50
ባቢሎኔ ጊሻስ ዮቴቲዳ ኪታ
1 ባቢሎኔ ቢታኔ ባቢሎኔ ኣሳ ጊሻስ ጾሲ ናቤ ኤርማሳ ባጋራ ዮቲዳ ቃላይ ሃይሳፌ ካሊዛይሳ፤ ኢሳ 13፡1—14፡23፤ 47፡1-15
2 «ካዎቴꬃታ ኡባ
ጊዶን ኣዋጂቴ!
ባንዲራ ꬎቁ ሂስቲ
ኦይኪዲ ኣዋጂቴ!
ኣይኮካ ኣሾንታ ዲሼ፥
‹ሄኮ ባቢሎኔይ ኦይኬታና፤
ቤሌይ ካዉያና፤
ማርዱኬይ ሺሮን ኩማና፤
ኢዚ ኤቃ ጾሳቲ ካዉያና፤
ኢዚ ኤቃ ሚስሌቲ
ሜቄሬታና› ጊቴ።
3 ፑዴሃ ባጋፌ
ኢሲ ካዎቴꬃይ ዪዲ
ባቢሎኔ ቢታ ኦላና፤
ሄሳፌ ዴንዲዳይሳን
ኣሲኔ ሜሄይ ባቃታና፤
ቢታዮካ ቡላ ኬሳና፤
ኦኒካ ኢዚን ዴና።»
ኢስራኤሌኔ ዩሁዳ ኣሳ ሲሞ
4 ጎዳይ፥ «ሄ ዎዴኒኔ ሄ ጋላሳታን
ኢስራኤሌ ኣሳይኔ
ዩሁዳ ኣሳይ ኢሲፌ ያና፤
ጎዳ ባንታ ጾሳ
ኮዪሼኔ ዬኪሼ ያና።
5 ኢስቲ ጺዮኔ ኤፊዛ ኦጌ ኦይቻና፤
ባንታ ሲንꬅ ሄ ዛራና፤
ዪዲ ሙሌራ ዶጌቶንታ ሜርና
ጫቆ ቃላን
ጎዳራ ኦይኬታና።
6 «ታ ዴሬይ ꬋይዳ
ዶርሳ ማላ ጊዲዴስ፤
ኢስታ ሄንꬃንቻቲ
ኢስታ ባሌꬂዲ
ዎራ ካሌꬂዳ፤
ዙማታ ቦላኔ
ዙምቡላታ ቦላ ቶይላቲዳ፤
ባ ኣቂዛሶካ ዶጊዳ።
7 ዴሚዳ ኡባይ ኢስታ ቆሄስ፤
ኢስታ ሞርኬቲ፥
‹ኑ ቦላ ሞሮይ ባ፤
ሃይሲ ሜቶይ ኢስታ ጋኪዳይ
ባንታ ኣዋታስ
ሂዶታ ጊዲዳ ጎዳ፥
ቱማፔ ኢስታስ ዱሳሶ ጊዲዳ
ጎዳ ቆሂዳ ጊሻሳ› ጊዳ።
8 «ባቢሎኔፔ ባቃቲቴ!
ኢስታ ቢታካ ዬዲቴ!
ዉዴ ካሌꬂዛ
ዴይሻ ኦርጌ ማላ ጊዲቴ። ኣጁ 18፡4
9 ታኒ ፑዴሃ ባጋፌ
ዎልቃማ ካዎቴꬃታ
ባቢሎኔ ቦላ
ዴንꬄꬃና፤
ኢስቲካ ኢዚ ቦላ ሳልፋና፤
ሂስቲዲ ኢዞ ሄፔ ኦይካና፤
ኢስታ ዎንዳፌይ ዬዶንታ
ሎሂዳ ኦላንቻታ ማላ።
10 ባቢሎኔ ቢታይ ቦንቄታና፤
ኢዞ ቦንቂዛይቲ ባስ ጊዳናሼ
ጋካናስ ቦንቃና» ጌስ።
ባቢሎኔ ኩንዴꬅ
11 «ኢንቴኖ ታ ጺንጾ
ቦንቂ ኤኪዳይቶ!
ኢንቴ ኡፋዬቲዳ ጊሻሲኔ
ኡፋይሳን ማጉሊዳ ጊሻስ፥
ዴምባን ጺኬቲዛ ኡሳ ማላ
ኢንቴ ሊፍጼቲዳ ጊሻስ፥
ዎዳላ ፓራ ማላ
ኢንቴ ጫጊዳ ጊሻስ፥
12 ኢንቴ ኣያ ኬሃ ዬላታና፤
ኢንቴና ዬሊዳራካ ካዉያና፤
ካዎቴꬃታ ኡባ ጊዶን
ኢዛ ጉꬅ ጊዳና፤
ኢዛ ኣሲ ባይንዳሶ፥
ሃꬂ ባይንዳ ቢታኔ
ባዞ ጊዳና።
13 ጎዳ ሃንቆ ጋሶን
ኢዛ ባዞ ጊዳና ኣቲን
ኣሲ ኢዚን ዴና፤
ኢዚ ቦላ ጋኪዳ ባሻ ጋሶን
ባቢሎኔራ ኣꬊ ቢዛ
ኡባይ ማላሌቲሼ ኢዛ ቂꬋና።
14 «ኢንቴኖ ዪሻን ዱኪዛይቶ!
ባቢሎኔ ኦላናስ
ኢዚ ዩሾን ሳልፍቴ፤
ናጋራ ኦꬂዳ ጊሻስ
ኢንቴ ዪሽ ኢሲኖካ ኣሾንታ
ኢዚ ቦላ ዬዲቴ።
15 ኡባ ባጋራካ
ኢዚ ቦላ ማጉሊቴ!
ኢዛ ኢንቴስ ኩሼ ኢማና፤
ኢዚ ሚጻቲኔ
ጊምቤቲ ላሌታና፤
ሃይሲ ጎዳይ ሃሎ ኬሲዛ
ኦጌ ጊዲዳ ጊሻስ
ኢንቴ ኢዚ ቦላ ሃሎ ኬሲቴ፤
ኢዛ ሃራታ ቦላ ኦꬂዳ ማላ
ኢንቴ ኢዚ ቦላ ኦꬂቴ።
16 ባቢሎኔፔ ዜሬꬂ ዜሪዛይሳ፥
ካꬃ ሺሾ ዎዴ ጫካናስ
ባጫ ኦይኪዳይሳ ꬋይሲቴ፤
ኡንኤꬂዛይታ
ማሻፌ ዴንዲዳይሳን
ኢሶይ ኢሶይ
ባ ኣሳኮ ሲሞ፤
ባ ዴሬካ ባቃቶ።
17 «ኢስራኤሌይ ጋሞይ ጎዲዲ ላሊዳ ዉዴ ማላ ጊዲዴስ፤
ኮይሮ ኣሶሬ ካዎይ
ፑዜሬꬂ ሚዴስ፤
ጉዬፔ ባቢሎኔ ካዎ ናቡካዳናጾሬይ
ሜቄꬃ ꬎጊዴስ»
ጌስ ጎዳይ።
18 ሄሳ ጊሻስ ኡባፌ ዎልቃማ
ጎዳ ኢስራኤሌ ጾሳይ፥
«ኣሶሬ ካዎ ታኒ ቃጻይዳ ማላ
ባቢሎኔ ካዎኔ
ኢዛ ቢታ ቃጻያና።
19 ጊዶ ኣቲን ታኒ ኢስራኤሌ
ካሴ ኢዚ ሄሜቲዛሶ ኢዛ ዛራና፤
ቃርሜሎሴኒኔ ባሳኔ ዴሬን
ኢዚ ሄሜታና፤
ቃሴ ኢዚ ኤፍሬሜ
ዙምቡላታ ቦላኔ
ጋላኣዴ ዙምቡላታ ቦላ
ካላናሼ ጋካናስ
ማና» ጌስ።
20 ሄ ዎዴታኒኔ ሄ ጋላሳታን ጎዳይ፥
«ኢስራኤሌ ሞሮይ ኮዬታና፤
ጊዶ ኣቲን ኢሲናካ ቤቱኩ፤
ዩሁዳ ናጋራይካ ኮዬታና፤
ጊዶ ኣቲን ሙሌካ ቤቴና፤
ሃይቆፔ ታ ኣሺዳ ሾጌታ
ታ ማራና» ጌስ።
ባቢሎኔ ቦላ ያና ፒርዳ
21 «ሚራታይሜኒኔ ፓቆዴን ዲዛ ኣሳ ጎዲቴ፤
ዎꬊቴኔ ሙሌራ ꬋይሲቴ፤
ታኒ ኢንቴና ኣዛዚዳይሳ
ኡባ ኦꬂቴ።
22 ሄ ቢታን ኦላ ሺሮይኔ
ጊታ ባሻ ዋሶይ ሴቴቲዴስ።
23 ኣላሜ ኡባ ሊቂሲዛ ማዶሻይ
ዋኒ ሜቂዴ?
ዋኒ ሊቂዴ?
ካዎቴꬃታ ጊዶን ዋና
ባቢሎኔይ ቡላ ጊዳዴ?
24 ሃኔ ባቢሎኔ!
ታ ኔስ ዎጺማዴ ዎꬃዲስ፤
ኔካ ኤሮንታ ዳሼ ኦይኬታዳሳ፤
ኔኒ ጎዳራ ኤቄቲዳ ጊሻስ
ቤታዳ ኦይኬታዳሳ።
25 ጎዳይ ባ ኦላ ማሳራ ዎꬂዛ
ሚንጃ ኬꬃ ዶይዴስ፤
ባ ሃንቆ ኦላ ማሳራ ኬሲዴስ፤
ጎዳይ ኡባፌ
ዎልቃማ ጾሳይ
ባቢሎኔ ቢታን ኦꬂዛ
ኦሶይ ዴስ።
26 ያራ ሃራ ኢዚ ቦላ ዎራጂቴ፤
ኢዚ ጎታራታ ላሊቴ፤
ዲኤቲዳ ሚሻ
ካꬃ ማላ ዶሪቴ፤
ሙሌራ ኢዞ ꬋይሲቴ፤
ኢዚን ኣይኮይካ ኣቶፎ።
27 ኢዚ ዎፋኖታ ኡባ ሹኪቴ፤
ዱጌ ሹኬቲዛሶ ዎꬌቶ!
ኢስቲ ቃጻዬታና ዎዴይኔ
ጋላሳይ ጋኪዳ ጊሻስ
ኣዬ ኣና!
28 «ጎዳ ኑ ጾሳይ
ሃሎ ኬሲዳይሳ፥
ጾሳ ኬꬃ ጊሻስ
ሃሎ ኬሲዳይሳ
ባቢሎኔፔ ቤቲዳይቲኔ
ጎዴቲዳይቲ
ጺዮኔን ሃሳይዛይሳ ሲዪቴ።
29 «ዎንዳፌን ኦሊዛይታ
ባቢሎኔ ቦላ ጼይጊቴ፤
ኢሳዴይካ ኬሲ ኤኪ ቦንታ ማላ
ኢስታ ጊዶꬂዲ ዱንካኒቴ፤
ጎዳ ኢስራኤሌ ጌሻ
ካዉሺዳ ጊሻስ
ኢዚ ኦሶ ማላ ኢዚስ ዛሪቴ፤
ኢዛ ሃራታ ቦላ ኦꬂዳይሳꬆ
ኢዚ ቦላ ኦꬂቴ።ኣጁ 18፡6
30 ሄሳ ጊሻስ
ኢዚ ናቴꬃ ኣቱማ ናይቲ
ኣꬎሶን ኣꬎሶን
ሃይቃና፤
ኢዚ ኦላንቻቲ ኡባይ
ሄ ጋላስ ኩንዳና» ጌስ ጎዳይ።
31 ጎዳይ ኡባፌ ዎልቃማ ጾሳይ፥
«ኔኖ ኦቶራንቻዞ!
ታኒ ኔ ቦላ ዴንዳዲስ፤
ኔኒ ቃጻዬታና ዎዴይኔ
ጋላሳይ ጋኪዴስ።
32 ኦቶራንቻይ ꬉጴቲዲ ኩንዳና፤
ዴንꬃናይካ ዴና፤
ኢዛ ዩሾን ዲዛይታ
ኡባ ሚዛ ታማ
ኢዛ ካታማታ ቦላ
ዬዳና» ጌስ።
33 ጎዳይ ኡባፌ ዎልቃማ ጾሳይ፥
«ኢስራኤሌ ኣሳይኔ ዩሁዳ ኣሳይ
ኢሲ ቦላ ቆሄቲዴስ፤
ዲኢዳይቲ ኡባይ
ኢስታ ሚንꬂ ኦይኪዳ፤
ኢስታ ዬዳናስ ኢጺዳ።
34 ጊዶ ኣቲን ኢስታ ዎዚዛይ ሚኖ፤
ኢዛ ሱንꬃይካ
ጎዳ ኡባፌ
ዎልቃማ ጾሳ፤
ኢስቲ ቢታስ ሼምፖ ኢማናስ
ኬሂ ባጼቴስ፤
ጊዶ ኣቲን ባቢሎኔን ዲዛይታስ
ሼምፖ ꬋይሴስ» ጌስ።
35 ጎዳይ፥ «ማሻይ
ባቢሎኔ ኣሳ ቦላ ዪዴስ፤
ኢዚን ዲዛ ኣሳታ ቦላ፥
ማታይ ዲዛ ኣሳታ ቦላኔ
ኣꬎ ኤራንቻታ ቦላ
ሲፋናስ ሾዴቲዴስ።
36 ማሻይ ዎርዶ ጊዲዳ
ኢዚ ናቤታ ቦላ ዪዴስ፤
ኢስቲ ኤያታ ጊዳና፤
ማሻይ ኢስታ
ኦላንቻታ ቦላ ሾዴታና፤
ኢስቲካ ሺሮታና።
37 ኢስታ ፓራታ ቦላኔ
ኢስታ ፓራ-ጋሬታ ቦላ
ቃሴ ኢዚ ጊዶን ዲዛ
ሃራ ዴሬ ዎታዳራታ ቦላ
ማሻይ ያና፤
ኢስቲካ ማጫሳታ ማላ ጊዳና፤
ማሻይ ኢዚ ኣቆታ
ኡባ ቦላ ያና፤
ኢስቲካ ቦንቄታና።
38 ቢታያ ባቢሲዛኔ ኣስ ጎሺዛ
ኤቃ ጾሳታን ኩሚዳ ጊሻስ
ኢዚ ሃꬃታ ቦላ
ኣርሼይ ኬዛና፤
ኢስቲካ ሜላና።
39 «ሄሳ ጊሻስ ባዞ ዶኣታሲኔ
ጎዳሬስ ዱሳሶ ጊዳና፤
ጉቶስ ኣቆሶ ጊዳና፤
ሃይሳፌ ጉዬ ኦኒካ
ኢዚን ዴና፤
ዬሌታፔ ዬሌታ ጋካናስ
ኢዚን ኡታናይ ቤቴና። ኣጁ 18፡2
40 ሶዶሜኔ ጋሞራ ካታማ
ኢስታ ዩሾን ዲዛ ዴሬታ
ኣሲ ዶንታ ማላ ኦꬂዴስ፤
ሄሳꬆካ ኦኒካ
ሄን ዴና፤
ኢዚን ኡታናይካ ቤቴና» ጌስ። ሜꬌ 19፡24-25
41 «ቤኢቴ! ፑዴሃ ባጋፌ
ኣሳይ ዬꬃ ቦላ ዴስ፤
ኢሲ ዎልቃማ ካዎቴꬂኔ
ዳሮ ካዎቲ
ሳኣ ጋጻፔ ዴንዲዳ።
42 ኢስቲ ዎንዳፌታኔ
ማሻታ ኦይኪዳ፤
ኢስቲ ማሮንታ ሜንጼ ኢታታ፥
ማሮካ ኦꬄቴና፤
ኢስቲ ፓራታ ቶጊሺን
ኢስታ ጊሪሳይ
ኣባ ዳምባላ ማላ ጉሜስ፤
ሃኔ ባቢሎኔ ማጫ ናዬ!
ኦላስ ጊጌቲዳ ኦላንቻታ ማላ
ኔ ቦላ ያና።
43 ባቢሎኔ ካዎይ
ኢስታ ጊሻስ ሲዪዴስ፤
ኢዛ ኩሼቲካ ዶጪዳ፤
ኢዛ ጬጬይ ኦይኪዴስ፤
ሚጻይ ኦይኪዳ
ማጫሳ ማላ ሳኬቲዴስ።
44 ጋሞይ ዮርዳኖሴ ዎራታፔ
ሜሄ ሄሚዛ ዴምባን
ኬዚ ዎꬊዛ ማላ
ታኒካ ባቢሎኔይ ቆፖንታ
ዲሺን ኬዛ ዎꬋና፤
ኢዚ ቢታፌ ታ ኢዞ ጎዳና፤
ታ ዶሪዳይሳ ኢዚ ቦላ ሹማና፤
ታ ማላይ ኦኔ?
ታናራ ኤቄታና
ዳንዳይዛይ ኦኔ?
ታናራ ኤቄታና ዳንዳይዛ
ሄንꬃንቻይ ኦኔ?
45 ሄሳ ጊሻስ ጎዳይ
ባቢሎኔ ቦላ
ሃልቺዳ ሃልቾ፥
ባቢሎኔ ቢታ ቦላ
ቆፒዳ ቆፋ ሲዪቴ!
ጉꬃ ዉዴይ ጎሼቲ ባና፤
ኢስታ ጋሶን ሄሚዛሶሆዛ
ሙሌራ ꬋይሳና።
46 ባቢሎኔ ኩንዴꬃ ጊሪሲ
ቢታ ቃꬃና፤
ኢዚ ዋሶይ ካዎቴꬃ
ኡባ ጋርሳን ኮሹማና» ጌስ።