1 ሴዴቂያሲ ካዎቲዛ ዎዴ ኢዛስ ላይꬃይ ናምኡ ታማኔ ኢሲኖ፤ ኢዚ ዬሩሳላሜን ታማኔ ኢሲ ላይꬅ ካዎቲዴስ፤ ኢዛ ኣዬይ ሱንꬂ ኣምጻሎ ጊዲሺን ኢዛ ሊቢና ዴሬ ኣስ ኤርማሳ ና። 2 ሴዴቂያሲካ ኢዮኣቄሜይ ኦꬆይሳꬆ ጎዳ ሲንꬃን ኢታ ሚሽ ኦꬂዴስ። 3 ጎዳይ ዬሩሳላሜ ቦላኔ ዩሁዳ ቦላ ሄሳ ኡባካ ጋꬂዳይኔ ዉርሴꬃን ኢዚ ባ ሲንꬃፌ ዲጊዳይ ሃንቄቲዳ ጊሻሳ።

ሴዴቂያሲካ ባቢሎኔ ካዎ ቦላ ማካሊዴስ። 4 ሄሳ ጊሻስ ሴዴቂያሲ ካዎቲዳ ኡዱፉንꬃ ላይꬃን ታማንꬃ ኣጊናን ታማንꬃ ጋላስ ባቢሎኔ ካዎ ናቡካዳናጾሬይ ባ ኦላ ዎታዳራታ ኡባ ሺሺ ኤኪዲ ዬሩሳላሜ ቦላ ዎራጂዴስ። ካታማዮካ ጊዶꬂዴስ፤ ዩዪ ኣꬋናስ ኬላ ኬሊዴስ። ሂዚ 24፡2 5 ካታማያካ ካዎ ሴዴቂያሲ ካዎቲን ኢዛስ ላይꬃይ ቢዲ ታማኔ ኢሲ ላይꬅ ጊዳና ጋካናስ ጊዶꬂዳ ማላ ጋምኣዱስ።

6 ኦይዳንꬃ ኣጊናን ኡዱፉንꬃ ጋላስ ሄ ካታማይን ኮሻይ ሚኒዳ ጊሻስ ዴሬዛስ ማና ካꬂ ꬋይዴስ። 7 ሄ ካታማይ ጊምቤይ ላሌቲዴስ፤ ኦላ ኣሳይ ኡባይካ ኬዚ ባቃቲዴስ። ባቢሎኔ ዴሬ ኣሳይ ሄ ካታማይ ዩሾን ዲኮካ ካዎዛ ኣታኪልቴ ኣቻን ናምኡ ጊምቤታ ጊዶን ዲዛ ፔንጌዛራ ጊዶꬅ ካታማይፔ ኬሲ ኤኪ ባቃቲዲ ኣራቤ ጌቴቲዛሶ ቢዳ። ሂዚ 33፡21 8 ባቢሎኔ ዴሬ ኦላንቻቲ ካዎ ሴዴቂያሳ ዬዴꬂዲ ኢያርኮ ዴምባን ኢዛ ጋኪዳ፤ ዎታዳራቲ ኡባይካ ኢዛፔ ሻኬቲዲ ላሌቴꬃን ዲሺን ካዎዛ ኦይኪዳ።

9 ኢዛ ሃማቴ ዴሬን ኤሬቢላ ጌቴቲዛሶን ዲዛ ባቢሎኔ ካዎኮ ኤፊዳ፤ ባቢሎኔ ካዎይ ሄን ኢዛ ቦላ ፒርዲዴስ። 10 ኤሬቢላን ባቢሎኔ ካዎይ ሴዴቂያሳ ኣቱማ ናይታ ኢዛ ሲንꬃን ሹኪዴስ፤ ዩሁዳ ዴሬ ሹሜታ ኡባካ ዎꬊዴስ። 11 ሴዴቂያሳ ኣይፌታካ ዎጪ ኬሲዴስ፤ ጻርቂማላ ሳንሳላታን ኢዛ ቃቺዲ ባቢሎኔ ኤፊዴስ፤ ሂስቲዲ ኢዚ ሃይቃና ጋካናስ ሄን ቃሾ ኬꬃን ጋምኢሲዴስ። ሂዚ 12፡13

12 ባቢሎኔ ካዎ ናቡካዳናጾሬይ ካዎቲዳ ታማኔ ኡዱፉንꬃ ላይꬃን ኢቻሻንꬆ ኣጊናን ታማንꬃ ጋላስ ባቢሎኔ ካዎዛ ቦንቾ ናጊዛ ዎታዳራታ ሃላቃይ ካዎ ሹሜ ናቡዛራዳኔይ ዬሩሳላሜ ዪዴስ። 13 ጎዳ ኬꬃዛኔ ካዎቴꬃ ኬꬃ ሄሳꬆካ ዬሩሳላሜን ዲዛ ኬꬅ ኡባካ ታማን ጹጊዴስ፤ ሃራ ዎልቃማ ኬꬃታካ ዲፒ ሂስቲ ጹጊዴስ። 1ካዎ 9፡8 14 ካዎዛ ቦንቾ ናጊዛ ዎታዳራታ ሃላቃፔ ጋርሳራ ዲዛ ባቢሎኔ ኦላንቻቲ ኡባይ ዬሩሳላሜ ዩሾን ዲዛ ጊምቤዛ ኡባ ላሊዳ። 15 ናቡዛራዳኔይ ኢሲ ኢሲ ማንቆታ፥ ካታማይ ጊዶን ኣቲዳ ኣሳታ፥ ሂላንቻታኔ ባቃቲዲ ባቢሎኔ ካዎስ ኩሼ ኢሚዳይታ ዴንꬂ ኤፊዴስ። 16 ጊዶ ኣቲን ናቡዛራዳኔይ ሃንኮ ሄ ቢታን ዲዛ ማንቆታ ዎይኔ ቶካናሲኔ ጎሻንቻታ ጊዳና ማላ ሄን ኣጊዴስ።

17 ባቢሎኔ ዴሬ ኣሳይ ጎዳ ኬꬃን ዲዛ ጻርቂማላ ቱሳታ፤ ሚሻታ ኢስታ ቦላ ዎꬂዲ ኢሲ ሶሆፔ ሃራሶ ኤፊዛ ጋሬታኔ ጻርቂማላፔ ኦሴቲዳ ሃꬃ ጎንጌታ ሜንꬄሬꬂ ዬጊዳ፤ ጻርቂማላ ኡባካ ባቢሎኔ ኤኪ ቢዳ። 1ካዎ 7፡15-47 18 ሄይታፔ ሃራካ ጻሮታ፥ ታማ ካሺዛ ኮንኣታ፥ ቃጴታ፥ ኬሬታ፥ ጪልፋታኔ ጎዳ ኬꬃ ጊዶን ኦሶስ ጎኢዛ ጻርቂማላፔ ኦሴቲዳ ሚሻታ ኡባካ ኤኪ ቢዳ። 19 ካዎ ቦንቾ ናጊዛ ዎታዳራታ ሃላቃይ ሙሩታ ዎርቃፌኔ ሙሩታ ቢራፔ ኦሴቲዳ ሚሻታ ኡባ፥ ጉቃ ሳኔታ፥ ኤጻኔ ጩዋሲዛ ጺናታ፥ ኬሬታ፥ ቄሪ ጻሮታ፥ ጾምፔ ኢስታ ቦላ ዎꬂዛ ሚሻታ፥ ጪልፋታኔ ኡሻ ያርሾ ኢስታን ሺሺዛ ጹኣታ ኤኪ ቢዴስ።

20 ካዎ ሶሎሞኔይ ጎዳ ኬꬄስ ጻርቂማላፔ ኦሲሲዳ ናምኡ ቱሳቲ፥ ሃꬃ ጎንጌ፥ ኢዛፔ ጋርሳ ባጋራ ዲዛ 12 ዎፋኖቲኔ ሚሻታ ኢስታ ቦላ ዎꬂዲ ኢሲ ሶሆፔ ሃራሶ ኤፊዛ ጋሬቲ ኬሂ ዴጼቴስ። 21 ኢሲ ኢሲ ቱሳ ጌሳይ 18 ዋꬋ፥ ጎምፓይ ዩዪ ኣꬋናስ 12 ዋꬋ፤ ኢዛስ ጊዶይ ዶያ ጊዲዳ ጊሻስ ኢሳ ኢሳ ዶና ኦርዴቴꬃይ ኦይዱ ቢራꬌይ ዎꬊዛ ኬና። 22 ኢሲ ቱሳ ሁኤ ቦላ ዋꬊዛ ጻርቂማላፔ ኦሴቲዳ ቁስቴይ ዴስ፤ ኢሲ ኢሲ ጻርቂማላፔ ኦሴቲዳ ቁስቴ ኣዱሳቴꬃይ 5 ዋꬋ ጊዲሺን ዩዪ ኣꬋናስ ኦሮማኔ ሚꬃ ኣይፌ ሚሳቲዛ ጌጼን ጌጼቲዴስ፤ ሃንኮ ቱሳይካ ሄ ኦሮማኔ ኣይፌ ሚሳቲዛ ጌጼን ጌጼቲ ካሴይሳራ ኢሲኖ ሚሳቲዴስ። 23 ኡዱፉን ታማኔ ኡሱፑን ኦሮማኔ ሚꬃ ኣይፌቲ ሚሌ ባጋራ ዋዬይ ባይንዳ ቤቲዛይታ ጊዲሺን ዩሾዛን ዲዛ ኦሮማኔ ሚꬃ ኣይፌታ ቆዳይ ጼታ።

24 ካዎዛ ቦንቾ ናጊዛ ዎታዳራታ ሃላቃይ ካሴ ቄሴታ ሃላቃ ሳራያ፥ ኢዛፔ ጋርሳራ ዲዛ ቄሴ ሶፎናሳኔ ፔንጌ ናጊዛ ሄꬑ ዛቤታ ቃቺ ኤፊዴስ። 25 ካታማ ጊዶን ኣቲዳ ኣሳፔ ኦላንቻታስ ኣላፌ ጊዲዳ ኦላ ጋዳዋ፥ ካዎ ዞሪዛ ላፑናታ፥ ዴሬዛ ጊዶፌ ኦላንቻታ ዶሪዛ ኦላ ጋዳዋ፥ ጻፌዛኔ ካታማ ጊዶን ቤቲዳ ሃራ 60 ኣሳታ ኤኪ ቢዴስ። 26 ካዎዛ ቦንቾ ናጊዛ ዎታዳራታ ሃላቃ ናቡዛራዳኔይ ሄይታንታ ኡባ ኤኪዲ ባቢሎኔ ካዎይ ዲዛሶ ኤሬቢላ ጋꬂዴስ። 27 ካዎዚካ ኢስታ ሄን ኤሬቢላን ዲፒ ሂስቲ ዎꬊዴስ፤ ዩሁዳይካ ሄሳ ማላን ባ ቢታፌ ዲኤታ ባዱስ። 28 ናቡካዳናጾሬይ ዲኢ ኤፊዳ ዴሬዛ ቆዳይ ሃይሳፌ ካሊ ዲዛይሳ፤

31 ዩሁዳ ካዎ ኢዮኣኪኔይ ዲኤቲዳ ሄꬑ ታማኔ ላፑንꬃ ላይꬃን ዮሪ-ማሮዴቄይ ባቢሎኔን ካዎቲዴስ፤ ሄ ላይꬃንካ ታማኔ ናምኣንꬃ ኣጊናን ናምኡ ታማኔ ኢቻሻንꬆ ጋላሳን ዩሁዳ ካዎ ኢዮኣኪኔ ቆፒዴስ፤ ቃሾ ኬꬃፌካ ኢዛ ኬሲዴስ። 32 ኢዛ ሎኦ ቃላን ሃሳይሲዴስ፤ ባቢሎኔን ኢዛራ ቃሾሶን ዲዛ ካዎታ ኡባታፔ ቦላራ ኣꬂዲ ኢዛ ቦንቾሶን ዎꬂዴስ። 33 ኢዮኣኪኔይ ቃሾሶን ዲሼ ማይኢዳ ማይኦዛ ኢዛፔ ቃሪ ዬጊዴስ፤ ሄሳፌ ቢዲ ሃይቃና ጋካናስ ባ ዲዛ ዎዴ ኡባን ካዎዛ ማዳፌ ሚሼ ጋምኢዴስ። 34 ባቢሎኔ ካዎ ኢዮኣኪኔይ ቢዲ ሃይቃና ጋካናስ ፓጬይ ባይንዳ ኡባ ዎዴ ኢዛስ ማና ቃላባ ኢሚዴስ።