ኤርማሳ ዚላስ
ጊዶ ቆፋ
ኤርማሳ ዚላሲ ኪርስቶሲ ዬሌታናፔ ካሴ 586 ላይꬃን ዬሩሳላሜይ ላሌቲዳ ጊሻሲኔ ዴሬይ ጎዴቲዳ ጊሻስ ኢቻሹ ዚላሳ ጊንጾታ ሺሺ ኦይኪዴስ፤ ሃ ማጻፋን ዳሪዛ ባጋይ ዬሆ ጊሻሲኔ ካዮቴꬃ ጊሻስ ዮቲዛ ጊዲኮካ ኣሲ ጾሳን ኣማኔታና ጊሻሲኔ ሂዶታ ቃንጾንታ ዳና ማላ ታማርሲዛ ጊንጾ ኪፊሌይካ ኢዛን ዴስ፤ ሃይቲ ዚላሳቲ ኣይሁዳ ኣሳይ ኪርስቶሲ ዬሌታናፔ ካሴ 586 ላይꬃን ዴራ ቦላ ጋኪዳ ባሻ ዩሺ ቆፓና ማላ ላይꬃን ላይꬃን ጾማኒኔ ካዮቴꬃን ጾሳ ጎይኖ ዎጋታ ኢስቲ ፖሊዛ ጋላሳታን ጎኤቴቴስ።
ሃ ማጻፋይ ኦይኪዳ ኩሜꬃ ቆፋ
ኮይሮ ዚላስ፦ ዬሩሳላሜ ዋዬኔ ካዮቴꬅ 1፡1-22
ናምኣንꬆ ዚላስ፦ ጾሲ ዬሩሳላሜ ቦላ ዬጊዳ ቂጻቴ 2፡1-12
ሄꬓንꬆ ዚላስ፦ ሲንꬃፌ ያና ሂዶታ 3፡1-66
ኦይዳንꬆ ዚላስ፦ ዬሩሳላሜ ꬋዮ 4፡1-22
ኢቻሻንꬆ ዚላስ፦ ማሮቴꬅ ዴማናስ ዎሳ 5፡1-22
1
ዬሩሳላሜ ዋዬኔ ካዮ
1 ካሴ ኢዚን ዳሮ ካዎቴꬃይ
ዲዛ ካታማያ
ዋናዳ ኦሌታ ኣታዴ!
ዴሬታ ጊዶን ካሴ ጊታ ጊዲዳራ
ዋናዳ ኣምኢ ማላ ጊዳዴ!
ኣዉራጃታ ጋርሳን
ጎዳቶ ጊዲዳራ
ሃኢ ዋናዳ ኣይሌ ጊዳዴ!
2 ኢዛ ጊዶꬂ
ጫሞ ዬሆ ዬካዉስ፤
ኢዚስ ኣፉንꬃይካ
ሻጋላራ ጎጌስ፤
ኢዚ ላጌታፔ ኢዞ
ሚንꬄꬂዛይ
ኦኒካ ዴና፤
ኡባቲካ ኢዞ ካዲዳ፤
ዛሪዲካ ኢዚስ ሞርኬ ጊዲዳ።
3 ዩሁዳይ ዳሮ ዋዬቲዳፔኔ
ቶሼቲዳፔ ጉዬ ዲኤታዱስ፤
ኢዛ ካዎቴꬃታ
ጊዶን ኡታዱስ፤
ኢዚስ ሼምፒዛሶይካ ꬋይዴስ፤
ኢዛ ሜቶ ጋርሳን ዲሺን
ጎዲዛይቲ ኡባይ ኢዞ ዴሚዳ።
4 ኦኒካ ኢዚ ባኣሌታ
ቦንቻናስ
ዮንታ ጊሻስ ጺዮኔ ኦጌቲ ዬኬቴስ፤
ኢዚ ፔንጌታራ ጌሊዛይኔ
ኬዚዛይ ዴና፤
ኢዚ ቄሴቲ ጬጬቴስ፤
ጌላኦቲካ ሙዞቴቴስ፤
ኢዛካ ጊታ ሜቶ
ጋርሳን ቱጋታዉስ።
5 ኢዚ ናጋራይ ዳሮ ጊዲዳ ጋሶን
ጎዳይ ኢዚ ቦላ ሜቶ ዬጊዴስ፤
ኢዚ ሞርኬቲ ኢዞ ሃሪዳ፤
ኢዚ ናይቲካ ሞርኬታን ዲኤቲዳ፤
ኢዚ ሞርኬታስ ዱሲ ሎኢዴስ።
6 ጺዮኔ ማጫ ናይፔ
ኢዚ ፑላቴꬂኔ ቴማይ
ሻኬቲ ኪቺዴስ፤
ኢዚ ዳናቲ ማታ
ሚዛሶይ ꬋይዳ
ጌኔሳ ማላ ጊዲዳ፤
ኢስቲ ባና ጎዲዛይታፔ
ዎልቃይ ዉሪን ባቃቲዳ።
7 ዬሩሳላሜይ ሜቶቲዳ ዎዴኒኔ
ዋዬቲዳ ጋላሳታን
ካሴ ኢዚስ ዲዛ ኣቆታ
ዩሻ ቆፓዉስ፤
ኢዛ ሞርኬ ኩሼን
ኩንዲዳ ዎዴ
ኢዞ ማዲዛይ
ኦኒካ ባይንዳ ዎዴ፥
ኢዚ ሞርኬቲ ኢዚ ኩንዴꬃ
ቤኢዲ ኢዚ ቦላ ሚጪዳ።
8 ዬሩሳላሜይ ዳሮ ዴጾ
ናጋራ ኦꬃዱስ፤
ካꬌስካ ኣታዱስ፤
ኢዛ ካሎ ዲሺን ቤኢዳ ጊሻስ
ካሴ ኢዞ ቦንቺዳይቲ ኡባይ
ኢዞ ካꬊዳ፤
ኢዛካ ባ ባጋራ ዬላታዳ
ቢታ ጼላሼ ጉዬ ሲማዱስ።
9 ኢዚ ቱናቴꬂ
ኢዚ ማይኦ ቦላ ቤቲዴስ፤
ሲንꬃፌ ኢዚ ቦላ ሃናናይሳ
ኢዛ ቆፓቤኩ፤
ኢዚ ኩንዴꬂ
ዳጋንꬂዛዝ ጊዲዴስ፤
ኢዛ፥ «ታ ጎዳ ጾሶ!
ታ ሜቶቲዛ ሜቶዛ ቤኣ፤
ታ ሞርኬቲ ታና ጾኒዳ»
ጋ ዎሲንካ
ኢዞ ሚንꬄꬂዛይ
ኦኒካ ቤቲቤና።
10 ኢዚ ኣቆታ ኡባ ቦላ
ሞርኬይ ባ ኩሼ ዬዲዴስ፤
ጾሳ ኣሳ ሺቆን
ጌሎንታ ማላ ኔኒ ዲጊዳይቲ
ኤቃ ጾሳታስ
ጎይኒዛ ኣይዛቤቲ
ጌዴ ኢዚ ጾሳ ኬꬃን
ጌሊሺን ቤኣዱስ።
11 ኢዚ ኣሳይ ሚዛ ካꬅ ዴማናስ
ኮሻን ዳቡሬስ፤
ሼምፖራ ፓጻ ዳናስ ባስ ዲዛ
ኣቆታ ማና ካꬃራ ላሜቴስ፤
ዬሩሳላሜ ኣሳይ፥ «ኣቤት ጎዳዉ!
ኑኒ ካዉዪዶስ፤
ኑና ጼላዳ ኑስ ቆፓ።
12 «ጎዳ ጾሲ
ባ ዎልቃማ ሃንቆዛ
ኑ ቦላ ዬዲዳ ዎዴ
ኑ ቦላ ጋኪዳ ሜቶ ማላ
ሜቶይ ጋኪዳ ኣሲ ዲዛ ጊዲኮ
ኢንቴኖ ኦጌራ ኣꬊ ቢዛ
ኡባቶ ኣኔ ቤኢቴ!
ሃ ሜቶይ ኢንቴስ
ካዉሻ ሚሳቲዜ?
13 «ኢዚ ቦላ ꬎቃሶሆፔ
ታማ ዬዲዴስ፤
ሄ ታማዚካ ኑስ
ሜቄꬃን ጌሊዴስ፤
ኑ ቶሆታ ቃቻናስ
ጊቴ ዬጊዴስ፤
ሂስቲዲ ኑና
ጉዬ ዛሪ ኩንዲሲዴስ፤
ኩሜꬃ ጋላስ
ኑና ዳቡርሲዴስ፤
ጮ ሜላካ ቶይላሲዴስ።
14 «ታ ናጋራ ሺሺ ቃቺዲ
ታ ሞርጌን ዎꬂዴስ፤
ታ ዎልቃካ ዉርሲዴስ፤
ታኒ ኤቄታናስ
ዳንዳዮንታ ሞርኬታስ
ጎዳይ ታና ኣꬂ ኢሚዴስ።
15 «ኑ ጋርሳን ዲዛ ኦላንቻታ
ኡባታራ ጾሲ ኤቄቲዴስ፤
ኑ ጊዶፌ ዬላጋታ ꬋይሳናስ
ኦላንቻታ ኑ ቦላ ዬዲዴስ።
ዎይኔ ሚꬃ ኣይፌ
ኡሹ ኬሳናስ
ዬꬊዛ ማላ
ጎዳይ ቦሼቶንታ
ጌላኦ ሚሳቲዛ
ዩሁዳ ኣሳ ዬꬊዴስ።
16 «ሞርኬይ ኑ ቦላ ጎቢዴስ፤
ኑ ናይቲካ ባርካ ኣቲዳ፤
ኑና ዞሪ ሚንꬄꬂዛይቲ
ኑፔ ሃኪዳ፤
ሄሳ ጊሻስ ታ ዬካይሲኔ
ኣፉንꬃ ጉሳይስ።
17 ጺዮና ባ ኩሼ ሚጫዱስ፤
ኢዞ ሚንꬄꬂዛዴይ ዴና፤
ያቆቤ ዛሬታስ ሾሮቲ
ኢዛስ ሞርኬ ጊዳና ማላ
ጾሲ ኣዛዞ ኬሲዴስ፤
ዬሩሳላሜይካ ኢስታ ጊዶን
ቱና ሚሻ ማላ ቆዴታዱስ።
18 «ጾሲ ጺሎ፤
ታኒ ጊዲኮ
ኢዛ ኣዛዞ ቦላ ማካላዲስ፤
ኢንቴ ዉሪካ ሲዪቴ፤
ታ ሜቶዛካ ጼሊቴ፤
ማጫ ናይቲኔ
ናቴꬃ ኣቱማ ናይቲ
ታፔ ዲኤቲ ቢዳ።
19 ታኒ ታ ዶሲዛይታ ጼይጋዲስ፤
ኢስቲ ጊዲኮ ታና ካዲዳ፤
ታ ቄሴቲኔ ጪማቲ
ባ ሼምፖ ኣሻናስ
ካꬅ ኮዪሼ
ካታማይ ጊዶን ዉሪዳ።
20 «ኣቤት ጎዳዉ!
ታ ዋዬዛ ቤኣ!
ታ ጊዶ ኣሳቴꬃይ ሜቶቲዴስ፤
ታ ኬሃ ማካላዲስ፤
ታ ዎዚናይካ ሜቂዴስ፤
ካሬን ጊዲን ሶን
ዴራ ሃይቆይ ዉርሴስ።
21 «ዴሬይ ታ ዚላሊዛይሳ ሲዪዴስ፤
ጊዶ ኣቲን ኦኒካ ታና
ሚንꬄꬂዛዴይ
ቤቲቤና፤
ታ ሞርኬቲ ኡባይካ
ታ ሜቶቶይሳ ሲዪዳ፤
ኔኒ ኦꬆይሳካ ኤሪዲ
ኢስቲ ኡፋዬቲዳ፤
ኔ ኢስታ ቦላ ኤሃና ጋ
ቃቺዳ ጋላሳያ ዩ፤
ኢስቲካ ታ ማላ ዚላሌቶ።
22 «ኢስታ ኢታቴꬂ
ኔ ሲንꬃን ቤቶ፤
ታ ናጋራ ጋሶን
ኔ ታ ቦላ ኦꬆይሳꬆ
ኢስታ ቦላካ ኦꬃ፤
ታ ጬጫዳ ዚላሊዛ
ዚላሳይ ዳሪዴስ፤
ታ ዎዚናይካ ዳቡርዴስ»
ጊሼ ዋሴቴስ።