51
ባቢሎኔ ꬋዮ ጊሻስ ዮቴቲዳ ኪታ
1 ጎዳይ፥ «ቤኢቴ! ባቢሎኔኔ
ኢዚን ዲዛይታ ቦላ
ꬋይሲዛ ጫርኮ ታኒ ዬዳና።
2 ኢዞ ሱራጋናሲኔ
ኢዞ ꬋይሳናስ ኣላጋታ
ታ ባቢሎኔ ቦላ ኪታና፤
ኢዛ ሜቶቲዳ ጋላስ
ኢዞ ዶዲ ኦይኪዲ ኡንኤꬃና።
3 ዎንዳፌ ዱኪዛይቲ
ባ ዎንዳፌ ዱካናስ፥
ባ ኦላ ማይኦ
ማይኣና ጋካናስ
ሼምፖ ኢሞፍቴ፤
ናቴꬃ ኢዚ ናይታስ ቃꬌቶፍቴ፤
ኢዚ ኦላንቻታ ሙሌራ ꬋይሲቴ።
4 ኢስቲ ባቢሎኔ ቢታን ሲፌቲዲ፥
ኢዚ ኦጌታን ሃይቃና ጋካናስ
ማዱንጺዲ ኩንዳና።
5 ኢስታ ቢታያ ኢስራኤሌ
ጌሻ ሲንꬃን
ሞሮን ኩሚዳ ጊዲኮካ
ኢስራኤሌኔ ዩሁዳ ኡባፌ
ዎልቃማ ጎዳይ ኢስታ ጾሳይ
ኢስታ ዬጊ ኣጊቤና።
6 «ባቢሎኔፔ ባቃቲ ኬዚቴ!
ኤሌሊዲ ኢንቴ ሼምፖ ኣሺቴ፤
ኢዚ ናጋራ ጋሶን ꬋዮፒቴ፤
ሃይሲ ጎዳይ ሃሎ ኬሲዛ ዎዴ
ኢዚ ኦሶ ማላ ኢዚስ ኢማና።
7 ባቢሎኔይ ጎዳ ኩሼን
ዎርቃ ጹኣ፤
ቢታ ኡባ ማꬆሳዱስ፤
ካዎቴꬃቲ ኡባይ
ኢዚ ዎይኔ ኡሻ ኡዪዳ፤
ሄሳ ጊሻስ ሃኢ ጎዪዳ። ኣጁ 17፡2-4፤ 18፡3
8 ባቢሎኔይ ቆፖንታ ዳሼ
ኩንዳ ሜቃና፤
ሄሳ ጊሻስ ኢዚስ ዋሲቴ!
ኦኔ ኤሪዛይ ኢዛ ፓጻናኮ
ኢዚ ማዱንꬃስካ ꬋሌ ኮዪቴ።
9 «ኣሳይ፥ ‹ኑኒ ባቢሎኔ
ፓꬃናስ ባጼቲዶስ፤
ኢዛ ጊዲኮ ፓጻና ዳንዳዩኩ፤
ኢዚ ፒርዳይ
ፑዴ ሳሎ ጋኪዳ ጊሻስ
ሻራን ጋካናስካ
ꬎቁ ጊዳ ጊሻስ
ኢዞ ኣጋጊዲ ኣኔ
ኑ ዴሬ ዴሬ ሲሞስ። ኣጁ 18፡5
10 ጎዳይ ኑ ሱሬቴꬃ ጊሻስ
ማርካቲዴስ፤
ኣኔ ሃ ዪቴ፤ ጎዳ ኑ ጾሳይ
ኦꬂዳይሳ
ጺዮኔን ኣዋጆስ› ጊዴስ።
11 «ቶራታ ሌፍቴ፤
ጎንዳሌታካ ጊግሲቴ፤
ጎዳይ ባቢሎኔ ꬋይሳና
ቆፒዳ ጊሻስ
ሜዶኔ ካዎታ ዴንꬄꬂዴስ፤
ጎዳይ ሃሎ ኬሳና፤
ባ ኬꬃ ጊሻስ
ሃሎ ኬሳና።
12 ባቢሎኔ ጊምቤታ ቦላ
ማላታ ኤሲቴ፤
ሚንꬂ ናጊቴ፤
ዛቤ ናጊዛይታ ኤሲቴ፤
ዛማዲ ኡቲዲ ኦሊዛይታ ጊግሲቴ።
ጎዳይ ባቢሎኔ ኣሳ ቦላ
ቆፒዳ ቆፋኔ ባ ሃልቾ ፖላና።
13 ሃኔ ዳሮ ሻፋታ
ማታን ዲዛሬ!
ኣቆታን ኬሃ ዱሬቲዳሬ!
ኔ ꬋያና ዎዴይ ጋኪዴስ፤
ኔስ ዉርሴꬂ ጋኪዴስ» ጌስ። ኣጁ 17፡1
14 ጎዳይ ኡባፌ
ዎልቃማ ጾሳይ፥
«ቦሌይ ቢታ ኩሚዛ ማላ
ዳሮ ኣስ ታ ኔ ቦላ ዬዳና፤
ሄይቲ ኔና ጾኒዳ ኡፋይሳፌ
ዴንዲዳይሳን ኔ ቦላ
ጬቄታና» ጊዲ
ባ ሱንꬃን ጫቂዴስ።
ጋላታ ዬꬃ
15 «ጾሲ ባ ዎልቃን
ሳኣ ሜꬊዴስ፤
ባ ኣꬎ ኤራቴꬃን
ኣላሜ ጊግሲዴስ፤
ሳሎታካ ባ ኣኬካን ሚጪዴስ።
16 ኢዚ ባ ጬንጉርሳ ሲሲዛ ዎዴ
ሳሎን ዲዛ
ሃꬃቲ ጉሜቴስ፤
ሻራታ ኢዚ ሳኣ ጋጻፔ ኤሄስ፤
ኢራራ ዎልቃንꬅ ኪቴስ፤
ባ ሚንጃሶሆፔካ
ጫርኮ ኪቴስ።
17 «ኣስ ኡባይ ዳማኔ
ኤራቴꬂ ባይንዳይሳ ጊዲዴስ፤
ዎርቃ ሴሪሲዛይቲ ኡባይ
ባ ኦꬂዳ
ኤቃ ሚስሌታን ዬላቲዳ፤
ኢስቲ ጊግሲዳ ሚስሌቲ ዎርዶኔ
ሼምፖይ ባይንዳይታ።
18 ኢስቲ ሃዳኔ ካꬌቲዳይታ፤
ኢስታ ቦላ ፒርዳይ ዪዛ ዎዴ
ኢስቲ ꬋያና።
19 ያቆቤ ቃዳይ ጊዲኮ
ሄይታንታ ማላ ጊዴና፤
ኢዚ ኡባ ሜꬊዳይሳ፤
ኢስራኤሌ ኣሳይ
ኢዚ ባስ ዶሪዳ ዴሬ፤
ኢዛ ሱንꬂ ጎዳ
ኡባፌ ዎልቃማ ጾሳ» ጌስ።
ጾሳ ጻምኣ
20 ጎዳይ፥ «ባቢሎኔ
ኔኒ ታ ጻምኣኔ ኦላ ማሳራ፤
ኔናን ጎኤታዳ
ታኒ ዴሬ ኡባ
ሜንꬄሬꬃዲስ፤
ቃሴ ካዎቴꬃታካ
ꬋይሳዲስ።
21 ኔናን ፓራታኔ
ፓራ ቶጊዛይታ ꬋይሳዲስ፤
ፓራ-ጋሬታኔ
ኢስታ ላጊዛይታ
ሜንꬄሬꬃዲስ።
22 ኔናን ማጫሳታኔ
ኣቱማሳታ ሜንꬄሬꬃዲስ፤
ጪማታኔ ናቴꬃታ
ሜንꬄሬꬃዲስ፤
ፓንꬃታኔ ጌላኦታ
ሜንꬄሬꬃዲስ።
23 ኔናን ሄንꬃንቻታኔ
ዉዴታ ሜንꬄሬꬃዲስ፤
ጎሻንቻታኔ ቦራታ
ሜንꬄሬꬃዲስ፤
ዴሬ ሃሪዛይታኔ ሹሜታ
ሜንꬄሬꬃዲስ» ጌስ።
ባቢሎኔ ቦላ ዪዛ ቂጻቴ
24 ጎዳይ፥ «ጺዮኔ ቦላ
ኢስቲ ኦꬂዳ ኢታ ኦሶ ጊሻስ
ባቢሎኔሲኔ ኢዚን ዲዛ ኡባስ
ኢንቴ ኢንቴ ኣይፌን ቤኢሺን
ኢስታ ኦሶ ማላ
ታ ኢስታስ ኢማና» ጌስ።
25 ጎዳይ፥ «ሃኔ ꬋይሲዛ ዙማዬ!
ቢታ ኡባ ꬋይሲዛሬ!
ታ ኔ ሁኤ ቦላ ዳይስ፤
ታኒ ታ ኩሼ
ኔ ቦላ ዴንꬃና፤
ታ ኔና ኣፎ ሁኤፔ
ዱጌ ቡሉላና፤
ታ ኔና ጹጌቲዳ
ዙማ ሂስታና።
26 ኔፔ ዮቻ ሹቺ ቤቴና፤
ጉላስ ጊዲዛ
ሹቺ ኤኬቴና፤
ኔኒ ሜርናስ ቡላ ጊዳና» ጌስ።
27 «ቢታ ኡባ ቦላ
ባንዲራ ዴንꬂቴ፤
ካዎቴꬃታ ጊዶን
ዛዬ ፑኒቴ፤
ካዎቴꬃታ ኢዚ ቦላ
ኦላስ ጊግሲቴ፤
ኣራራቴ፥ ሚናኔኔ
ኣሽኬናዜ ካዎታ
ኦላስ ኢዚ ቦላ ጼይጊ ሺሺቴ፤
ኦላ ጋዳዋ ኢዚ ቦላ ሹሚቴ፤
ቦሌ ዉዴ ማላ
ፓራታ ኢዚ ቦላ ዬዲቴ።
28 ሜዶኔ ካዎታ፥
ኢዞ ኣይሲዛይታኔ
ኢዚ ሹሜታ ኡባ፥
ኢስቲ ሃሪዛሶን ዲዛ
ካዎቴꬃታ ኡባ
ኢዚ ቦላ ኦላስ ጊግሲቴ።
29 ባቢሎኔ ኦኒካ ዶንታ
ባዞ ቢታ ሂስታናስ
ጎዳይ ቆፒዳ ቆፋይ
ፖሌታና ዎዴይ ጋኪዳ ጊሻስ
ቢታይ ኮኮሬስ፤
ሜቶንካ ፖፖርቁ ጌስ።
30 ባቢሎኔ ኦላንቻቲ ኦላ ኣጊዳ፤
ባንታ ሚጻን ኡቲዳ፤
ኢስታስ ዎልቃይ ዉሪዴስ፤
ኢስቲ ማጫሳ ማላ ጊዲዳ፤
ኢስታ ኬꬃቲካ ጹጌቲዳ፤
ኢዚ ፔንጌ ኮላታቲ ሜቄሬቲዳ።
31 ካታማያ ሙሌራ ኦይኬቲዳይሳ
ባቢሎኔ ካዎስ ዮታናስ
ኢሲ ዮምባይ ሃራ ዮምባስ፥
ኢሲ ቃስታኔይ ሃራ ቃስታኔስ
ሄራካ ቶሆ ቦላ ካሌስ።
32 ሻፋ ፒኒዛ ፑርዴቲ
ኦይኬቲዳይሳ፥
ሻፋ ማታን ዲዛ ሚጻቲ
ጹጌቲዳይሳ፥
ኢስታ ዎታዳራቲ ባቦን
ቡልኣኬቲዳይሳ፥
ዳጋሚዳይሳ ዮታናስ
ዎጼሬቴቴስ» ጌስ።
33 ኡባፌ ዎልቃማ ጎዳ
ኢስራኤሌ ጾሳይ፥
«ባቢሎኔ ማጫ ናይቲ
ካꬅ ቡካናስ ጊጊዛ ባሌ ማላ፤
ካꬃ ሺሾ ዎዴይ ኢዚ ቦላ
ኤሶን ጋካና» ጌስ።
34 ባቢሎኔ ካዎ
ናቡካዳናጾሬይ
ዬሩሳላሜ ኣቆታ ቦንቂዴስ፤
ጋጪ ሊቂሲዴስ፤
ኣይኮይ ባይንዳ
ካይሳ ኦቶ ኬሲዴስ፤
ዳዌይ ሚቲዛ ማላ
ዴራ ሚቲዴስ፤
ማልኦ ሚዛ ማላ ሚዲ
ጉዬፔ ኑና ኬሲ ጩቲዴስ።
35 ሄሳ ጊሻስ ጺዮኔ ኣሳይ፥
«ኑ ቦላ ጋኪዳ ጌኔይ
ባቢሎኔ ቦላ ጋኮ» ጌስ፤
ዬሩሳላሜይ፥ «ኑ ሱꬂ
ባቢሎኔን ዲዛ
ኣሳታ ቦላ ጊዶ» ጋዉስ።
36 ሄሳ ጊሻስ ጎዳይ፥
«ኔ ጊሻስ ታ ሞቴታና፤
ኔ ሃሎካ ኬሳና፤
ኢዚ ኣባኔ ፑልቶ ሃꬃታ
ታ ሜሊሳና።
37 ባቢሎኔይ ላሌꬂ
ዶሬቲዛሶ ጊዳና፤
ዎራካናቲ ካኢዛሶ ጊዳና፤
ዳጋማሲኔ ቂꬌስ
ማላታ ጊዳና፤
ኦኒካ ኢዚን ዴና።
38 ኢዚን ዲዛ ኣሳይ
ዎዳላ ጋሞ
ማላ ጻጌስ፤
ጋሞ ማራ ማላ ዳሬስ፤
ኢስቲ ሆኤቲ ዴንዴቲሺን
ታ ኢስታስ ጊቢራ ጊጊሳና፤
ኢስቲ ማꬆታና ማላ ኦꬃና።
39 ሚጪሼ ሜርናስ ቤጎንታ
ꬊስኮ ꬊስካና።
40 ላቃ ማላ፥ ꬋርሾ ማላኔ
ኮርቤ ማላ
ታ ኢስታ ሹካስ ኤፋና።
41 «ሼሻካ ዋና ዲኤታዴ!*ሼሻካይ ባቢሎኔ ካታማ ጉሳ።
ሳኣ ኡባይ ኢዚን ጬቄቲዛራ
ዋና ኦይኬታዴ!
ባቢሎኔይ ካዎቴꬃታ
ኡባ ሲንꬃን
ኣይ ማላ ዳጋንꬂዛዝ ጊዳዴ!
42 ኣባይ ባቢሎኔ ቦላ ኬዛና፤
ዳምባላይካ ጉሚሼ
ኢዞ ሚታና
43 ኢዚ ካታማቲ ኣሲ ባይንዳሶ፥
ኣሲ ሞኪ ጼሎንታሶ፥
ሜላኔ ባዞ ቢታ፥
ኣይኮይ ባይንዳ
ቡላ ቢታ ጊዳና።
44 ቤሌ ታኒ ባቢሎኔን ቃጻያና፤
ኢዚ ሚቲዳይሳካ ታ ጮሻና፤
ሃይሳፌ ካዎቴꬃይ
ኢዛኮ ጎጌና፤
ባቢሎኔ ጊምቤይ ኩንዳና።
45 ታ ዴሬቶ! ኢዚፔ ኬዚቴ፤
ኢንቴ ሼምፖ ኣሺቴ፤
ያሺዛ ጎዳ ሃንቆፌ
ኬሲ ኤኪ ኣቲቴ።
46 ዎሬይ ቢታይን ሴቴቲሺን
ሂዶታ ቃንጾፍቴኔ ባቦፍቴ፤
ካዎይ ካዎ ቦላ ዴንዲዛይሳ፥
ማካላቴꬂ ቢታይ ቦላ
ዲዛይሳ ኢሲ ዎሬይ ሃ ላይꬃን፥
ሃራይ ላይꬅ ካሊዲ ያና።
47 ቱማፔ ታኒ ባቢሎኔ
ኤቃ ጾሳታ
ቃጻያና ዎዴይ ያና፤
ቢታያ ኩሜꬅ ካዉያና፤
ሲፌቲዳይቲ ኡባይ
ኢዚን ፖርጩ ጊ ኩንዳና።
48 ꬋይሲዛይቲ ፑዴሃ ባጋፌ ዪዲ
ኢዞ ኦሊዛ ጊሻስ
ሳሎይኔ ሳኣይ
ቃሴ ኢስታ ጊዶን ዲዛ ኡባይ
ባቢሎኔ ቦላ
ኢሊሊ ጋና» ጌስ። ኣጁ 18፡20
49 ጎዳይ፥ «ቢታ ኡባን ሲፌቲዳይቲ፥
ባቢሎኔ ጋሶን ኩንዲዳ ማላ
ኢስራኤሌን ሲፌቲዳይታ ጋሶን
ባቢሎኔይ ኩንዳና
ቤሳዉስ» ጌስ። ኣጁ 18፡24
ባቢሎኔን ዲዛ ኢስራኤሌ ኣሳስ ኪቴቲዳ ኪታ
50 ኢንቴኖ ማሻፌ ኬሲ ኤኪ ኣቲዳይቶ!
ቢቴ፤ ሃይሳን ታኮፍቴ፤
ሃኮ ቢታን ዲዛይቶ
ጎዳ ኣኬኪቴ፤
ዬሩሳላሜካ ቆፒቴ።
51 «ኣላጋቲ ጌሻሶሆ
ጎዳ ኬꬅ ጌሊዳ
ጊሻስ፥ ‹ኑኒ ጫዬቲዶስ፤
ዬላይ ኑ ሲንꬅ ካሚዴስ፤
ካዉሻቴꬂካ
ጉሉንቲዶስ› ጊቴ» ጌስ።
52 ጊዶ ኣቲን ጎዳይ፥
«ባቢሎኔ ኤቃ ጾሳታ
ቃጻያና ዎዴይ ያና፤
ኢዚ ቢታ ኡባን
ማዱንጺዳይቲ ጎታራና።
53 ባቢሎኔይ ፑዴ ሳሎ ኬዚኮካ፥
ꬎቁ ጊዳ ሚኖ ሚጻ
ኦꬂኮካ ታኒ ꬋይሲዛይታ
ኢዚ ቦላ ዬዳና» ጌስ።
ባቢሎኔ ꬋዮ
54 «ባቢሎኔፔ ዋሶይ ሲዬታና፤
ኢስታ ቢታፌ ጊታ ባሻ
ጬንጉርሲ ሲዬታና።
55 ጎዳይ ባቢሎኔ ꬋይሳና፤
ኬሃ ዋሲዛ ኢዚ ዋሶዛ
ጮኡ ሂስታና፤
ኢስታ ሞርኬቲ
ጊታ ሃꬃ ማላ ጉማና፤
ኢስታ ዋሶይካ ኮሹማና።
56 ባቢሎኔ ꬋይሲዛ ሚሺ ያና፤
ኢዚ ኦላንቻቲ ዲኤታና፤
ኢስታ ዎንዳፌይካ ሜቃና፤
ጎዳይ ጌኔ ኦሶ ጊሻስ
ሃሎ ኬሲዛዴኔ
ኢዚ ሃኒዛ ሚሽ ኡባስ
ቤሲዛ ዋጋ ቃንጺዛ ጾሳ።
57 ኢዚ ሹሜታኔ ኣꬎ ኤራንቻታ
ኢዞ ሃሪዛይታኔ ጊታ ኣሳታ፥
ኢዚ ኦላንቻታ ታኒ ማꬆሳና፤
ኢስቲ ሜርናስ ኢቻና፤
ሲሚዲካ ቤጌቴና» ጌስ
ኢዛ ሱንꬂ ጎዳ
ኡባፌ ዎልቃማ
ጾሳ ጌቴቲዛ ካዎይ።
58 ጎዳይ ኡባፌ ዎልቃማ ጾሳይ፥
«ጉባይ ዳልጋ ጊዲዳ
ባቢሎኔ ጊምቤቲ ላሌታና፤
ꬎቁ ጊዳ ኢዚ ፔንጌቲካ
ታማን ጹጌታና፤
ኣሳይ ሃዳ ዳቡሬስ፤
ካዎቴꬃታ ዳቡራይ
ታማስ ጻላ ጊዳና» ጌስ።
59 ዩሁዳ ካዎ ሴዴቂያሲ ካዎቲዳ ኦይዳንꬆ ላይꬃን ካዎዛ ጊቤ ዛቤዚ ማኢሴያ ናዛ ኔሪያ ና ሳራያይ ካዎዛራ ባቢሎኔ ቢዳ ዎዴ ናቤ ኤርማሲ ኢዛስ ዮቲዳ ኪታይ ሃይሳ። 60 ኤርማሲ ባቢሎኔ ጊሻስ ካሴ ጻፊ ዎꬂዳይሳ ኡባ ባቢሎኔ ቦላ ያና ባሽ ኡባ ጻꬃ ማጻፋን ጻፊዴስ። 61 ሳራያስካ፥ «ኔኒ ባቢሎኔ ጋኪዳ ማላ ሃይሳ ቃላ ኡባካ ኔ ቃላ ꬎቁ ሂስታዳ ናባባናይሳ ባሎፓ። 62 ኔኒ፥ ‹ኣቤት ጎዳዉ! ኔኒ ሃኖ ሃ ሶሆዪን ኣስ ጊዲን ሜሄይ ሙሌራ ꬋያና ጋካናስ ሜርናስ ቡላ ኬሳና ጋዳሳ› ጋ። 63 ኔኒ ሃይሳ ጻꬃ ማጻፋዛ ናባባ ዉርሲዳፔ ጉዬ ኢዛ ጊዶን ሹች ቃቻዳ ኤፊራጺሴ ሻፋን ኤፋ ዬጋ። 64 ሂስታዳ፥ ‹ባቢሎኔይካ ታ ኢዚ ቦላ ኤሂዛ ባሻፌ ዴንዲዳይሳን ሃይሳꬆ ሚቴታና፤ ናምኣንꬆ ሲማ ዴንዱኩ፤ ኢዚ ኣሳይካ ኩንዳና› ጋ» ጌስ። ኣጁ 18፡21 ኤርማሲ ሃሳይዳ ቃላይ ሃይሳን ፖሌቲዴስ።