1 ጎዳይ ሙሴስ፥ 2 «ኣሮኔኔ ኢዛ ኣቱማ ናይታ፥ ቄሴቴꬃ ማይኦዛካ፥ ቲዬቲዛ ዛይቴዛ፥ ናጋራ ጌሾስ ሺቂዛ ኮርማ ቦራ፥ ናምኡ ꬋርሾኔ ኢርሾይ ጌሎንታ ኡኬቲዳ ኡኬꬂ ኢዛን ዲዛ ሌማቴዛ ኢስታራ ኤካ ያ። 3 ኩሜꬃ ኢስራኤሌ ናይታ ጼይጋዳ ጋይቶቴꬃ ዱንካኔዛ ፔንጌን ሺሻ» ጊዴስ።

4 ሙሴይካ ጎዳይ ኢዛስ ዮቲዳ ማላ ኦꬂዴስ፤ ዴሬይካ ጋይቶቴꬃ ዱንካኔ ፔንጌን ሺቂዴስ። 5 ሙሴይካ ዴራስ፥ «ኦሴታና ማላ ጎዳይ ኣዛዞይሲ ሃይሳኮ!» ጊዴስ። 6 ሙሴይካ ኣሮኔኔ ኢዛ ኣቱማ ናይታ ዴራ ሲንꬅ ሺሺዲ ሃꬃን ሜጪዴስ። 7 ኣሮኔ ቃሚሳ ማላ ኣዱሳ ማይኦ ማይዚዲ፥ ካቦርቴካ ኢዛ ቦላ ጎጲ ማይዚዲ ዳንጮ ዳንጪሲዴስ፤ ሄሳ ቦላካ ኤፉዴ ጌቴቲዛ ማይኦ ማይዚዲ ኢዛካ ዱማ ሂላቴꬃን ኦሴቲዳ ቃባቶን ኦይሴꬂዲ ዳንጪዴስ። 8 ኤፉዴ ጌቴቲዛ ማይኦዛስ ቲራ ቦላ ኪሴይ ሲኬቲዲ ኡሪሜኔ ቱሚሜ ጌቴቲዛይታ ኢዛ ጊዶን ዎꬂዴስ። 9 ኢዛ ሁኤ ቦላካ ጎሴ ጻጺ ዎꬂዲ ሄ ጻꬃ ጎሳ ቦላ ሲንꬃ ባጋራ ጎዳይ ሙሴስ ዮቲዳ ማላ ዎርቃፌ ኦሴቲዳ ሴሎይ ጌሻቴꬃስ ማላታ ጊዳና ማላ ካላቻ ኢዛ ቦላ ዎꬂዴስ። 10 ሄሳፌ ጉዬ ሙሴይ ቲዬቲዛ ዛይቴዛ ኤኪዲ ጋይቶቴꬃ ዱንካኔዛኔ ኢዛን ዲዛ ኡባ ቲይዲ ጎዳ ኦሶስ ዱማሲዴስ። 11 ዛይቴዛፔ ጉꬃራ ኤኪዲ ያርሾ ያርሺዛሶዛ ቦላ ላፑንቶ ዉጺዴስ፤ ቃሴካ ጎዳ ኦሶስ ዱማታና ማላ ያርሾ ያርሺዛሶዛኔ ኢዛ ኦሶስ ጊጌቲዳ ሚሻታ ኩሜꬃ ቦላ ሄሳꬆካ ኢዛን ሜጬቲዛ ሳኔዛኔ ሳኔዛ ኢዛ ቦላ ዎꬂዛይሳ ቦላካ ዉጺዴስ። 12 ቲዬቲዛ ዛይቴዛ ኣሮኔ ሁኤን ጉሲዲ ጎዳ ኦሶስ ኢዛ ዱማሲዴስ። 13 ካሌꬂዲካ ሙሴይ ጎዳይ ኢዛ ኣዛዚዳ ማላ ኣሮኔ ኣቱማ ናይታ ሲንꬅ ሺሺዲ ኣዱሳ ማይኦ ማይዚዴስ፤ ጼሳን ቃባቶ ዳንጪሲዲ ኢስታ ሁኤን ቆቤ ዎꬂዴስ።

14 ሄሳፌ ጉዬ ሙሴይ ናጋራ ጊሻስ ያርሻናስ ኮርማ ቦራ ኤሂዴስ፤ ኣሮኔይኔ ኢዛ ናይቲ ኮርማ ቦራዛ ቦላ ባ ኩሼ ዎꬂዳ። 15 ሙሴይካ ቦራዛ ሹኪዴስ፤ ቦራ ሱꬃን ባ ቢራꬌ ጌልꬂዲ ያርሾ ያርሺዛሶዛስ ኦይዱ ባጋን ዲዛ ꬌሞታ ቲይዲ ጌሺዴስ፤ ሄሳፌ ኣቲዳ ሱꬃ ያርሾ ያርሺዛሶዛ ጋርሳን ጉሲዴስ፤ ሄሳ ማላን ያርሾ ያርሺዛሶዛ ጎዳስ ሻኪ ዱማሲዴስ። 16 ሙሴይ ሹኬቲዳ ሜሄዛ ቃንꬃ ኣሾዛ ቦላ ዲዛ ሞꬌዛ ኡባ፥ ቲሬ ካሚ ኦይኪዳ ሞꬌዛ፥ ኪላሆታኔ ኢስታ ካሚ ኦይኪዳ ሞꬌዛ ኡባ ኤኪዲ ያርሾ ያርሺዛሶዛ ቦላ ጹጊዴስ። 17 ኮርማዛ ኣሾፔ ኣቲዳይሳኔ ማራጬዛ ኤኪዲ ጎዳይ ኢዛ ኣዛዚዳ ማላ ኣሳይ ዲዛሶፔ ጌዴ ሃሲዲ ጹጊዴስ።

18 ሄሳፌ ጉዬ ሙሴይ ጹጌቲዛ ያርሾስ ሺቂዛ ዶርሳ ꬋርሾ ኤሂን ኣሮኔይኔ ኢዛ ናይቲ ꬋርሾዛ ሁኤ ቦላ ባ ኩሼ ዎꬂዳ። 19 ሙሴይካ ꬋርሻ ሹኪዴስ፤ ሱꬃካ ያርሾ ያርሺዛሶዛ ቦላ ዩዪ ኣꬋናስ ዉጺዴስ። 20 ꬋርሾዛ ኣሻ ቆሞን ቆሞን ቃንጺዲ ኬሲዴስ፤ ሁኤዛ፥ ቆሞን ቆሞን ቃንጼቲዳ ኣሾታኔ ሞꬌዛ ጹጊዴስ። 21 ጎዳይ ኢዛ ኣዛዚዳ ማላ ሙሴይ ቃንꬃ ኣሾታኔ ቶሆታ ሃꬃን ሜጪዴስ፤ ሄ ꬋርሾዛ ኣሾ ኡባ ጎዳስ ታማን ጹጌቲ ሳዊዛ ያርሾ ኦꬂዲ ያርሾ ያርሺዛሶዛ ቦላ ጹጊዴስ።

22 ሄሳፌ ካሊዲ ሙሴይ ቄሴቴꬃ ሱንꬃስ ናምኣንꬆ ꬋርሾዛ ኤሂዴስ፤ ኣሮኔይኔ ኢዛ ኣቱማ ናይቲ ባ ኩሼ ꬋርሻ ሁኤ ቦላ ዎꬂዳ። 23 ሙሴይ ꬋርሻ ሹኪዴስ፤ ሱꬃፌ ጉꬃራ ኤኪዲ ኣሮኔስ ኡሻቻ ሃይꬃ ጼራ፥ ኡሻቻ ማንꬃ ቢራꬌኔ ኡሻቻ ቶሆ ማንꬃ ቢራꬌ*ማንꬃ ቢራꬌ፡ ማንꬃ ቢራꬌ ጊዛይሳ ኢሲ ኢሲ ባጋ ጋሞꬆ ቃላን ኣዴ ቢራꬌ ጌቴቴስ። ቲይዴስ። 24 ቃሴካ ኣሮኔ ናይታ ዴራ ሲንꬅ ሺሺዲ ኢስታ ኡሻቻ ሃይꬃታ ጼራኔ ኡሻቻ ኩሼ ማንꬃ ቢራꬌታኔ ኡሻቻ ቶሆታ ማንꬃ ቢራꬌታ ቲይዴስ፤ ሄሳፌ ቲርፒዳ ሱꬃ ያርሾ ያርሺዛሶዛ ቦላ ዩዪ ኣꬋናስ ዉጺዴስ። 25 ሃንዳ፥ ጎይና፥ ቃንꬃ ኣሾ ካሚ ኦይኪዳ ሞꬌ ኡባ፥ ቲሬ ካሚ ኦይኪዳ ሞꬌ፥ ኪላሆታካ፥ ኪላሆታ ቦላ ዲዛ ሞꬌዛኔ ኡሻቻ ሚሴዛ ኤኪዴስ። 26 ኢርሾይ ቦቾንታ ጎዳስ ዱማ ኡኬꬂ ኢዛን ዲዛ ሌማቴዛፔ ኢሲ ዳቦ ኤኪዴስ፤ ሄሳꬆካ ዛይቴን ሙኑቄቲ ኡኬቲዳ ዳቦይ ኢዛን ዲዛ ሌማቴዛፔ ኢሲ ዳቦኔ ሌኤ ኡኬꬅ ኤኪዲ ሞꬌዛ ቦላኔ ኡሻቻ ሚሳ ቦላ ዎꬂዴስ። 27 ሄ ካꬃ ኡባ ኤኪዲ ኣሮኔ ኩሼኒኔ ኢዛ ናይታ ኩሼን ኦይꬂዴስ፤ ኢስቲካ ኦይኪዲ ያኔ ሃ ቃሴꬂዲ ጎዳስ ያርሾ ሺሺዳ። 28 ሄሳፌ ቃሴ ሙሴይ ኢስታ ኩሼፔ ኤኪዲ ቄሴቴꬃ ያርሾ ጊዳና ማላ ሺቂዲ ጹጌቲዛ ያርሾፌ ቦላራ ዎꬂዲ ያርሾ ያርሺዛሶዛ ቦላ ዎꬂዲ ጹጊዴስ፤ ሄሲካ ኢዛ ሳዎይ ጎዳ ኡፋይሲዛ ካꬃ ያርሾ። 29 ሙሴይ ቃሴካ ኣንጋሶዛ ኤኪዲ ያኔ ሃ ቃሴꬂዲ ጎዳስ ሺሺዴስ፤ ሙሴይ ኡባካ ጎዳይ ኢዛ ኣዛዚዳ ማላ ቄሴቴꬃ ሱንꬅ ሱማናስ ሺሺዛ ꬋርሾፌ ሙሴ ጊሻይ ሄሳ።

30 ሙሴይ ቲዬቲዛ ዛይቴፔኔ ያርሾ ያርሺዛሶዛን ዲዛ ሱꬃፌ ጉꬃራ ኤኪዲ ኣሮኔ ቦላ፥ ኣሮኔ ናይታ ቦላኔ ቃሴካ ኢስታ ማይኦ ቦላ ዉጺዴስ፤ ሄሳ ማላን ሙሴይ ኢስታኔ ኢስታ ማይኦ ኡባ ጎዳስ ዱማሲዴስ።

31 ሙሴይ ኣሮኔኔ ኢዛ ኣቱማ ናይታስ፥ «ኣሾዛ ጋይቶቴꬃ ዱንካኔ ፔንጌን ዶይሲቴ፤ ኣሮኔይኔ ኢዛ ናይቲ ማና ማላ ጎዳይ ኣዛዚዳይሳ ቄሴቴꬃ ሱንꬅ ሱሚዛ ዎዴ ያርሾ ኢዛራ ሺሺዛ ሌማቴን ዲዛ ኡኬꬃራ ሄን ሚቴ። 32 ኣሾዛፔ ዎይኮ ኡኬꬃዛፔ ቲርፒኮ ታማን ጹጊቴ። 33 ኢንቴ ቄሴቴꬃ ሱንꬅ ሱሚዛ ዎጋይ ፖሌታናስ ላፑን ጋላስ ኤኪዛ ጊሻስ ሄ ላፑን ጋላሳይ ዉራና ጋካናስ ጋይቶቴꬃ ዱንካኔዛ ፔንጌፌ ኪቾፍቴ። 34 ኢንቴና ናጋራፔ ጌሻናስ ሃይሳ ሃች ኑ ኦꬂዳ ዎጋ ፖላና ማላ ጾሳይ ኑና ኣዛዚዴስ። 35 ሄሳ ጊሻስ ጎዳይ ኣዛዚዳይሳ ፖላናስ ላፑን ጋላስ ኩሜꬅ ጋላሲኔ ኦማርስ ጋይቶቴꬃ ዱንካኔዛ ፔንጌፌ ኪቾፍቴ፤ ጎዳ ዎጋካ ናጊቴ፤ ሂስቶንታ ኣጊኮ ኢንቴ ሃይቃና፤ ታና ጎዳይ ኣዛዚዳ ዎጋይ ሃይሳ» ጊዴስ። 36 ኣሮኔይኔ ኢዛ ናይቲ ሙሴ ባጋራ ጎዳይ ኣዛዚዳይሳ ኡባ ፖሊዳ።