርኮቲዲ ሼምፖ ኬዚዳ።
13 «ሃኔ ዬሩሳላሜ!
ታ ኔ ጊሻስ
ኣይ ጋናስ
ዳንዳያዚና?
ታ ኔና ኣዛራ ጊናሳ ጼሎ?
ሃኔ ዶሴቲዳ
ጺዮኔ ጌላኦዬ!
ታ ኔና ዎስታ ሚንꬄꬃናስ
ዳንዳያዚና?
ኔ ማዱንꬃይ
ኣባፌካ ጪማቴስ፤
ኔና ፓꬃናስ
ዳንዳይዛይ ኦኔ?
14 ኔ ናቤታ ኣጁታይ
ዎርዶኔ ጮ ሃዳ፤
ኔ ናጋራ ቆንጪሲዲ
ኔና ዲኤቴꬃፌ ኣሼቴና፤
ኢስቲ ኔስ ዮቲዛ ቲንቢቴይ
ባሌꬂዛዚኔ
ኦጌፔ ካሬ ኬሲዛዛ።
15 ኔ ኣቻራ ኣꬊ ቢዛ ኡባይ
ኔ ቦላ ባ ኩሼ ባቂ ካኣና፤
ቢታ ኡባን
ኣꬎ ሎኦ ጌቴቲዛ
ካታማያኔ
ዴሬ ኡባይ ኡፋዬቲዛ
ካታማያ ሃኒ?» ጋና፤
ቂꬊሼካ ባ ሁኤ ቃꬃና።
16 ኔ ሞርኬቲ ኡባይ ኢሲፌ
ባንታ ዶና ኬሂ ዶይዳ፤
ባንታ ኣች ሳጺሼ ቂꬊዳ፤
«ኑኒ ኢዞ ሚቲዶስ!
ኑኒ ኣሞቲዳራ ሃኖ፤
ሼምፖራ ፓጻ ዲዲ
ጋኪ ኣይፌን ቤኢዶስ» ጊዳ።
17 ጾሲ ባ ቆፒዳይሳ ኦꬂዴስ፤
ዳሮ ዎዴፔ ካሴ ዮቲዳ
ቃላ ፖሊዴስ፤
ኢዚ ኔና ቃꬌታይ
ባይንዳ ላሊዴስ፤
ኔ ዋዬቲሺን
ሞርኬይ ኡፋዬታና ማላ
ኔ ሞርኬታ
ꬎቁ ꬎቁ ሂስቲዴስ።
18 ዬሩሳላሜ ጊምቤ
ጊዶን ዲዛ ኣሳዉ!
ጾሳኮ ዋሲቴ፤
ኢንቴ ኣፉንꬂ ኦማርሲኔ
ጋላስ ዲኦ ማላ ጎጎ፤
ኢንቴካ ሼምፖፍቴ፤
ኢንቴ ኣይፌሲካ ሼምፖ ኢሞፍቴ።
19 ቃማ ኩሜꬅ ዴንዲዲ ዋሲቴ፤
ጎዳ ሲንꬃን ኢንቴ ዎዚና
ሃꬃ ማላ ጉሲቴ፤
ኦጌ ዶናን ኮሻቲ ኩንዲዳ
ኔ ናይታ
ሼምፖ ጊሻስ ኔ ኩሼ
ፑዴ ኢዛኮ ዴንꬃዳ ዎሳ።
20 ኣቤት ጎዳዉ!
ሃይሳ ኔ ቤኣ!
ኔኒ ሃይሳꬆ ካሴ ኦና ቦላ
ኦꬃ ኤሪዛኮ ኣኔ ኣኬካ፤
ኣያ ዬላ ዲቺዳ ና
ዛራ ማናስ ቤሲዜ?
ቄሴይኔ ናቤይ
ጾሳ ኬꬃን
ሃይቃናስ ቤሲዜ?
21 ዬላጋቲኔ ጪማቲ ሃይቂዲ
ኦጌን ኩንዲ ኣቲዳ፤
ዬላጋ ማጫሳቲኔ
ኣቱማቲ ማሻን ሃይቂዳ፤
ኔ ሃንቄቲዳ ጋላስ
ኢስታ ዎꬋዳሳ፤
ቃꬌታይ ባይንዳካ ሹካዳሳ።
22 ባኣሌ ጋላስ ዲጊሳስ
ጼይጊዛ ማላ
ታ ሞርኬታ ታ ቦላ ጼይጋዳሳ፤
ኔ ሃንቆ ጋላስ
ኦኒካ ኬሲ ኤኪቤና፤
ዎይኮ ሼምፖራ ፓጻ
ኣቲዳይ ዴና፤
ታ ዬላ ዲቺዳይታ
ሞርኬይ ታፔ ꬋይሲዴስ።