1 « ‹ኬሂ ዱማ ጊዲዳ ጊሻስ ቆሆ ጋሶን ሺቂዛ ያርሾ ዎጋይ ሃይሳፌ ካሊዛይሳ፥ 2 ቆሆ ያርሾስ ሺቂዳ ሜሄይ ጹጌቲዛ ያርሾስ ሺቂዛ ሜሄቲ ሹኬቲዛሶን ሄን ሹኬቶ፤ ሱꬃካ ያርሾ ያርሺዛሶዛ ቦላ ዩዪ ኣꬋናስ ዉጼቶ። 3 ሞꬌ ኡባ ሺሾ፤ ሄሲካ ጎይና ሃንዳ፥ ቃንꬃ ኣሾ ጎዚ ኦይኪዳ ሞꬌይ፥ 4 ኪላሆታ፥ ኢስታ ካሚ ኦይኪዳ ሞꬌታኔ ሄሳꬆካ ቲሬ ካሚ ኦይኪዳ ሞꬌታ ኢሲ ቦላ ያርሼቶ። 5 ያርሾ ያርሺዛሶን ዲዛ ሞꬌ ኡባ ቄሴዚ ጾሳስ ታማን ጹጊ ያርሾ፤ ሄሲካ ቆሆ ጊሻስ ሺቂዛ ያርሾ። 6 ቄሴታ ዜሬꬅ ጊዲዳ ኣቱማ ኣሲ ኡባይ ሄ ያርሾዛ ኣሾ ሞ፤ ጊዶ ኣቲን ሄ ያርሾዚ ዱማ ጊዲዳ ጊሻስ ኢዛስ ዱማ ጊጌቲዳሶን ሞ።

7 « ‹ናጋራ ዉርሳናስ ሺቂዛ ያርሾሲኔ ቆሆስ ሺቂዛ ያርሾ ጊዶን ናምኣታስካ ኦꬂዛ ኢሲ ዎጋይ ዴስ፤ ሄሲካ ሄ ሹኬቲዛ ሜሄዛ ኣሾይ ያርሾዛ ሺሺዛ ቄሴዛስ ማና ማላ ኢዛስ ኢሜቴስ። 8 ጹጌቲዛ ያርሾስ ሺቂዛ ሜሄዛ ጋልባይ ሾቄቲዲ ያርሾዛ ያርሺዳ ቄሴዛስ ኢሜቴስ። 9 ታማ ጮጬን ኮምፔቲዳ ካꬃ ያርሾይ ዉሪ ዎይኮ ዶይሲዛ ሚሻን ዶይሴቲዳዚኔ ባሼን ኡኬቲዳ ካꬃ ያርሾ ኡባይ ያርሾ ሺሺዛ ቄሴዛስ ኢሜቶ። 10 ዛይቴን ሙኑቄቲዳዝ ጊዲኮ ዎይኮ ጮ ሙኑቄቶንታ ካꬃ ያርሾ ኡባይ ኣሮኔ ዜሬꬃታፔ ጊዲዳ ቄሴታስ ኡባስ ኢሜቶ፤ ኢስቲካ ኢዛ ባ ጋርሳን ኢሲ ጊና ጊሼቲ ኤኬቶ።

11 « ‹ኣሲ ጎዳስ ሺሺዛ ኢሲፌቴꬃ ያርሾ ዎጋይ ሃይሳፌ ካሊዛይሳ፤ 12 ኢሲ ኣሲ ጎዳስ ጋላታ ያርሾ ሺሻና ኮይኮ ባ ኤሂዛ ጋላታ ያርሾዛራ ኢርሾይ ኢዛን ጌሎንታ ዛይቴን ሙኑቄቲ ኡኬቲዳ ኡኬꬅ፥ ኢርሾይ ኢዛን ጌሎንታ ሌኤን ኡኬቲዲ ዛይቴን ቲዬቲዳ ኡኬꬅ፥ ሊቆ ꬊሌፌ ዛይቴን ሙኑቄቲዳ ኡኬꬅ ያርሾ። 13 ጋላታስ ሺቂዛ ኢሲፌቴꬃ ያርሾዛራ ጋꬂ ኢሞታስ ጊዳና ማላ ኢርሾን ሙኑቄቲ ኡኬቲዳ ኡኬꬅ ሺሾ። 14 ኡኬቲዳ ዱማ ዱማ ቆሞ ኡኬꬃታፔ ኢሲ ኢሲ ኡኬꬅ ጎዳስ ዱማ ያርሾ ሂስቲ ሺሾ፤ ሄ ኢሲፌቴꬃ ያርሾስ ሺቂዛ ሱꬃ ኤኪዲ ያርሾ ሺሺዛሶዛ ዩዪ ኣꬋናስ ዉጺዛ ቄሴዛስ ጊሻ ጊዶ። 15 ጋላታስ ሺቂዛ ኢሲፌቴꬃ ያርሾዛስ ሺቂዛ ኣሾይ ሄ ያርሼቲዛ ጋላስ ሜቴቶ ኣቲን ሃራ ጋላሳስ ኣቶፎ። 16 ኢሲ ኣሲ ሺሺዛ ያርሾይ ኣዲና ጋሶ ዎይኮ ባ ዶሳን ጮ ኢሚዛ ኢሲፌቴꬃ ያርሾ ጊዲኮ ሄ ያርሾዚ ሺቂዳ ጋላስ ሜቴቶ፤ ኢዛፔ ኣቲዳ ኡባይ ዎንቴꬃ ጋላስ ሜቴቶ። 17 ሄሳፌካ ቲርፒዲ ሄꬓንꬆ ጋላስ ጋካናስ ኣቲዳ ኣሾይ ታማን ጹጌቶ፤ 18 ሄꬓንꬆ ጋላስ ጋካናስ ኣቲዳ ኣይ ኣሾይካ ሜቴቲዛ ጊዲኮ ሄ ያርሾዛ ሺሺዳዴ ያርሾዚ ኤኬቴና፤ ያርሾዚ ያርሼቲዳ ማላ ቆዴቴና፤ ሄ ያርሾይካ ቱና ጊዲ ቆዴታና፤ ሄ ኣሾዛ ሚዳዴይ ባ ናጋራን ኦይሼታና።

19 « ‹ቱና ጊዲዳዛራ ቦሼቲዳ ኣሾይ ታማን ጹጌቶ ኣቲን ሜቴቶፎ፤ ሃንኮ ቱኖንታ ኣቲዳ ኣሾዛ ዎጋ ማላ ባና ጌሻቴꬃን ናጊዳዴይ ሞ። 20 ጊዶ ኣቲን ጌሽ ጊዶንታ ኣይ ኣሲካ ጾሳስ ሺቂዛ ኢሲፌቴꬃ ያርሾ ኣሾዛ ሚኮ ጎዳ ዴራ ጊዶፌ ሻኬቲ ኪቾ። 21 ኣይ ኣሲካ ጌሽ ጊዶንታ ሚሽ ዎይኮ ሜዶሳታኔ ጎጊዛ ቱና ሚሽ ቦቺዲ ኢሲፌቴꬃስ ሺቂዛ ያርሾ ኣሾ ሚኮ ሄሳዴይ ጎዳ ዴራ ጊዶፌ ሻኬቲ ꬋዮ።› »*ሜዶሳታ ጊዛይሳስ ቢርሼꬃይ ሜሄታ፥ ዶኣታኔ ኣሳታ ጉሳ።

22 ጎዳይ ሙሴስ፥ 23 «ኔኒ ኢስራኤሌ ኣሳስ፥ ‹ቦራ ዎይኮ ሚዛ ሞꬌ፥ ዶርሳ ሞꬌ ዎይኮ ዴይሻ ሞꬌ ሞፒቴ። 24 ባዉታ ሃይቂዳ ሜሄ ሞꬌይ ዎይኮ ዶኣይ ዎꬊዳ ሜሄ ሞꬌይ ሃራ ኦሶስ ኤኬቶ ኣቲን ኣይ ኣሲካ ኢዛ ሞፖ። 25 ጹጌቲ ጎዳስ ያርሾ ሺቂዛ ሜሄ ሞꬌ ሚዛዴይ ኦኒካ ጾሳ ዴራ ጊዶፌ ሻኬቲ ꬋዮ። 26 ኢንቴ ኣዋን ዲኮካ ኢንቴ ዲዛሶን ካፎ ሱꬅ ዎይኮ ሜሄ ሱꬅ ኡዮፒቴ፤ 27 ሱꬅ ኡዪዛዴይ ኦኒካ ጾሳ ዴሬ ጊዶፌ ሻኬቲ ꬋዮ› ጊ ዮቲዴስ» ጊዴስ። ሜꬌ 9፡4፤ ሌዌ 17፡10-14፤ 19፡26፤ ዛሬ 12፡16፤ 23፡16፥23

28 ጎዳይ ሙሴስ፥ 29 «ኔኒ ኢስራኤሌ ኣሳስ፥ ‹ኣይ ኣሲካ ኢሲፌቴꬃ ያርሾ ሺሺዛ ጊዲኮ ኢዛፔ ባጋ ሻኪዲ ጎዳስ ዱማ ያርሾ ሂስቲ ኤሆ። 30 ሄ ኢዚ ኤሆይሳካ ጎዳስ ጹጌቲዛ ያርሾ ሂስቲ ሺሾ፤ ሞꬌዛካ ኣንጋሶዛራ ጎዳ ሲንꬃን ያኔ ሃ ቃሴꬂ ሺሺዛ ያርሾ ሂስቲ ሺሾ። 31 ቄሴዚ ቃሴ ሞꬌዛ ያርሾ ያርሺዛሶዛ ቦላ ጹጎ፤ ኣንጋሶዚ ጊዲኮ ቄሴታስ ኢሜቶ። 32 ኢንቴ ኢሲፌቴꬃ ያርሾዛፔ ኡሻቻ ሚሳ ቄሴዛስ ጊሻ ሂስቲ ኢሚቴ፤ 33 ኢሲፌቴꬃ ያርሾዛ ሱꬃኔ ሞꬌዛ ሺሺዛ ቄሴዚ ኡሻቻ ሚሳ ባ ጊሻ ሂስቲ ኤኮ። 34 ኢስራኤሌ ኣሳ ኢሲፌቴꬃ ያርሾፌ ያኔ ሃ ቃሴꬂዳ ኣንጋሶዛኔ ያርሾስ ሺሺዳ ሚሳ ኤካዳ ቄሴ ኣሮኔሲኔ ኢዛ ኣቱማ ናይታስ ኢማዲስ፤ ሄሲካ ኡባ ዎዴ ኢስራኤሌ ኣሳፔ ኢስታስ ጊሻ ጊዳና ማላ ኢማዲስ› ጋዳ ዮታ» ጊዴስ።

35 ሃይሲካ ጎዳይ ኣሮኔኔ ኢዛ ናይታ ቄሴ ሂስቲ ሹሚዳ ጋላስ ጎዳስ ሺቂዲ ጹጌቲዛ ያርሾፌ ቄሴታ ጊሻ ጊዳና ማላ ሻኪዳዛ። 36 ሄ ጋላሲካ ኢስቲ ቲዬቲዳ፤ ጎዳይ ሄሳ ሄ ያርሼቲዛይሳፌ ቄሴታስ ኢማና ማላ ኢስራኤሌ ኣሳ ኣዛዚዴስ፤ ሄሲካ ጉዬፔ ያና ዎዴ ኡባን ኢስራኤሌ ናይታስ ኢስታ ጊሻ ሂስቲ ኢማና ማላ ኦꬂዴስ።

37 ሄሳ ጊሻስ ጹጌቲዛ ያርሾ ጊሻሲኔ ካꬃ ያርሾ ጊሻስ፥ ናጋራፔ ማሮቴꬃስ ሺቂዛ ያርሾ ጊሻሲኔ ቆሆ ጊሻስ፥ ኤዳ ያርሾ ጊሻስ፥ ቄሴቴꬃ ጊሻስ ሺቂዛ ያርሾኔ ኢሲፌቴꬃ ያርሾ ፖላናስ ዎꬂዳ ዎጋቲ ሃይታንታ። 38 ሄይቲካ ባዞን ሲና ዙማ ቦላ ኢስራኤሌ ናይቲ ያርሾ ሺሻና ማላ ኣዛዚዳ ዎዴ ሄ ጋላስ ጎዳይ ሙሴስ ሃይታ ኣዛዞታ ኢሚዴስ።