1 ኦስፑንꬃ ጋላሳን ሙሴይ ኣሮኔ፥ ኢዛ ኣቱማ ናይታኔ ኢስራኤሌ ኣሳ ካሌꬂዛ ጪማታ ጼይጊዴስ፤ 2 ኣሮኔካ፥ «ኢሲ ዎሶይካ ኢስታ ቦላ ባይንዳ ኢሲ ሚርጎኔ ኢሲ ꬋርሾ ኤካዳ ሚርጎዛ ናጋራ ጊሻስ ያርሺዛ ያርሾ ꬋርሾዛ ጹጌቲዛ ያርሾ ሂስታ ጎዳስ ያርሻ። 3 ሄሳፌ ጉዬ ኢስራኤሌ ናይታ ናጋራ ጊሻስ ሺቂዛ ያርሾስ ዴይሻ ኦርጌኔ ኢስታ ቦላ ኣይኮ ዎሶይ ባይንዳ ኢሲ ላይꬃ ማራራኔ ኢሲ ላይꬃ ዶርሳ ላቃ ጹጌቲዛ ያርሾስ ኤሃና ማላ ዮታ። 4 ቃሴካ ኢሲ ኮርማኔ ኢሲ ዶርሳ ላቃ ኢሲፌቴꬃ ያርሾስ ኤሄቶ፤ ሄይታንታ ዛይቴን ጊንዴቲዳ ካꬃ ያርሾራ ጎዳስ ያርሾ ሺሼቶ፤ ሄሳ ኡባ ኦꬄቶ፤ ጋሶይካ ጾሲ ኢስታስ ሃች ቆንጫና» ጊዴስ። 5 ኢስቲካ ሙሴይ ኢስታ ኣዛዚዳይሳ ኡባ ዱንካኔዛ ፔንጌ ኤሂዳ፤ ኣሳይ ዉሪካ ጎዳ ሲንꬃን ሺቂ ኤቂዴስ። 6 ሙሴይ ኢስታስ፥ «ጎዳ ቦንቾይ ኢንቴስ ቆንጫና ማላ ኢንቴ ኦꬃናስ ጎዳይ ኢንቴና ኣዛዚዳ ኣዛዞይ ሃይሳ» ጊዴስ። 7 ቃሴካ ሙሴይ ኣሮኔስ፥ «ጌዴ ያርሾይ ያርሼቲዛሶ ሺቃዳ ኔ ናጋራኔ ዴሬዛ ናጋራ ዉርሳናስ ሺቂዛ ያርሾኔ ጹጌቲዛ ያርሾ ያርሻ፤ ሄሳ ኡባ ጎዳይ ዴሬዛ ናጋራ ዉርሳና ማላ ኢዚ ኔና ኣዛዚዳ ማላ ሺሻ» ጊዴስ። ኢብ 7፡27

8 ኣሮኔይካ ያርሾ ያርሺዛሶ ቢዲ ኮይሮ ባ ናጋራ ጊሻስ ሺቂዛ ያርሾስ ሺቂዛ ሚርጎዛ ሹኪዴስ። 9 ኢዛ ናይቲ ሱꬃ ኢዛስ ኤሂዳ፤ ኢዚካ ሱꬃን ባ ቢራꬌ ጌልꬂ ኬሲዲ ያርሾ ያርሺዛሶዛ ቦላ ዲዛ ꬌሞታ ሱꬅ ቲይዴስ፤ ኣቲዳ ሱꬃ ያርሾ ያርሺዛሶ ጋርሳን ጉሲዴስ። 10 ሄሳፌ ካሌꬂዲ ሞꬌዛ፥ ኪላሆታኔ ቲሬ ካሚ ኦይኪዳ ሞꬌታ ኤኪዲ ጎዳይ ሙሴ ኣዛዚዳ ማላ ያርሾ ያርሺዛሶዛ ቦላ ጹጊዴስ። 11 ኣሾዛኔ ጋልባዛ ቃሴ ኣሳይ ዲዛሶፔ ጌዴ ሃራሶ ሃሲዲ ጹጊዴስ።

12 ሄሳፌ ጉዬ ኣሮኔይ ጹጌቲዛ ያርሾስ ሹኪዴስ፤ ሂስቲን ኢዛ ናይቲ ሱꬃ ኢዛስ ኤሂዳ፤ ኢዚካ ሱꬃዛ ኤኪዲ ያርሾ ያርሺዛሶዛ ቦላ ዩዪ ኣꬋናስ ዉጺዴስ። 13 ኢዛ ናይቲ ጹጌቲዛ ያርሾስ ሹኬቲዳ ኣሾዛ ቆሞን ቆሞን ሁኤዛራ ጋꬂ ኢዛስ ኤሂ ኢሚዳ፤ ኢዚካ ሄሳ ኡባ ያርሾ ያርሺዛሶዛ ቦላ ጹጊዴስ። 14 ሄሳፌ ቃሴካ ቃንꬃ ኣሾዛኔ ጉዬ ቶሆታ ሃꬃን ሜጪዲ ያርሾ ያርሺዛሶዛ ቦላ ጹጌቲዛ ያርሾዛራ ኢሲፌ ጋꬂ ጹጌቲዛሶን ጹጊዴስ። 15 ሄሳፌ ካሌꬂዲ ኣሮኔይ ዴሬዛ ናጋራ ጊሻስ ሹኬቲዛ ዴይሻ ኦርጌ ኤኪ ሹኪዲ ባ ናጋራ ጊሻስ ያርሺዳይሳꬆ ያርሺዴስ። 16 ጹጌቲዛ ያርሾዛ ኤሂዲ ካሴ ዲዛ ዎጋ ማላ ያርሺዴስ። 17 ካꬃ ያርሾዛካ ሺሺዴስ፤ ꬊሌዛፔ ኩጳ ኩሜꬅ ኤኪዲ ያርሾ ያርሺዛሶዛ ቦላ ጹጊዴስ፤ ሄሲካ ጹጌቲዛ ያርሾስ ማላዶ ማላዶ ሺቂዛ ያርሾዛ ቦላ ጉጄቲዲ ሺቂዴስ።

18 ኮርማ ቦራኔ ꬋርሾዛ ሹኪዲ ዴሬዛ ጊሻስ ኢሲፌቴꬃ ያርሾ ሺሺዴስ፤ ኢዛ ናይቲካ ሱꬃ ኢዛስ ኤሂዳ፤ ኢዚካ ሱꬃ ኤኪዲ ያርሾ ያርሺዛሶዛ ዩዪ ኣꬋናስ ዉጺዴስ። ሌዌ 3፡1-11 19 ኣሮኔይካ ኮርማ ቦራ ሞꬌዛ፥ ꬋርሻ ሞꬌዛ፥ ኡባካ ጎይና ቶልꬆዛ፥ ቃንꬃ ኣሾ ካሚ ኦይኪዳ ሞꬌዛኔ ቲሬ ካሚ ኦይኪዳ ሞꬌዛ ዶሬቲዳይሳ ቲሬታኔ ኢስታ ቦላ ዲዛ ሞꬌዛ ኤኪዲ፥ 20 ሄ ሜሄታ ኣንጋሶ ጼራ ቦላ ዎꬂዳ፤ ኣሮኔይ ሞꬌዛ ኡባካ ያርሾ ያርሺዛሶዛ ቦላ ጹጊዴስ። 21 ኣንጋሶታኔ ኡሻቻ ጌዳ ኣሾታ ሙሴይ ኣዛዚዳ ማላ ያኔ ሃ ቃሴꬂዲ ጎዳስ ዱማ ያርሾ ሂስቲ ሺሺዴስ።

22 ኣሮኔይ ናጋራ ጊሻስ ሺቂዛ ያርሾ፥ ጹጌቲዛ ያርሾኔ ኢሲፌቴꬃ ጊሻስ ሺቂዛ ያርሾ ያርሺዳፔ ጉዬ ባ ኩሼ ꬎቁ ሂስቲዲ ዴራ ኣንጂዲ ዎꬊዴስ።ታይ 6፡22-26 23 ሙሴይኔ ኣሮኔይ ጋይቶቴꬃ ዱንካኔ ጊዶ ጌሊዳ፤ ሄፔ ኬዚሼ ዴሬዛ ኣንጂዳ፤ ጎዳ ቦንቾይ ኣሳ ኡባስ ቆንጪዴስ። 24 ኣሳይ ቆፖንታ ዲሺን ጎዳ ኣቻፌ ኪቴቲዳ ታማይ ዪዲ ያርሾ ያርሺዛሶዛ ቦላ ዲዛ ያርሾስ ሺቂዳ ሃንዳዛ ኡባ ሚዴስ፤ ዴሬዚካ ዉሪ ሄሳ ቤኢዲ ኢሊሊ ጊዴሲኔ ዉሪካ ሆኪ ጎይኒዴስ።