1 ጎዳይ ሙሴስ ሂዝጊዴስ፥ 2 «ኢስራኤሌ ኣሳስ፥ ‹ማጫሲ ሻራዳ ኣቱማ ና ዬሊኮ ካሴ ማጫሳ ዎጋይ ኢዚ ቦላ ቤቲዳ ዎዴ ሃኒዛይሳꬆ ላፑን ጋላስ ጋካናስ ኢዛ ቱና ጊዳዉስ። 3 ዬሌቲዳ ናዚ ኦስፑንꬃ ጋላስ ቃጻሬታናስ ቤሴስ። ሜꬌ 17፡12፤ ሉቃ 2፡21 4 ሄሳፌ ጉዬ ጋጪኖ ሱꬃይ ኢዚፔ ኤቃና ጋካናሲኔ ኢዛ ዬሎሶፌ 33 ጋላስ ጋካናስ ጾሳስ ዱማቲዳ ኣይ ሚሺካ ቦቻናስ ቤሴና፤ ሄሲካ ኢዛ ጌይዛ ዎዴይ ዉሮንታ ዲሺን ጋይቶቴꬃ ዱንካኔ ጊዶ ጌሉፑ።

5 « ‹ሄሳꬆካ ኢሲ ማጫሲ ማጫ ና ዬሊኮ ካሴ ቦላ ቂታይ ኢዚ ቦላ ቤቲዳ ዎዴ ሃኒዛይሳꬆ 14 ጋላስ ጋካናስ ቱና ጊዳዉስ፤ ሄሳፌ ጉዬ ሱꬃይ ኢዚፔ ሲሚን ኢዛ ዬሎሶፌ 66 ጋላስ ጋካናስ ጋምኡ።

6 « ‹ኢዛ ጌይዛ ጋላሳቲ ዉሪዛ ዎዴ ኣቱማ ና ጊሻስ ጊዲን ዎይኮ ማጫ ና ጊሻስ ጹጌቲዛ ያርሾስ ኢሲ ላይꬃ ላቃኔ ናጋራፔ ጌያናስ ሺቂዛ ያርሾስ ሃራጴ ዎይኮ ሃራጴ ጪዬ ጋይቶቴꬃ ዱንካኔ ፔንጌ ኤሃዳ ሄን ኦꬂዛ ቄሴስ ኢሙ። 7 ቄሴዚካ ኢዛ ኢሚዛይሳ ኢዚፔ ኤኪዲ ጎዳስ ያርሾ ሺሾ፤ ማጫሳያካ ኢዛ ዬሊሺን ኢዚፔ ጉኪዳ ሱꬃፌ ጌያዉስ፤ ሃይሲ ኣቱማ ና ዎይኮ ማጫ ና ዬሊዛ ማጫሳስ ዎꬊዳ ዎጋ። ሉቃ 2፡24 8 ዬሊዳ ማጫሳያ ዶርሳ ላቃ ኤሃናስ ዳንዳዮንታሮ ጊዲኮ ናምኡ ሃራጴታ ዎይኮ ናምኡ ዋኖሴታ ኤሁ፤ ናምኣታፔ ኢሶይ ጹጌቲዛ ያርሾስ፥ ሃንኮይሲ ናጋራ ጌሾስ ያርሾ ሺቆ፤ ቄሴዚካ ኢዞ ናጋራፔ ጌሾ፤ ሄሳፌ ጉዬ ኢዛ ጌሽ ጊዳና› ጌስ።»