1 ጎዳይ ሙሴሲኔ ኣሮኔስ ሂዝጊዴስ፥ 2 «ሃይሳ ኢስራኤሌ ናይታስ ዮቲቴ፥ ‹ቢታ ቦላ ዲዛ ዶኣታፔኔ ሜሄታፔ ኢንቴ ማናይቲ ሃይሳፌ ካሊ ዲዛይታ፥ 3 ቶሆ ቂንጪፊሌይ ጳልቄꬃታኔ ባንቺኪዛይታ ሚቴ።

4 « ‹ጊዶ ኣቲን ባንቺኪዛይታ ጊዲ ኡቲዲ ቂንጪፊሌይ ጳልቄቶንታይታ ዎይኮ ባንቺኮንታይታ ጊዲ ኡቲዲ ቂንጪፊሌይ ጳልቄቲዳይታ ሞፒቴ፤ ጋሜላይ ባንቺኬስ ሺን ቂንጪፊሌይ ጳልቄቶንታ ጊሻስ ኢዚ ኢንቴስ ቱና ጊዶ። 5 ጉፓሌይ ባንቺኬስ ሺን ቂንጪፊሌይ ጳልቄቶንታ ጊሻስ ኢዚ ኢንቴስ ቱና ጊዶ። 6 ሃርባይኖይ*ሃርባይኖ፡ ሃርባይኖይ ኢሲ ኢሲ ባጋ ጋሞꬆ ቃላን ኤቼ ጌቴቴስ። ባንቺኬሲሺን ቂንጪፊሌይ ጳልቄቶንታ ጊሻስ ኢዚ ኢንቴስ ቱና ጊዶ። 7 ጉዱንꬂካ ሞፒቴ፤ ኢዛ ቂንጪፊሌይ ጳልቄꬅ ጊዲኮካ ኢዚ ባንቺኮንታ ጊሻስ ኢንቴስ ቱና ጊዲ ቆዴቶ። 8 ሄይታንቲ ቱና ጊዲዳ ጊሻስ ኢስታ ኣሾ ሞፒቴ፤ ሃራይ ኣቶሺን ኢስታ ኣሃካ ቦቾፍቴ።

9 « ‹ኣባ ጊዶኒኔ ሻፋ ሃꬃታ ጊዶን ዲዛ ሜꬌቴꬃታ ኣባ ጊዶፌ ቄፌይኔ ፖቆ ማላ ጋልባይ ዲዛ ኡባ ሚቴ። 10 ኣባ ጊዶኒኔ ሻፋ ሃꬃ ጊዶን ዲዛ ሜꬌቴꬃታፔኔ ሼምፖራ ፓጻ ዲዛ ሃራ ሜꬌቴꬃታ ኡባ ጊዶፌ ቄፌይኔ ፖቄቲዛ ጋልባይ ባይንዳ ኡባይ ኢንቴስ ቱና ጊዲዳ ጊሻስ ሞፒቴ። 11 ሄይታንቲ ቱና ጊዲዳ ጊሻስ ኢስታ ኣሾ ሞፒቴ፤ ሃራይ ኣቶሺን ኢስታ ኣሃካ ቦቾፍቴ። 12 ሄሳ ጊሻስ ሃꬃ ጊዶን ዲዛ ቄፌይኔ ፖቄቲዛ ጋልባይ ኢስታ ቦላ ባይንዳ ሜꬌቴꬃቲ ዉሪካ ኢንቴ ኣቻን ኢጼቲዳይታ ጊዴቶ።

13 « ‹ካፎታፔ ሃይሳፌ ካሊዛይቲ ቱና ጊዲዳ ጊሻስ ሞፒቴ። ሄይታንቲካ ጎሌ፥ ቆሎ፥ ዎሌ †ዎሌ፡ ዎሌይ ኢሲ ኢሲ ባጋ ጋሞꬆ ቃላን ዎዳ ዎይኮ ዉኮ ጌቴቴስ። 14 ጺሎ፥ ዱማ ዱማ ቆሞ ጲርጮታ። 15 ዱማ ዱማ ቁሮታ 16 ያንቻ፥ ጫንጬ ጉቶ፥ ሃꬃ ካፎ፥ ጋጬ ዛሬ ኡባ፥ 17 ጉቶ፥ ቢያ፥ ዪንዳሬ ‡ዪንዳሬ፡ ዪንዳሬይ ኢሲ ኢሲ ባጋ ጋሞꬆ ቃላን ሃዞ ዎይኮ ኦይኣሬ ዎይኮ ሆቃ ጌቴቴስ። 18 ዎይኖ፥ ሃꬃ ካፎ፥ ኣንኮ፥ 19 ዚጊሌ፥ ሳቢሳ ካፎ ዛሬ ኡባ፥ ጂንጂላቴ ጌቴቲዛ ካፎኔ ዉርካዉርኮ።

20 « ‹ቄፌይ ዲሺን ኦይዱ ቶሆራ ቃጺዛ ሜꬌቴꬃቲ ዉሪካ ቱናታ፤ 21 ሄይታንታ ጊዶፌ ጉፓናስ ማዲዛ ጌዳይ ዲዛ ሜꬌቴꬃታ ሚቴ፤ 22 ሄይቲካ ቦሌ ዛሬታ፥ ጺንጎታ ዛሬታኔ ጉምባሮ ዛሬ ኡባ። 23 ሂንኮ ቄፌይ ዲሺን ኦይዱ ቶሆራ ሄሜቲዛ ሜꬌቴꬃታ ኢንቴ ቱና ማላ ቆዲቴ።

24 « ‹ሃይሳፌ ካሊ ዲዛይታ ቦቺዳዴይ ዉሪ ኦማርስ ጋካናስ ቱና ጊዳና።

25 « ‹ሄይታንታ ኣሃ ዴንꬂዳዴይ ዉሪካ ባ ማይኦ ሃꬃን ሜጮ፤ ሜጪኮካ ኦማርስ ጋካናስ ኢዛዴይ ቱና ጊዶ።

26 « ‹ቂንጪፊሌይ ኢስታስ ዲሺን ጳልቄቶንታይቲኔ ባንቺኮንታ ሜሄይ ዉሪካ ኢንቴስ ቱና ጊዳና፤ ሄይታንታ ቦቺዳዴይ ዉሪካ ቱኔስ። 27 ኦይዱ ቶሆራ ዲዛይታፔ ቂንጪፊሌይ ባይንዳ ካንቴን ሄሜቲዛይቲ ዉሪካ ኢንቴ ኣቻን ቱናታ ጊዴቶ፤ ኢስታ ኣሃ ቦቺዳዴይ ኦማርስ ጋካናስ ቱና ጊዶ፤ 28 ሄይታንታ ኣሃ ዴንꬂዳዴይ ዉሪካ ባ ማይኦ ሃꬃን ሜጮ፤ ሜጪኮካ ኦማርስ ጋካናስ ኢዛዴይ ቱና ጊዶ፤ ኢስቲካ ኢንቴ ኣቻን ቱና።

29-30 « ‹ቢታራ ጎሼቲዛይታ ጊዶፌ ሃይሳፌ ካሊዛይቲ ኢንቴስ ቱና ጊዴቶ፤ ጊሮይ፥ ኤጬሬይ፥ ዛሬይ፥ ኮርቼይ፥ ሃይላሾይ፥ ጌጌይ፥ ዋካላይኔ፥ §ዋካላ፡ ዋካላይ ኢሲ ኢሲ ባጋ ጋሞꬆ ቃላን ያሮ ጌቴቴስ። ሻቃንቻይ ኢንቴስ ቱና ጊዴቶ። 31 ቢታራ ጎሼቲዛ ኡባታፔ ቱና ጊዲዳይቲ ሃይታንታ፤ ኢስታ ጊዲን ዎይኮ ኢስታ ኣሃ ቦቺዛዴይ ዉሪ ኦማርስ ጋካናስ ቱና ጊዶ። 32 ኢስታ ኣሃይ ኢዛ ቦላ ዎꬊዳ ሚሺ ዉሪካ ቱኔስ፤ ሄሲካ ሚꬃፌ ኦሴቲዳ ሚሻቲ፥ ማይኦቲ፥ ጋልባ፥ ካራጺቴ፥ ኦጎሮኔ ሄይታንታ ሚሳቲዛ ሃራታካ ጉጄስ፤ ኢስታ ኣሃ ቦቺዳ ሚሺ ዉሪካ ሃꬃን ጌሊዲ ጋምኦ፤ ኦማርስ ጋካናስ ቱና ጊዲዲ ሄሳፌ ጉዬ ጌሽ ጊዶ። 33 ሄይታንታ ኣሃይ ማና ሚሻ ጊዶን ጌሊኮ ሄ ሚሻ ጊዶን ዲዛ ሚሺ ዉሪካ ቱኒዛ ጊሻስ ሄ ማና ሚሻዛ ዎꬊቴ። 34 ሄ ማና ሚሻፌ ሃꬂ ኢዛ ቦላ ጾኬቲዳ ካꬂ ዉሪካ ቱና ጊዴስ፤ ኢዛን ዲዛ ኡዬቲዛ ሚሺካ ቱና ጊዴስ። 35 ኣይ ኣሃይካ ቦቺዳ ሚሺ ዉሪካ ቱና ጊዲዳ ጊሻስ ኢዛ ኢጺቴ፤ ማኒ ሜꬊዳ ጮጬ ጊዲን ኦቶይ ሜቆ። 36 ሄይታንታ ኣሃይ ሃራ ኡባ ቱኒሲዛዝ ጊዲኮካ ፑልቶ ሃꬄኔ ሃꬂ ዲዛ ኦላ ቱኒሴና። 37 ዜሬꬃስ ኡቲዳ ካꬃ ቦላ ዎꬊኮ ዜሬꬃይ ቱኔና። 38 ጊዲኮካ ዜሬꬃ ቦላ ሃꬂ ጉኪ ሲሚን ኣሃይ ቦቺኮ ሄ ዜሬꬃይ ሄሳፌ ጉዬ ቱና ጊዴስ።

39 « ‹ሜቴቲዛ ሜሄ ጋርሳፌ ኣዋይሲካ ሃይቂን ሄ ሃይቄꬃ ቦቺዳዴይ ኦማርስ ጋካናስ ቱና። 40 ኣይ ኣሲካ ሄ ሃይቄꬃፌ ሚኮ ባ ማይኦ ሜጮ፤ ኦማርስ ጋካናስ ቱና ጊዶ፤ ኣይ ኣሲካ ሄ ሃይቄꬃ ኣሃ ቶኪኮ ባ ማይኦ ሜጮ፤ ጊዲኮካ ኦማርስ ጋካናስ ኢዛዴይ ቱና ጊዶ።

41 « ‹ቢታራ ጎሼቲዛ ኣይ ሜꬌቴꬃቲ ዉሪካ ኢንቴ ኣቻን ሜቴቶንታዚኔ ኢጼቲዳዝ ጊዴቶ። 42 ቲራን ጎሼቲዛ፥ ኦይዱ ቶሆራ ቢዛይታ፥ ዎይኮ ዳሮ ቶሆይ ዲዛይታ ኡባካ ሞፒቴ፤ ኢስቲ ኢንቴ ማታንካ ኢጼቲዳይታ ጊዴቶ። 43 ሄይታንታፌ ኣዋይሳካ ሚዲ ኢንቴና ቱኒሶፒቴ። 44 ታኒ ጎዳ ኢንቴ ጾሳ፤ ታኒ ሃራፔ ዱማ ጊዲዳ ጊሻስ ኢንቴካ ዱማ ጊዲቴ፤ ባ ቲራን ጎሼቲዛይታ ሚዲ ኢንቴርካ ኢንቴና ቱኒሶፒቴ። ሌዌ 19፡2፤ 1ጴጽ 1፡16 45 ኢንቴስ ጎዳ ጊዳናስ ጊብጼፔ ኢንቴና ካሌꬃ ኬሲዳይ ኢንቴ ጾሳይ ታና፤ ሄሳ ጊሻስ ታኒ ዱማ ጊዲዳ ማላ ኢንቴካ ዱማ ጊዲቴ።

46 « ‹ሜሄታ፥ ዶኣታ፥ ካፎታ፥ ሃꬃ ጊዶኒኔ ቢታ ቦላ ቲራን ጎሼቲዛ ሜꬌቴꬃታ ኡባ ጊሻስ ኢሜቲዳ ዎጋይ ሃይሳ፤ 47 ዎꬊዳ ዎጋ ማላ ጌሻታኔ ጌሽ ጊዶንታይታ ጊዶን ዲዛ ዱማቴꬅ ሻኪ ኤራናስ ሄሲካ ሜቴቲዛይታኔ ሜቴቶንታይታ ጊዶን ዲዛ ዱማቴꬃ ሻኪ ኤራናስ ኢንቴ ሎኤꬂ ናጌቲቴ።› »